كيف تصطادين عريسًا ؟!

 

كيف تصطادين عريسًا ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

بيجاوب على سؤال مهم جدًا جدًا

سؤال بيشغل بنات وأمهات كتير .. بيشغلهم 

وعاملهم هسهس في دماغهم حتى لو أنكروا .. 

أحب أقولهم الإنكار مش هيفيدهم لأنه خلاص

كل الشباب بقت هارشة اللعبة .. حلقة النهارده مهمة 

مهمة جدًا بالنسبة لكوا .. كلامي للبنات المقبلات على الزواج 

وللأمهات ، فواحدة واحدة كده يلا تجهز في إيدها ورقة وقلم 

علشان تكتب ورايا المقادير… قصدي الخطوات 

طب الولاد .. هل يخرجوا من الفيديو ؟ لا طبعاً.. الفيديو ده مهم ليكوا برضه

لأنك لو عايز تهرش كل الألاعيب الجديدة فهتلاقيها هنا 

لو عايز تتجنب إنك تتشقط وتدبس وبين يوم وليلة تلاقيك متجوز .. اتفرج عليا 

وبرضه هات ورقة وقلم .. ويلا نديكوا سر الخلطة 

كيف تصطادين عريسًا ؟

سؤال في غاية الأهمية .. وله إجابات كتير مختلفة 

بتختلف على حسب المجتمع ، فلو حضرتك من أوروبا مثلاً

مش هتحتاجي فيديو زي ده .. دي فيه أفلام اتعملت واتصرف عليه ملايين بتجاوبه 

انما لو انتي بقى من أرجاء الوطن العربي الحبيب 

من الطبقة المتوسطة ..ده ان كان باقي منها حد لسه ؟

من كلية من الكليات العادية مش من كليات القمة 

فالفيديو ده اتعمل ليكي انتي بالذات .. طب ليه ..؟

هقولك .. والله لو انتي من طبقة غير المتوسطة ، الثرية مثلاً لا قدر الله

فالموضوع بالنسبة لك أسهل ما يمكن.. هتتجوزي إبن عمو فلان 

اللي هيشارك بابي في المصنع علشان تكبروا الملايين 

أو هتقابلي العريس على باب الطيارة وانتي رايحة تقضي 

الويك اند في تايلاند.. وبالتالي مفيش مشاكل من نوع 

الشبكة والمهر والشقة كام اوضة والكلام ده 

ودي حاجة بتبوظ ٩٠٪ من جوازات مصر 

وسبب وجيه لقلة العرسان في البلد .. 

دي أول نقطة .. تاني نقطة بقى .. لو انتي من كلية من كليات القمة

فدي فاليو زيادة بيدور عليها عرسان كتير النهارده

يعني دكتورة فهيدخلوا شركة في عيادة

صيدلانية هيفتحوا صيدلية .. مهندسة هيفتح مكتب هندسي 

يعني بيبقى ضمن المشروع ، انما بقى لو كلية اداب قسم مكتبات مثلاً

فاعذريني .. محدش بيشتري كتب النهارده ولا بتأكل عيش 

نيجي بقى لإجابة السؤال .. كيف تصطادين عريسًا ؟!

والحقيقة اننا بعد بحث وتدير وتحوير لقينا إن الإجابة تتلخص 

في كذا نقطة .. مش هيخرج براهم ..

الوسيلة الأولى : الأفراح والمناسبات 

والأفراح والمناسبات مش مجرد حدث وهيعدي كده ، 

لا ده بتبدأ التجهيزات له من بدري .. كل أم بتجهز بنتها إنها تظهر بأجمل شكل 

علشان تعلن للكل وتقول أنا عندي عروسة يا ولاد الحلال 

وكل بنت بتكون عندها فرصة إنها تشوف أكبر قدر من الشباب 

لابسين بدل في مكان واحد .. وتبدأ تختار ، ده أقصر مني .. ده تخين 

ده رفيع .. ده شيك .. ده سرسجي .. كده يعني 

وبرضه لنفس السبب بيكون عندها فرصة تسوق لامكانياتها 

كأنثى مصرية جاهزة للزواج بصورة أفضل

لابسة أحسن حاجة .. حاطة كمية ميك اب تكفي ٣ بنات 

وعندها فرصة ترقص .. رقص مبرر في سياق الفرح يعني

هو فيه أحسن من كده ؟

حاجة كده زي ما تكون نفسك تلعب كورة 

فتلاقي سمسار لاعيبة معدي وانت جاهز بالجزمة والشراب والشنكار 

وواقف تنطق الكورة في وسط الشارع 

والطريقة دي يا جماعة معترف بيها من سنين فبتلاقي وانت في عز الفرح

وبين صحابك فيه ست قاعدة في ركن مركزة مع كل الشباب

 وماسكة ورقة وقلم وبتعمل تقييم عام.. 

