ما بعد الخطوبة .. جنة تتحول إلى سجن

ما بعد الخطوبة .. جنة تتحول إلى سجن

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن مرحلة كل شاب وفتاة في مصر بيمروا بيها 

وبتاخد من عمرهم طاقة ومجهود كبير 

وخصوصاً إنهم بيكونوا في المرحلة دي مش على طبيعتهم

فبتحتاج منهم قدرات خاصة ، من التمثيل طبعاً

فترة ما بعد الخطوبة .. هي فترة المفروض إنها أحلى فترة في حياتك 

كشاب أو كبنت .. فترة المفروض إنها مليانة بالورد 

والدباديب والكلام الحلو .. فترة اتعملت للتعارف وإننا كطرفين مخطوبين

نقرب من بعض أكتر ونفهم بعض أكتر 

ولكن اللي بيحصل في الفترة دي العكس تمامًا

اللي بيحصل إننا بنبعد عن بعض أكتر 

وبنوري بعض الصفات اللي مش موجودة فينا 

كنوع من أنواع الإغراء ، والتعشيم بزيادة قوي

إن حياتنا الزوجية مع بعض هتكون مليانة رومانسية

وإن خناقاتنا مع بعض لن تتعدي ضرب بعض بالمخدات اللي بتطلع ريش دي

وما بنجيبش سيرة النكد اللي داخلين عليه خالص 

بمبدأ إنه كده كده هيحصل فخلي النكد لوقته .. والكدب لوقته 

فترة ما بعد الخطوبة في مصر .. المفروض يتحطلها بند 

من بنود قانون العقوبات كجريمة نصب وتدليس وغش تجاري

ويتحطلها أقصى عقوبة لأنه بناءًا عليها بتتبني حياة 

حياة منيلة بنيلة وكئيبة بيحصل فيها عكس كل اللي اتقال

ومرحلة ما بعد الخطوبة بتمر مراحل زيها زي مراحل كتير 

في حياة الإنسان .. مراحل سواء إنت من أي طبقة 

أو من أي فئة من فئات المجتمع

مادام إنت مصري أو عربي هتمر بالمراحل دي

 

المرحلة الأولى : وعود كذابة

مرحلة الخطوبة زي ما قولنا من أحلى وأمتع المراحل

 اللي بيمر بيها الشاب او البنت

فترة بتطلع فيها كل المشاعر.. الكدب .. كدب بيّن

وبنحس فيها اننا طايرين وهنقع على جدور رقابينا 

وبتبدأ مراحل الخطوبة مباشرةً من بعد ما تقروا الفاتحة

وتلبسوا بعض الدبل ، كمية وعود يا مؤمن مهولة 

ده أنا هخليكي أسعد واحدة في الدنيا

ده أنا هخليك أسعد راجل في الدنيا 

هساعدك في شغل البيت .. هجيبلك الفطار لعند السرير 

هقف معاك في كل ضيقة .. وعش العصفورة يكفينا

ولقمة عيش تغدينا … كدب كدب .. عمال على بطال 

في الوقت ده هما الاتنين بيكونوا مبهورين ببعض 

وشايفين بعض أجمل خلق الله .. 

هو شايفها أجمل واحدة في الدنيا وده حقه 

لأنها بتقابله دايمًا بأشيك حاجة ، ودايمًا حاطة ميك أب

ودايمًا صوتها واطي ، وبتاكل وبوقها مقفول ، تحسها ملاك 

وهي بتكون شايفاه أجمل وأحن حد في الدنيا وده برضه حقها

لأنه دايمًا لابس اللي ع الحبل.. حاطط برفيوم جايب اخر الشارع

ودايمًا كريم واللي في إيده مش ليه .. ونحنوح .. نحنوح قوي 

وقاعد بقى يديها في حقن .. كلام حلو ورومانسي .. ليها حق

المرحلة دي مفيش حد بيكون على طبيعته .. 

