ما بعد الفراق ، كيف تتخلص من آلام بعد الفراق ؟!

 ما بعد الفراق 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده 

قد ما هو حزين ومؤلم ولكن له جانب كبير كوميدي

هي صحيح كوميديا سوداء ومنيلة بنيلة 

ولكن أهي إسمها كوميديا ..

مراحل ما بعد الفراق

المرحلة الأولى : كل حاجة بتفكرني بيك 

الفراق.. من أسوأ الحاجات اللي ممكن تمر على البني آدم 

بس مش على طول الفراق بيكون حاجة وحشة

 أحيانا بيكون الفراق مطلوب ومرغوب فيه 

وبيكون سبب ان حياتك تتظبط وترجع لطبيعتها

قبل الارتباط ، اللي ناس كتير بتحسه سجن

 وللفراق مراحل زيه زي الإرتباط

واللي كان واجب علينا نتكلم عنه قبل الفراق

بس الحقيقة بتقول إن كل إرتباط آخره فراق 

ولكل ظالم نهاية .. ولكل حاجة حلوة زهوة 

ولكل حصان عربي أصيل كبوة وخيبة أمل راكبة جمل 

والفراق له مراحل كتير جدًا بيمر بيها كل صاحب قلب مكسور

أو هي اللي بتمر بيه وبتعدي على وشه مش عارفين 

وأولى المراحل دي مرحلة : كل حاجة حلوة بتفكرني بيك

خلاص فركشتوا .. وعملتلك بلوك من كل برنامج خلقوا ربنا 

وطبعاً زيها زي غيرها مستنياك تحاول توصلها 

طب إزاي ؟ إزاي هوصلك يا معدومة الضمير ؟!

بعد ما عملتيلي بلوك من الواتس آب والماسنجر والتليجرام 

والايمو .. والانستاجرام .. أكيد تقدر توصلها لأن اللي عايز يعمل حاجة بيعملها

والحب مفيهوش أعذار وبصلة المحب خروف .. 

أيوه شايف خروف أهوه عامل نفسه دليفري بيوصل أوردر 

لشقة حبيبته وأبوها بيفتحله وبيضطر يقوله ده هدية من المحل

إرجع يا إبني بيتك .. خد الأكل ده إتعشى بيه 

وإنت بتحرقلك موسمين تلاتة من مسلسل يمكن تنساها .. 

وصدقني بعد ما تفوق هتتف على نفسك كل يوم .. هي دي أشكال برضه تتحب 

المهم إنك في المرحلة دي بتبدأ كل حاجة تشوفها في الدنيا تفكرك بالشخص ده

يعني شارع مشيتوا فيه او شارع شبهه 

يا إبني ما هي كل الشوارع شبه بعضها .. 

ده في بلاد كوبي بيست من بعض دلوقت

عصير كان بيشربه مثلاً الشخص ده وبيحبه .. 

ولما تسأله أو تسألها يقولك انها كانت بتحب عصير القصب 

دي مصر كلها بتشرب عصير قصب 

ده فيه مغنيين كلوا عيش بسببه يا إبني  

يقولك لا العصير اللي كانت بتشربه مختلف 

في ايه ؟ مختلف في إيه ؟ ما هو يا اما كوباية يا كيس 

كانت بتقعد تحت المصفاة في المعصرة 

ما زيها زي الخلق يا ابني 

ده الا بقى لو كانت بتشرب عصير لفت 

يقولك كانت بتتنفس مثلاً عمال على بطال..

لا دي مسرفة .. مسرفة وهتحتاج أوكسجين كتير

ولا .. انت مغفل ؟ ما هي كل البشر بتتنفس .. 

ده مش كل البشر بس .. ده الحيوانات والزرع وكل كائن حي بيتنفس

ده التنفس ده عملية كل الكائنات بتعملها بتاخد أوكسجين وتخرج ثاني أكسيد الكربون

وإلا بقى هي كانت بتاخد أوكسجين وتطلعه مسك وعنبر 

 يا إبني طب ما هو صاحبك اللي جمبك بيتنفس 

ولا علشان هو انسان .. وهي قلبها حجر 

المهم إن المرحلة دي بتاخدلها من ٣ أسابيع ل ٨ شهور 

يا دي النبي ٨ شهور ..؟ اه ده كلام علمي .. 