وكل ما بنتها تيجي تقعد جنبها تزغدها تقوم ترقص 

يعني يجوا فرح بنت عمها ويخرجوا بايديهم فاضية 

موسم صيد الغزلان على أرض الواقع 

وعلى الجانب الآخر هتلاقي ام برضه بتدور لابنها على عروسة

ولو للحظة اتقابلت عيون ام العروسة اللي بتصطاد

وام العريس اللي بتدور وتستكشف هيحصل نصيب 

الأفراح طريقة مجربة وعمرها ما خيبت 

ده بالنسبة للأفراح .. طب هل هي الوسيلة الوحيدة 

أو المناسبة الوحيدة اللي ممكن يتم من خلالها صيد العرسان 

لأ خالص .. ده ده الدارج بين الناس بس .. 

لكن هتلاقي وسط المهتمين بالأفراح ومهتمين بالصد منها 

فيه ناس واعية ، دول اللي بصحيح يتقال عليهم معلمين 

دول اللي بيصطادوا من المياتم 

الست اللي بتختار عروسة لإبنها من العزا 

دي عارفة هي بتعمل إيه كويس 

والمفروض تمسك منصب قيادي في الدولة 

دي ست فاهمة المعايير كويس جداً جداً

عارفة إن الأفراح دي نصها مضروب 

زيها زي الفلاتر .. وعارفة إن اللي باينة إنها حلوة في الفرح دي 

٣٠ ٪ ميك اب ، ٤٠ ٪ بوش أب وحاجات للحاجات 

و ٣٠ ٪ ابتسامة مرتبطة بالمناسبة .. ده فرح يا جماعة

انما بقى اللي رايحة تحضر عزا .. 

لابسة أسود في أسود وضاربة بوز 

وحاطة لوشن وكريم وشوية كحل وروج خفيف ..

لأن مفيش واحدة ما بتحطش ميك أب خالص 

فاللي في وسط الظروف دي كلها بتبان حلوة 

 في العزا .. هتبقى صاروخ في الفرح

ودي اللي بيسموها صيد ثمين 

الوسيلة الثانية : التدين المفاجيء

والطريقة دي برضه مجربة وسهلة جدًا .. (يمسك ورقة وقلم ويكتب)

 أولاً نحذف كل صور الإنستاجرام ، ثانياً نتبرع بالدولاب بمشتقاته 

لبنوتة أقصر ١٠ سم وأرفع ١٠ كيلو .. لأن اللبس اللي بتلبسيه ده 

لبس أطفال يا ماما .. ثالثًا ننزل الموسكي ، محل أميرة بحجابي 

نشتري بقى اسدالات وعبايات واسعة وطرح طويلة 

ومصلية ملونة ومصحف ومبخرة 

تلاقي واحدة لمدة 30 سنة من حياتها مقضياها مهرجانات 

وساحل وبتعقب ليل نهار ع التيك توك 

واول ما تكسر التلاتين ولسه ما حصلش نصيب 

اكنها عرفت ان فيه دين لأول مرة

واللي كانت مالية البيت صويت وزعيق

ومزيكا شعبي لحمو بيكا .. بدأت تتكلم بصوت هادي

وتمشي على طراطيف صوابعها أكنها طايرة ..

وبدلت الاغاني والمهرجانات بأغاني دينية لماهر زين 

وبعدين لحلقات عمرو خالد ، ومصطفى حسني ..

وبدأت تبدل كلمات زي فشخ ، وبيس و كيك 

ل تبارك الله و بفضل الله .. ونعم بالله يا ستي 

يهدي من يشاء ويضل من يشاء

وتلاقي جدول أعمالها اتغير تمامًا 

بعد ما كان من كافيه لجيم لساونا للكوافيرة

بقى يومها متقسم لدروس في الجامع بقى واعمال خيرية لا حصر لها 

وتلاقي امها في الراحة والجاية تقول بعلو صوتها 

ده بنتي ما بتسيبش فرض.. 