واللي بمجرد ما يتجوزوا يتصدموا ويبدأوا يسألوا نفسهم

هي راحت فين البنت الجميلة الرقيقة أم صوت هادي اللي خطبتها

طبعاً لما يدخل البيت يلاقيها مكهربا شعرها ولابسة 

٣٠ عباية فوق بعض وكلاسين الدنيا والأخرة 

وهي برضه بتسأل نفسها هو فين الراجل الحنين الكريم اللي حبيته 

طبعاً لما بتتفاجئ بواحد بيحاسبها على بوق الماية راح فين 

وقاعدلها طول اليوم في البيت بالفانلة والكالسون 

وريحة البيرفيوم اللي كانت جايبة اخر الشارع 

اتحولت لريحة شراباته اللي قالعها في كل حتة 

ويبدأوا بقى يتصدموا في بعض وبيكون عندهم خيار من اتنين 

يا اما يكملوا ويرضوا بالأمر الواقع ويسامحوا بعض في الكذب اللي حصل 

يا اما ينفصلوا ويبدأوا مع حد جديد من أول وجديد 

واللي ع الأغلب بيختاروا يكملوا مع بعض .. ليه بقى ؟

لأنها كلها كده .. السوق كله مضروب فاللي هتلاقيه في ده

هو اللي هتلاقيه في غيره .. وهكذا ..

مرحلة الوعود الكذابة قد ما هي حاجة غلط وما تصحش 

وبتبني العلاقة على كدب وحياة كاملة بتبدأ بسبب الكدب ده 

إلا إنها بتعلمنا .. بتعلمنا نسامح ، وبتنسينا إمبارح 

وبتعلمنا نفكر دايمًا في أيامنا اللي جاية .. 

مرحلة الوعود الكذابة بتعلمنا أهم درس في حياتنا 

إن شجرة العشم دايمًا دايمًا .. بتطرح خوازيق 

المرحلة الثانية : هدايا متوقعة 

بعد ما نهبط من كتر الوعود اللي بنوعدها لبعض في أول مراحل الخطوبة 

تيجي المرحلة اللي بعدها على طول .. مرحلة الهدايا 

المرحلة اللي بتحاول فيها على قد ما تقدر تثبت لخطيبتك 

ولأهلها إنك راجل كريم وما تستخسرش في بنتهم حاجة

بنبدأ نتعرف على ذوق بعض .. ونتعرف على هو بيحب إيه أجيبهوله 

وهي بتحب إيه أجيبهولها .. ولما بيعرف كل واحد فينا بيحب إيه 

بننزل نعمل شوبيج ونشتري أول هدايا الخطوبة 

اللي هي زي ما احنا عارفين .. للراجل محفظة جلد أو ساعة أو بيرفيوم

حتى لو هو ما بيشيلش محافظ ولا بيلبس ساعات 

ولو حتى كان عنده حساسية من البرفيوم .. لكن هو كده 

وللبنت موبايل جديد .. مع إنها معاها موبايل .. بس إزاي ؟

ضروري تشتريلها موبايل جديد وده له حكمة

تاني يوم بعد مكالمة الوعود الطويلة يوم الخطوبة

تلاقي خطيبك داخل عليكي بموبايل جديد

لغرض ما في نفسه.. أول حاجة يعملك كل حساباتك الجديدة بنفسه

طبعًا وانتي فاكرة هتفضل كل حاجة على حالها 

استحالة.. فيس بوك جديد او في حالة الجديد 

بعد ما تمسحي كل الولاد اللي عليه 

واتس اب برقم جديد هيكون طبعاََ متسجل بإسمه 

انستاجرام جديد ، أو يمسح كل حاجة فيه ويرجعه زيرو

ويحاوط عليكي كده ويحاوطك من كل حتة 

ويربط كل حساباتك بالكامل بأكاونت الجيميل عنده 

وتلاقي نفسك متراقبة ٢٤ ساعة 

علقتي هنا ليه ؟ عملتي لايك لده ليه ؟

مين علاء ده اللي باعتلك ..؟ دي آلاء .. ولو مين برضه ؟

وفجأة تكتشفي إن الهدية ماكانتش لله .. ده كان فخ 

سجن إنت اللي بنيتي جدرانه بإيدك اللي تتقطع 

ولما تعترضي يقولك .. انتي دلوقت مخطوبة 

وداخلة على حياة جديدة .. وحياة جديدة يعني موبايل جديد

يعني حسابات جديدة .. يعني دايرة معارف جديدة 

وهسيبلك الحرية فيها كاملة مكملة ،

 وليكي تختاري من الخيارات التالية 

أمي واخواتي وخالاتي وعماتي .. 

