" بعد إمام عاشور ، الأهلي يسعى لضم نجوم الزمالك "
شوفتوا اللي حصل في صفقة إمام عاشور ؟
الصفقة اللي كسرت الدنيا ، ودخلت مشجعين الفريقين
في حالات متباينة بين الحزن والفرح
أهي الصفقة دي ما تجيش حاجة جنب الصفقات اللي جاية
و من الواضح إن الصفقة دي هتكون بداية
لسلسلة صفقات كتير ، كلهم هيكسروا الدنيا برضه
لأن بعد إمام عاشور الأهلي بيخطط لخطف 2 لاعيبة من الزمالك
من أهم وأفضل لاعبي القلعة البيضاء
وزي ما سمعنا من جماهير النادي الأهلي في الفترة اللي فاتت
هتافات زي ،
أنا غاوي أنا غاوي إمام عاشور أهلاوي
بعد نجاح صفقة إمام عاشور اللي انفردنا بكل تفاصيلها هنا قبل اى حد..
شكلنا كده هنسمع الفترة الجاية هتافات كتير جدًا
أصعب ، وأقوى ، لأن الحكاية المرة دي مش حكاية صفقة تمت وخلاص
لا... ده احنا هنقولكم حكايات تانية جديدة ومفاجآت لأول مرة هتسمعوها
تقريبًا كدا المسؤولين في النادي الأهلي وتحديدا محمود الخطيب
حالفين انهم يخطفوا اهم و أحرف اللاعيبة اللي موجودة في نادي الزمالك
يعني بعد إمام عاشور الأهلي مش ساكت
وبيخطط دلوقتي لخطف أحمد فتوح الظهير الأيسر للزمالك
مش بس كده لا دا كمان عايزين يجيبوا أحمد سيد زيزو
الجناح الطائر للزمالك واللي يعتبر أهم لاعب في الفريق في الوقت الحالي
وبيتم دلوقتي وضع السيناريو اللي من خلاله يتم احتراف الثنائى فتوح وزيزو
ثم العودة مرة أخرى للنادي الأهلي.. زيهم زي إمام عاشور بالظبط
طب نقول تفاصيل خلينا في الأول نتكلم عن أحمد فتوح
اللي يحق له انه يوقع لأي نادي في شهر يناير الجاي
لأن عقده هينتهي بنهاية الموسم الجاي
والايام اللي فاتت دي كان في جلسة جمعت مسؤول أهلاوي كبير مع أحمد فتوح
وتم الاتفاق فيها على طريقتين لانتقال فتوح للأهلي
الأولى أنه يوقع للأهلي بشكل رسمي في شهر يناير
ويتم التكتم على الأمر حتى ينتهي الموسم وينضم للمارد الأحمر في الموسم الجديد
طب وإحنا عرفنا منين مادام بيتم التكتم على الأمر ؟
لا دي مصادرنا الخاصة بقى ..
والطريقة الثانية انه يصمم على أنه يحترف
و يطلب من الزمالك الاحتراف في بداية الموسم اللي هيبدأ ده
او في يناير وبعدها يبقى يرجع على الأهلي بنفس طريقة إمام عاشور.
ده كده بالنسبة لأحمد فتوح ، نيجي بقى للكابتن زيزو
اللي بيعتبر أهم الأهداف اللي عايز يحققها محمود الخطيب
رئيس النادي الأهلي في موسم الصفقات الجديدة..
طب وده ممكن يتم إزاي ؟ .. أقولكم
في شركة تسويق لاعبين يقال انها تركية ايطالية
مندوبها وصل القاهرة من كام يوم وقعد مع زيزو بالفعل
وجايبله عروض من أندية فرنسية وتركية وايطالية
وخلال الساعات الجاية دي هيتقدم عرض رسمي
من العروض دي لنادي الزمالك للحصول على خدمات زيزو
وبعدها برضه يرجع على الأهلي زي ما حصل مع إمام عاشور برضه
اللي احترف في ميتلاند الدنماركي حوالي 3 شهور ورجع لبس الفانلة الحمراء
تفتكروا هل الصفقتين دول ممكن يتموا بالفعل ؟
ويسيطر بيهم النادي الأهلي على غريمه التقليدي
وبلغة الكورة كده ، يفضي فرقته من اللاعيبة ؟
ولا دي مجرد تكهنات ، وممكن نلاقي الأهلي
بيغير إستراتيجية تعاقداته في الفترة الجاية ؟
وهل لو ده حصل ، هيتقال برضه على اللاعيبة دي إنهم خاينين للكيان الأبيض ؟
ولا خلاص الجماهير أدركت إن الكورة مجرد بيزنس
وإن الإحتراف ملوش علاقة بالولاء ؟
.jfif)
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..