ربنا يهديها يا حاجة .. بس هو ايه سبب التحول المفاجئ ده 

عندها حد قريب منها مات على معصية مثلاً

طب جالها هاتف أو رؤية وانشرح صدرها 

ايه الغرض يعني ..؟ تقولك هو التدين كمان بقى له غرض

ده كله لله .. وهي ما بتعملش حاجة من دول لله 

ده فخ يا مغفل .. فخ .. مجرد ما تصطادك بحجة الدين 

هتظهر على حقيقتها ، وهتبدأ تاخد نفس الخطوات بس بالعكس 

الخطب الدينية هتتحول لأغاني ماهر زين .. وبعدين 

مهرجانات والهدوم هتضيق واحدة واحدة وهتكلم اللي اتبرعتلها 

بمحتويات دولابها ترجعه .. وتزود عليه اتنين كاش مايوه 

والانستاجرام هيرجع لوضعه الطبيعي 

طبعاً احنا نتمنى العكس وانها تكون اهتدت فعلاً اواتهدت ..

 الاتنين واحد في حالتها ، علشان محدش يتهمنا بحاجة كده ولا كده 

بس عن تجربة ، ده بيحصل كتير جدًا ووسيلة من وسايل الصيد 

زي ما أحياناً الدقن بتكون وسيلة من وسايل الصيد برضه بالنسبة للراجل

المهم إن الطريقة دي مضمونة.. لأن من أهم الحاجات

 اللي الشاب بيختار بيهم شريكة حياته دينها. واخلاقها 

الفخ بقى يا صاحبي أن يكون ده تدين مؤقت زي ما قولنا بغرض الجواز 

وبعد الجواز.. تيجي تدور على دينها اللي بتعاملك بيها 

تلاقي دينك انت.. (تيت) 

الوسيلة الثالثة : أعمال وأسحار 

والوسيلة دي مجربة من القرون الوسطى وعلى مدار التاريخ

كانت في الصدارة وهتفضل ليوم القيامة في الصدارة

تلاقي شاب محترم وخريج جامعي ، وعنده وظيفة وشقة ودنيته زي الفل

لا ووسيم.. وهوب يا حبة عيني يقع على وشه 

وتلاقيه واقع في واحدة لا مال ولا جمال ولا دين 

ولا صحة ولا ستر ولا عافية .. دي لو بتدعي على نفسها كل يوم 

مش هيبقى حالها كده .. ولا متعلمة حتى .. فيها العبر 

طب إزاي ؟ .. يقولك سبحان الله يا أخي 

ده النصيب انت هتعترض .. ده الحب بيصنع المعجزات

دي الأعمال السفلية هي اللي بتصنع المعجزات يا صاحبي 

مش الحب .. ما نجيلاكش في حب .. 

لما تيجي بقى تعمل مقارنة من المقارنات اللي أحيانا بتتعمل 

وتشوف هو اتجوزها على ايه.. مالها مثلاََ.. لا مديونين 

لطوبا الأرض وعليها شيكات هي وأمها 

طب جمالها مثلا.. لا شبه حمدي الميرغني 

يمكن شده فيها خفة دمها.. لا برضه دمها اتقل من كابتن شوبير

يمكن ثقافتها .. دي يا ابني ما تعرفش ان فيه ناس عايشة 

بره شارعهم .. فاكرة ان هي الدنيا عبارة عن بيتهم وجيرانهم بس 

طب يمكن بتعمل خير وترميها البحر .. 

لا هي بتعمل اعمال وتدفنها في الجبانة ..

بعد كم الأسئلة دي .. ما ترجعش تقولي تاني الحب .. 

انت شخصيًا لو سألت العريس نفسه السؤال ده

هيقولك مش عارف .. يعني بتخيل العريس بعد شهر العسل 

عسل ؟ دي عايزة فترة نقاهة في مصحة 

المهم بتخيل العريس في الوقت ده خلف القضبان 

والمذيعة بتاعت من الجاني بتسأله .. 

إيه اللي خلاك تعمل في نفسك كده ..؟

 مش عارف ان الجريمة لا تفيد .. 