ليكي الحق تضيفيهم كلهم على حسابك 

شوفتي بقى إني سايبك على راحتك أهوه .. 

أيوه فعلاً إنتي ظالماه .. 

طيب مرحلة الهدايا المتوقعة دي بتكون دايمًا مرتبطة 

بمرحلة بنسميها إطعم الفم تستحي العين 

مضايقك ومضيق عليكي ومكرهك في عيشتك

 إعزميه ع العشا واعمليله كل الأكل اللي بيحبه .. 

طبعاً ما تنسيش تقوليله انك انتي اللي طابخاه

مع انه شايف الدليفري وهو طالع بيه .. بس مش مشكلة 

وازنقيه في وسط الأكل .. بشرط وجود أمك جمبك

 واجهيه انه حابسك مش عايزك تخرجي

وأمك ترد تقول حقه ما هو خطيبك .. 

طب ما تخرجها انت مرة في الأسبوع 

ادي ألف جنيه طاروا كل أسبوع .. 

ده يا ماما مش عاجبه لبسي بيقول عليه ضيق 

حقه مش خطيبك .. طب ما تشتريلها لبس مناسب على ذوقك 

يا خراب بيتك .. تروح تتعشى عشوة ب ٣٠٠ جنيه 

تلاقي نفسك متدبس في الافات يا ابن عمي

تستاهل ما انت اللي همك على بطنك برضه 

المهم إن مرحلة الهدايا المتوقعة دي بتاخد وقت 

من بعد أول ليلة من الخطوبة اللي فيها الوعود الكدابة دي .. فاكرينها ؟

لعند بالكتير ٣ شهور ، وتبدأ الهدايا والعزومات تاخد روتين ثابت

ويبقى مكانها متعلم عليه في النتيجة كده بقلم 

 في المناسبات فقط ، يعني عيد أم عيد صغير .. عيد كبير .. عيد تحرير سينا 

وبرضه هتتعشى وتجيب هدية أضعاف تمن العشا

بس المهم انه ما بقاش كل أسبوع 

مرحلة الهدايا المتوقعة ، بتعلمنا حاجات كتير 

محدش هيأكلك إلا لغرض ولحكمة هتتفاجئ بيها وانت بتاكل 

 ولو ما دفعتش في طبق ما تاكلش فيه يا ابن عمي

وكمان بتعلمنا إنه لكل شيء سبب ، ومحدش هيجيبلك هدية 

إلا لو عايز من وراها حاجة ، ومش هيبسط الإنسان غير نفسه 

و بنفسه ولنفسه .. غير كده شكليات 

المرحلة الثالثة : أوفر تايم 

خلاص فرهدنا بعض .. وعود وقصص وحواديت 

وهدايا وعزومات .. نيجي بقى للإستقرار اللي بيحصل بين كل المخطوبين

بعد أول ٣ شهور بتبدأ مرحلة الخطوبة تاخد شكل 

علاقة مدير المبيعات بفريق المبيعات بالظبط

يعني تقارير في تقارير وحضور وانصراف وزيارات 

ومتابعات و جرد وخلافه .. علاقة تبان لطيفة 

لكن بيحكمها روتين يخوف ، بيحكمها تارجت 

وديدلاين ، بيحكمها خصومات وجزاءات وحاجة تخليك عايز تسيب الشغلانة

وتقلع الدبلة تطوحها في أقرب سلة زبالة

وفي المرحلة دي هتحس ان اليوم كبر فجأة 

انت شخصيًا كبرت وعجزت.. وبعد ما كنت بتنزل شغلك 

وترجع تاكل وتخرج وتنام.. بقت حياتك عبارة عن أوفر تايم

اوفر تايم في الشغل علشان تكفي الجمعيات وطلبات الجواز

اللي داخل عليك .. بيقرب وانت بتحاول تهرب مش عارف

اوفر تايم علشان تكفي خروجاتها ومصاريفها 