ده إنت لو حامل فيها يا إبني كنت ممكن تولد بعد ٧ شهور زي ناس كتير

ومن أعراض المرحلة دي كمان 

لما تلاقي نفسك قاعد تقلب في صور المفروض تمسحها 

مش علشان تنسى .. لا.. المفروض تمسحها علشان هي وحشة 

دي صور تعر يا إبني .. ده لو ظابط مسكك بيهم هياخدك تحري 

وتلاقيك قاعد بتسمع في اغنية واحدة لمدة 24 ساعة

ليه ؟ أصلها أهدتهالك .. يا حبيبي ده نوع من العذاب النفس 

كانوا بيطبقوه على الجواسيس في الحرب الباردة

  ومن الأعراض تلاقي نفسك بدأت تشوف كل الناس هي 

دي تبقى مصيبة .. دي هتدمر السلالة البشرية 

وترجع محاولاتنا لتحسين النسل ورا ٣٠٠٠ سنة 

دي وشها يقطع الخميرة م الفرن 

وتلاقي نفسك بدأت تسمع كل الأصوات صوتها 

إن أنكر الأصوات لصوت الحمير

ده بسبب صوتها جيرانهم باعوا شقتهم برخص التراب 

أحب أقولك إعقل يا إبن الناس وإعرف إنها مادام بعدت 

يبقى ربنا نجاك .. وإنك عملت خير في دنيتك بيتردلك في بعادها 

المرحلة الثانية : حرق وقت 

بعد ما تخرج من المرحلة الأولى دي اللي زي ما قولنا 

على حسب شخصيتك المهببة هتاخد من ٣ أسابيع ل ٨ شهور

 تلاقي نفسك داخل على مرحلة أسوأ من اللي فاتت بكتير

مرحلة حرق وتضييع الوقت

أهلاً بيك في أكبر مضيعة لوقتك عبر التاريخ 

يعني تلاقي نفسك مش عايز تروح علشان ما تفكرش 

مش عايز تقعد لوحدك .. خايف تواجه الحقيقة 

الحقيقة اللي بتقول إن وش رجلك أحلى من وشها بكتير

منه لله اللي إخترع الفلاتر .. عايز تهرب من كونك اتكرفت

واتنفضلك .. وتم استبدالك بموديل أحدث 

المهم تفضل تدور على أساليب لتضييع الوقت والهروب 

طبعاً كلها أساليب جديدة ومبتكرة ومحدش جربها قبل كده لتضييع الوقت

يعني تدخل جمعية وتقبضها الأول وتاخد فلوسها كلها

تدخل بيهم البلاي ستيشن من الساعة اتنين الضهر وتطبق باليومين

لعند ما تنام ع الدراع مثلاً .. وتبقى واحد من المكان 

أو قطعة ديكور منه مش هتفرق .. حاجة أصحاب البلاي ستيشن

 اتعودوا على وجودها أكتر ما اتعودوا على وجود الأجهزة نفسها .. 

والأسوأ من كده إنه ياريتك بتكسب .. لأ ده انت كمان بتخسر بفلوسك 

تخلص كل فلوسك وتبدأ تدور على نشاط بديل 

فتدخل قهوة وتطلب كوباية شاي بآخر خمسة جنيه في جيبك 

وتلاقي نفسك بتلعب عشرة دومنه من 5002 وصاحبك

اللي نويت تضيع عمره معاك نفسه ومنى عينه يروح 

بس طبعاََ انت رابطه من رجله في الترابيزة 

وممضيه على إيصالات أمانة على بياض 

علشان ما ينطقش بكلمة أنا مروح دي خالص

أخيرًا وبعد ١٤ يوم تلاقي نفسك خلصت عشرة الدومنة 

وتلاقي نفسك مضطر تروح يا إما هتضطر تطلب 

كوباية شاي تانية .. وده اللي ما تقدرش عليه

بعد ما خسرت كل فلوسك في البلاي ستيشن

إيه ده ؟ يعني خلاص .. يعني أنا مضطر أروح ؟

تبدأ عندك حالة شجن ولسان حالك مش عايز أروح 

أنا هتمشى شوية .. فتاخد بعضك وتتمشى تتمشى 

وتلاقي تليفونك بيرن .. حد من أهلك أبوك ولا أمك بيكلمك

معذور برضه ما شافكش من الصيف اللي فات

ويسألك سؤال إنت مش عارف إجابته .. ويقولك إنت فين ؟

تقوله الإجابة البديهية .. أنا تحت البيت ، ولو رفعت راسك هتلاقي فوقها

يافطة ليبيا ترحب بيكم .. تلف وترجع تاني مرهق علشان تنام يا ولداه 

خسران كل حاجة .. فلوس وطاقة وعمر ومجهود 

بس كسبان عضلتين سمانة ماحصلوش لعداء مالي في الأولمبياد 

من كتر المشي طبعاً.. وفجأة تفوق .. تفوق بعد ما تكون حرقتلك شهرين تلاتة 

قول ستة من عمرك وأنت بتحاول مش تنسى .. 