أقسم بالله هيقولك مش عارف .. أنا كنت حاسس

اني مضروب على دماغي .. وحد مغمي عينيا 

هي دي أعراض السفلي .. مش انت اللي بتتحكم في نفسك 

ده الجن اللي مسخراه هو اللي سايق

ده عمل يا صاحبي.. عمل سفلي 

والطريقة دي معتمدة على ثوابت معروفة من قديم الأذل

يا اما تاخد أترك من حد من جوه البيت 

يا اما تعرف اسم امك وترش قدام بيتكوا ماية مقري عليها

والحالتين اسهل ما يمكن.. فاحذر من اتنين في حياتك 

لا تلاتة الخياطة والمكوجي والحلاق ..

واي حد بيدخل البيت غريب.. ولا تاكل عند حد 

ولا تشرب مكان بوق حد لأن دي حاجة مقرفة بصراحة

وأمشي دايمًا في جيبك كتيب حصن المسلم 

وما تخطيش بره البيت الا بعد ما ترش مياه بملح

وربنا يسترها عليك يا صاحبي 

الوسيلة الرابعة : العمل عبادة 

ودي برضه طريقة مجربة وناجحة

 وبيشتكي منها كل أصحاب المصالح والشركات

تلاقي واحدة خريجة سنة 1900 وقاعدة في البيت 

لا عمرها نزلت شغل ولا بتفكر تنزل من بيتها أساسًا

طموحها في الحياة إنها تاكل وتتفرج على مسلسل كوري 

وتتخمد تنام وتصحى براحتها .. لعند سن التلاتين

سن الخطر ، واول ما تحس نفسها بتقرب من اللاشيء 

وتحلم انها في نفق مظلم ، واخره نور قطر هيدهسها .

تعرف ان ده قطر الجواز .. واللي ممكن يعني يفوتها 

 من غير ما يدهسها يغير ملامحها

فجأة تلاقيها صاحية بدري ، بتعمل سي ڤي 

طبعاً بتملاه بخبرات خريجة إمبارح .. لأنها زيرو خبرة

ودايرة تلف على شركات العالم العربي كله

وبدأ يظهر في صوتها نبرة الطموح وتحقيق الذات 

 واني لازم اشتغل واعتمد على نفسي 

وكلام كبير كده.. لما تيجي تقيسه على ارض الواقع 

هتلاقي انه مجرد قناع لان طموح ايه وانت واقفة في عيادة 

محدش بيدخلها غير الدكتور واحياناً ما بيجيش 

يعني ممكن تترقي في شغلك ده توصلي لفين 

هتكوني تمرجي مثلاً ، ولا هتشاركي الدكتور في العيادة

فيه حاجة مش منطقية في الموضوع

وتفضل بقى تتنطط من شغل للتاني للتالت 

لعند ما تلاقي عدلها داخل عليها كزبون 

تعلقه وتعمل نفسها هو اللي بيعلقها كالعادة 

الطريقة دي ناجحة لدرجة ان فيه احيانا عرسان 

بيختاروا واحدة بتاعت شغل علشان يقدروا يساعدوهم 

ده فخ يا أهبل وعلشان نيتك السو دي هتقع فيه

 ده مجرد ما هيتقري فاتحتها هتتصل بالدكتور تسبله

وتعمله بلوك وتطلع القطط الفاطسة في الشغل 

وتيجي تسألها عن الأمل والطموح 

تقولك بيجي ويروح .. هو انا كنت هبقى ايه يعني ؟

طب ما تقولي لنفسك ولا خلاص اخدتي غرضك

ده فيه شركات بتقفل بسبب ان الموظفات المحترمات 

كان غرضهم من الشغل تصطاد عريس 

خدت العريس ، تتف ع الشغل 

اختلفت الطرق والوسائل والفخ واحد .. 

نصيبك هيصيبك هيصيبك يا صاحبي 

بس خليك فاكر الكلمتين دول كويس 

مفيش راجل بيصطاد ست .. الست هي اللي بتوهم الراجل

انها فريسة .. لكن انت الفريسة .. 

ياريت تكونوا استفدتوا وكتبتوا ورايا 

ونتقابل في الأفراح وبكده تكون انتهت حلقتنا النهارده عن 

كيف تصطادين عريسًا بدون روت أحبتي في الله  

وما تنسوش تعملوا لنا لايك وشير .. ولو مريتوا بتجربة شبه 

التجارب اللي اتكلمنا عليها .. قولوا لنا في الكومنتات