إختفاء الغواصة تيتان ! | The disappearance of the submarine Titan

 

" اختفاء الغواصة تيتان ! "

تخيل معايا كده ، تبقى دافع ربع مليون دولار 

علشان تنزل في أعماق المحيط تتفرج على حطام

سفينة التايتانك في غواصة 

فتلاقي نفسك بتواجه نفس مصير ركاب التايتانك

هو ده اللي العالم كله بيتابعه من يومين

اختفاء الغواصة تيتان

ودي غواصة سياحية صممتها شركة  أوشن جايت

  بغرض عمل رحلة لرؤية حُطام 

سفينة تايتانيك الشهيرة واللي غرقت ١٩١٢

الرحلة اتحركت يوم الأحد اللي فات

  لعمق المحيط الأطلسي وكان المفروض انها تنزل 

مسافة ٣٨٠٠ متر تحت سطح الماء 

لكن اللي حصل ما كانش معمول حسابه تمامًا 

أو يمكن معمول حسابه محدش عارف

إن الغواصة تختفي تمامًا بعد أقل من ساعتين من نزولها للمحيط 

الغواصة كانت مجهزة بجهاز نبضات بيرسل 

إشارة بتدل على موقعها كل ١٥ دقيقة

 لكنها فقدت الاتصال بالسطح بعد ساعة و٤٥ دقيقة بالظبط

وبالتالي مابقوش عارفين يحددوا مكانها فين 

والغواصة تيتان كانت شايلة في رحلتها ٥ أشخاص فقط

كل واحد فيهم دافع ربع مليون دولار 

علشان يتفرج على حطام سفينة التايتانك 

والأشخاص دول على درجة كبيرة من الأهمية وهما 

الملياردير هيميش هاردينج المستكشف وصاحب الأرقام القياسية 

واللي بيعيش في الإمارات وبيرأس شركة 

Action aviation لسمسرة الطائرات إسمها 

وهاردينج عنده أرقام قياسية كتير ففي ٢٠١٩ 

كان من ضمن طاقم طيران حطم الرقم القياسي لأسرع طواف حول العالم

وفي سنة ٢٠٢٠ كان من أوائل الناس اللي غطسوا 

في منظقة تشالنجر في المحيط الهادي 

واللي تعتبر أعمق نقطة في المحيط 

وفي ٢٠٢٢ طلع في رحلة للفضاء مع شركة blue origin

ده غير انه حطم الرقم القياسي كأكبر شخص يصل للقطب الجنوبي في ٢٠١٦

وبعدها أخد ابنه معاه في رحلة للقطب الجنوبي 

وبقى ابنه أصغر شخص يصل للمنطقة دي وعمره ١٢ سنة

كمان كان على متن الغواصة 

رجل الأعمال البريطاني الباكستاني شاهزاده داود ٤٨ سنة

وابنه سليمان داوود ١٩ سنة 

وعائلة داوود عائلة من أغنى عائلات باكستان 

وتمتلك شركات تعمل في الطاقة والبتروكيماويات

وتكنولوجيا المعلومات والزراعة 

كمان كان على متن الغواصة

القبطان الفرنسي بول هنري نارجوليه صاحب ال ٧٧ سنة 

واللي كان قبطان في البحرية الفرنسية ل ٢٢ سنة من حياته 

غير إنه بيرأس مركز الأبحاث تحت الماء Rms titanic 

وهو وعيلته عندهم الحقوق الحصرية لانقاذ القطع الأثرية لتيتانيك

وأشرف بنفسه على انقاذ ٥٠٠٠ قطعة أثرية منها 

بالإضافة لـ الرئيس التنفيذي للشركة المالكة للغواصة أوشين غيت

 ستوكتون راش وقائد الغواصة واللي هو وشركته رفعوا قضية سنة ٢٠١٨ 

على مدير العمليات البحرية الاسكتلندي ديفيد لوكريدج

بسبب افشاؤه لأسرار الشركة واللي بعد كده عرفنا إن الأسرار دي 

كانت اعتراض لوكريدج على عدم جاهزية تيتان للغوص 

وعدم اختبارها بشكل كافي 

ووارد تعرض ركابها للخطر لو غاصت على أعماق بعيدة

والغريبة إنهم بدل ما يحاولوا تجهيز الغواصة بشكل أفضل 

رفدوه من الشغل ورفعوا عليه قضية كمان

 بدأت رحلة الغواصة يوم الأحد ١٨ يونيو الساعة ٤ الفجر 

والمفروض كانت ترجع الساعة ٣ العصر 

ولعند الساعة ٥ و ٤٠ دقيقة ما كانتش لسه ظهرت 

وده اللي خلى خفر السواحل الأمريكي والكندي 

وعدد كبير من الطيارات والسفن إنهم يبدأوا في رحلة للبحث عنها 

وخصوصًا إن الأوكسجين اللي في الغواصة يدوب يكفي ٩٦ ساعة بس 

وبدأوا يحطوا سيناريوهات كتير لاختفاءها 

منهم انها ممكن تكون اتعرضت لماس كهربائي 

عطل أنظمة الملاحة نفسها .. 

أو ممكن تكون علقت بحطام التيتانيك 

والغريب في الأمر إن الرسام والمنتج لمسلسل ذا سيمبسونز 

المسلسل اللي اتنشر عنه توقعاته للمستقبل 

مات جرينينج صاحب ذا سيمبسونز اختبر رحلة الغواصة قبل كده 

وقال انها فقدت الاتصال خلال رحلته أكتر من مرة 

والأغرب بقى من كل ده ، إن فيه حلقة من حلقات نفس المسلسل 

في سنة ٢٠٠٦ بتحكي عن غواصة بتنزل قاع المحيط الأطلسي 

لاستكشاف حطام سفينة .. وبتعلق بين الصخور 

وبيموت راكبها بسبب نقص الاوكسجين 

ممكن صدفة .. بس صدفة غريبة 

سفينة تايتانيك اللي أثير حواليها كلام عن لعنات كتير 

بتثبتلنا النهارده إنها ما شبعتش .. وزي ما مات عليها ١٥١٧ شخص

بيموت جنبها ب ٥٠٠ متر بس ٥ أشخاص في الغواصة تيتان 

معرضين لظاهرة تسمى الإنبجار أو the buckling 

ودي ظاهرة عكس الانفجار وحصلت بسبب الضغط الشديد على الغواصة من الخارج

واللي سبّبَّ انكماشها وبعدها تفجيرها 

خلال الأيام اللي فاتت العالم كله انقلب وجيوش اتحركت 

 بسبب ٥ أفراد دفعوا مبالغ مهولة باختيارهم 

علشان يخوضوا رحلة زي دي ولكن على الجانب الآخر

بيموت كل ٤ ثوان شخص واحد بسبب الجوع

اللي ما اختاروش .. ومحدش بيتكلم عنه 

ولا بيحاول ينقذه .. وأكن الإنقاذ للأثرياء فقط 

في النهاية بنقول ربنا يواسي عائلات المفقودين

ولكن .. كتير من الأموال اللي بتتوجه لجوانب 

غير مؤثرة من العالم .. لو لمرة واحدة اتوجهت

لمكانها الصح هتعيش البشرية في أمان 

إنت إيه رأيك بقى ؟ تفتكر حادث الغواصة تيتان مقصود ومدبر

ولا بمحض الصدفة ؟ ولا بسبب لعنة تايتانيك ؟