لا انت بتحاول ما تفتكرش .. بتحاول تهرب يا صاحبي 

والمرحلة دي بتاخد من عمرك زي ما قولنا من ست شهور لسنة بالكتير 

بس ايه بتفوت هوا.. ولا سنين السجن

وكمية توهان بقى رهيبة.. يعني حد يسألك على النهارده ايه 

ترد عليه التلات مثلا وهو السبت

 اللي بعد التلات اللي تقصده ده بأسبوعين

ضياع أعمار.. وعلشان تنسى وتنسى مين.. رجل كنبة مستعملة 

عيب والله ..

المرحلة الثالثة : علاقات بلا هدف 

بعد ما ربنا يكرمك وتخرج من مرحلة حرق الوقت 

بعد سنة اللي طارت في التوهان دي .. تبدأ تدور على نفسك 

مش على مستقبلك ودراستك ولا شغلك اللي اترفدت منه 

من شهور وما اخدتش بالك .. لا تبدأ تدور على نفسك حرفيًا

تفوق تلاقي نفسك نايم على كنبة ومتحدد حواليك 

كده زي في مواقع الجريمة .. بس مش بالطباشير الأبيض 

لا .. بالزبالة .. كمية قزايز حاجة ساقعة .. وكمية سكريات 

لو جمل ما يستحملهاش .. كمية أكياس وحاجات اشتريتها أونلاين 

بدون غرض أو سبب .. معروف عن المرحلة اللي فاتت دي 

انها بتزود عند الإنسان الشرا بشكل كبير 

أي حاجة تعدي قدامه عايز يشتريها ..

فتلاقيك شاري مثلاً بدلة غطس وانت عمرك ما هتستخدمها 

تلاقيك شاري خوذة .. وانت ماعندكش موتسيكل 

تقريبًا للصدمات .. تلاقيك شاري سماعة دكتور 

وجهاز قياس ضغط .. وانت أصلاً خريج تجارة عادي 

وهكذا من أشياء عمرك ما هتستخدمها 

تقوم تنفض نفسك من الزبالة اللي انت نايم في وسطها

وتاخد دش وتحلق دقنك اللي وصلت سرتك .. 

وتحس انك خلاص نسيت .. وهتبدأ حياة جديدة 

أحب أقولك .. إنت غلطان .. ودي المرحلة التالتة 

واللي ليها أعراض انسحاب زيها زي اللي قبلها بالظبط

تخرج من بيتك بتدور على حد ترتبط بيه 

أي حد .. حتى لو كلبة بلدي .. بس أهي اي حاجة فيها الروح

طبعاً انت بتكون متخيل انك عايز ترتبط 

علشان انت مجرد انسان وذكر وعايز حتة طرية في حياتك

وانا احب اقولك انك برضه غلطان .. انت بس ناقح عليك الارتباط 

الارتباط من أجل النسيان .. انت ما نسيتهاش يا مغفل 

انت عايز تنساها بغيرها انت بتدور على حد ينسيك اللي كان

 وبعد كده تحطه في وضع تخليه عايز ينساك بعدين 

وهكذا جمعية ودايرة.. فتلاقيك كل يوم ترتبط بواحدة

ترتبط الفجر وتفركش بعد 20 ساعة .. اشمعنى ؟

علشان تلحق تناملك 4 ساعات وتقوم تدور وترتبط تاني 

فتلاقي نفسك بعد مجهود مضني لمدة أسبوع 

معاك ١٤ ولا ١٥ بنت مرتبط بيهم .. وبتتلخبط في أسمائهم

اللي من ع الفيس واللي من على اللودو

واللي نزلت لقيتها بتسرح في الشوارع بمناديل

قلت تسرح بيها وتفهمها انها حلوة .. 

