"  سمكة قرش التايجر - ضحية شاطئ الغردقة  "

كلنا تابعنا خلال اليومين اللي فاتوا الحادث البشع 

لسمكة قرش التايجر اللي ظهرت بشواطئ الغردقة 

سمكة قرش عايشة في حالها وفي بيئتها الطبيعية 

وتتفاجئ بإقتحام بشري لمكانها وده اضطرها تتعامل معاه كفريسة 

والموضوع ما وقفش لعند هنا .. لأ 

دول كمان عملولها فخ واصطادوها وقتلوها .. 

كل ده وهي مش عارفة ذنبها إيه ؟ 

في العادي بتتواجد سمكة قرش التايجر على عمق 

٣٥٠ متر ، ولكن في الوقت ده من كل سنة 

بيتزايد تواجدها على السطح ولأسباب خارجة 

عن ارادتها تمامًا .. طب ليه في الوقت ده تحديدًا ؟

هقولك .. لأن في الوقت ده من كل سنة وقبل عيد الأضحى 

بيزيد عدد القوارب اللي بتمر شايلة أضاحي

وجلود وفراء وغيرها من الحاجات اللي بيتسرب منها 

كميات كبيرة من الدم للمياه ، وده اللي بيسبب 

حالة من السعار والهياج لأسماك القرش 

ولأن ربنا خلقها بحاسة شم قوية جدًا 

فبتطفو على السطح وتتحرك ناحية الدم 

وتبدأ تعامل مع أي حاجة قدامها معاملة الفريسة 

وبتهاجمه على طول وبدون اي دوافع 

يعني هي لا بتاكل الإنسان ولا بتستطعمه من أساسه

ولكن ده بيحصل بسبب اضطراب نظامها الغذائي ، 

واللي كانت متعودة على أكل السمك

 وفجأة بقى أكلها من أنواع لحوم مختلفة 

زي الخرفان والحيوانات النافقة .. 

والدليل على إن أسماك القرش ضحية للإنسان طول الوقت 

مش العكس زي ما أُثار على مواقع التواصل الاجتماعي

إن هجمات أسماك القرش على البشر لا تتعدى ال ٦٠ هجمة في السنة 

ووفيات البشر من هجماتها ما يزيدش عن ٧ أفراد في السنة 

في حين إن عدد أسماك القرش اللي بتتقتل على يد البشر 

يتخطى ال ٢٨٠ مليون سمكة قرش في السنة 

يبقى مين فينا اللي متوحش وقاتل ؟! 

صحيح ما ننكرش إن منظر مهاجمة سمكة التايجر للسائح الروسي كان صعب 

وممكن يضر بالسياحة بشكل ما 

ولكن خلينا متفقين إن منظر قتل سمكة القرش بالشكل ده 

هيضرب السياحة في مقتل .. وأصعب بكتير من قتلها لبني آدم 

اقتحم مكانها في وقت عندها سعار واتعاملت معاه بغريزتها الطبيعية 

اللي ربنا خلقها عليها .. 

طيب لو انت لا قدر الله في يوم اتحطيت في موقف مشابه 

للسائح الروسي ولقيت نفسك فجأة قدامك سمكة قرش .. تعمل ايه ؟ 

برضه هقولك .. ما انا مش هسيبك كده يعني محتاس ..

أول حاجة لازم تتصرف بهدوء شديد .. وتقف بشكل عمودي 

ولو عرفت تغطس وتطلع bubbles يبقى تمام 

ده لو كان فيك نفس ، تاني حاجة حاول بقدر الإمكان 

تعوم ببطء شديد متجه للشاطئ ، مش بسرعة 

لأنها لو حست انك بتهرب هتجيبك ، ده قرش يا معلم 

خلي عينيك عليها طول الوقت وتابع حركتها 

ولما تقرب منك علشان تحاول تتعرف عليك 

زقها براحة من مناخيرها .. ده لو قلبك جابك يعني 

إنما بقى لو مجرد ما شوفت سمكة القرش 

اتعاملت معاها معاملة الكلب اللي تحت البيت

واللي متعود تجري منه وجريت .. يبقى ربنا يعوض عليك 

وللأسف هتضطر تدوقك علشان تعرف طعمك ايه 

لكن في العموم مفيش قرش بياكل انسان 

ووجوده بالصورة دي والسعار اللي عنده ده بسبب الانسان نفسه