وتبدأ في متاهة ودوامة أسوأ من كل اللي فات 

من واحدة للتانية ، اللي بتكلمها بليل واللي بتكلمها الصبح 

واللي بتخرج معاها بعد الضهر وفجأة تلاقي نفسك

مطلوب منك ١٨ هدية في الفلانتين تضطر تعمل حادثة 

اهي مصاريف المستشفى هتكون أوفر من كل ده 

و المرحلة دي ممكن لو استمرت سنتين تلاتة 

هتلاقي نفسك ارتبطت فيهم ب ٣٠٠ واحدة 

منهم اللي قعدت معاك شهر ومنهم اللي قعدت أسبوع 

ومنهم اللي فركشتوا مع بعض في ست ساعات

كم ضحايا غير عادي لمجرد انك تنسى بس 

ولكن زي ما قولنا بتسيب وراك ناس شبهك عايزة تنسى برضه

داء ومرض بينتشر وكل واحد بيدخل في نفس الدايرة

ويبظأ يصيب ناس تانيين غيرك 

المرحلة الرابعة : اجتهاد بغرض الإثبات

بعد ما بتمر بالمراحل دي كلها بيكون غرضك الأساسي 

انك تثبت نفسك في أي حاجة.. في أي شغل او اي حاجة تخليك تلمع 

وتخلي اللي سابتك تندم عليك.. اللي بتكون اتجوزت مرتين اصلا 

ومعاها عيال .. بس اهوه بتحاول تحسسها انها ضيعتك من ايدها 

وتنزل للحياة بقى .. تشتغل 12 شغلانة كل شغلانة تقعد فيها 3 ايام

تحضر ماجستير ودكتوراه وتطلع الفضاء وتنزل 

تبدأ تدور على ايه هي أكتر المجالات اللي الناس بتجري وراها

علشان تدخلها وتتميز فيها .. فتلاقي نفسك راجع تلعب كورة

وتدخل اختبارات أندية مصر كلها

 وانت أصلاً مش فاكر ان كانت مدورة ولا مثلثة

تبدأ تكتب أغاني راب وتراب وتدور على حد تسجل عنده كلامك اللي زي الزفت

وتعمل أغنية تسمعها انت واتنين صحابك وبعدين تعملها ديليت

تغير المجال بعد يومين وتبدأ حياة البلوجر وتصور نفسك عمال على بطال

وتعمل ريفيوهات لمحلات كشري تحت البيت 

ومحدش يشوفك برضه وتقلب الصفحة بعد يومين 

وتقرر انك هتمثل وتنزل كل مكاتب الكاستنج اللي في مصر 

وتلاقي نفسك متسكن مجاميع في مسلسل بتنضرب فيه تلاتين قلم 

وطالع بضهرك ومحدش شاف وشك .. ودي نعمة من ربنا 

فتغير المجال للمرة المليون .. بحث مضني .. بحث متكلف 

عن أي طريقة تخليك بتلمع وتخليك تسترد كرامتك قدامها 

وانك تثبتلها انك وقفت على رجليك انك جامد ومن غيرها مكمل 

و المرحلة دي على قد ما بتكون تايه فيها 

بس بيكون عندك هدف واضح 

إنك تثبت نفسك وتحسس كل اللي حواليك انك قوي وجامد

المرحلة دي اللي بمجرد ما تخرج منها تلاقي نفسك 

بتتكلم لغتين جداد.. وبتعزف مزيكا.. وبتلقي شعر 

وبتفهم في الكهربا و السباكة والنجارة 

وكل نشاط ممكن يخوضه الانسان 

بس هل نسيت ؟ اعتقد لأ .. طب ليه ؟

لأن الغرض يا صاحبي من الأول ما كانش صح 

الغرض كان النسيان .. نسيان جزء من حياتك مهم 

أيام عيشتها ومريت بيها لا هتعرف تنكرها ولا هتعرف تحذفها 

إختيار من اختياراتك ممكن يكون غلط 

وبتحاول تمحيه .. بدل ما تتعلم منه 

وتحاول تخلي اختياراتك اللي بعد كده أفضل 

وحياتك اللي جاية أجمل .. 

بعد الفراق .. مرحلة مهمة جدًا بتعلمك إنك ما تبديش حاجة على سعادتك 

وعلشان سعادتك .. احنا عملنا الحلقة دي

اللي للأسف انتهت دلوقت .. ياريت تكون مبسوط 

وما تنساش تعملنا لايك وشير .. ولو مريت بتجربة شبه 

التجارب اللي اتكلمنا عليها .. قولنا في الكومنتات