أوفر تايم في اليوم عموما اللي بعد ما كان بيخلص 

الساعة 9 بليل.. وتروح تاخد دوشك الجميل 

وتتفرجلك على حاجة وتطفح وتنام

 بقى بيبدأ شيفت تاني بعد 12 ومكالمات للصبح 

ويا ويلك يا سواد ليلك لو نمت غصب عنك 

مش انت مطبق بقالك أسبوع .. أوعى تنام 

اشرب قهوة .. شربت ؟ خد تامول .. أخدت ؟ 

افتكر الخناقة اللي هتطرشق في وشك بكره اول ما تصحى 

أه .. كده فوقت .. برافو عليك

في المرحلة دي هتلاقوا الف سبب للخناق 

من كتر ما هي كاتمة على نفسك ومحاوطاك من كل حتة 

مش انت كنت عامل دكر ومحاوطها من كل حتة 

ده أونلاين يا مغفل .. سيطرة وهمية 

هي بقى دلوقت وبعد ٦ شهور سيطرت وحاوطتك 

من كل حتة .. عارفة مواعيد شغلك واجازاتك 

عارفة كل معارفك وكل الأماكن اللي ممكن تهرب منها ليها 

معاها أرقام كل عيلتك لو قفلت موبايلك .. ده لو تجرأت 

هوب تلاقي نفسك يا ولداه مزنوق .. ومش عارف تفلفص 

فار دخل المصيدة ، متعشم في حتة جبنة

واتقفل عليه ودخل فخ من أفخاخ فيلم saw

وتلاقي نفسك مزنوق بين بصمة الشغل والحضور والانصراف

وبصمة خطيبتك.. والتقارير اللي بتقدمهالها كل يوم عن تفاصيل يومك

واللي لو حصل وسقطت تفصيلة وعرفتها من بره 

وطبعاً هتعرف هتعرف يبقى انت أكيد بتكدب 

ومادام بتكدب يبقى بتعمل حاجة غلط 

المرحلة دي بتخسرك كتير قوي يا صاحبي 

صحابك وخروجاتك وقاعدة القهوة 

حجز الكورة ، وشوية البلاي ستيشن

بتخسرك صحتك وراحتك النفسية وباقتك اللي بقيت بتجددها كل يوم ويوم

بس زي ما المرحلة دي بتخسرك حاجات كتير 

كمان بتعلمك .. بتعلمك إن الجواز إنضباط واللي جاي هيبقى أسوأ وأسود

فتبقى مهيأ نفسيًا وعصبياً ومجهز نفسك كويس .. شد حيلك

المرحلة الرابعة : غيرة غير مبررة

خلاص اتعودت على الضغطة 

ومريت بكل المراحل اللي فاتت بسلام

أهلاً بيك في مىحلة أسوأ من كل اللي فات 

جرب نار الغيرة .. جرب كده 

في المرحلة دي بتبدأ البنت تحاول تخلي الشاب

يغير عليها علشان تحس انها غالية ، 

وكمان علشان تحسسه انها ليها سوق 

فتبدأ تختلق أكاذيب ، زي مش ابن عمو فلان وصلني النهارده 

بالعربية ، وابن عمو فلان ده ، ده في تالتة ابتدائي 

وعنده عربية لعبة أبوه جابهاله من الامارات 

مش فلانة قابلتني وقالتلي يا خسارة اتخطبتي 

ده انا كنت عايز أخدك لابني .. وده وهم يا صاحبي 

الست دي ما بتخلفش وبتجري على الشيوخ بقالها سنين 

في المرحلة دي بتلاقي نفسك مش طايق الهوا اللي بتتنفسه

وبتحس انك متقرطس من كتر ما انت داير في ساقية ومحدش مقدر

فتلاقي نفسك بتغير من حاجات عبيطة 

طبعًا ده عن قصد .. هي السبب فيه 

وبتلاقي نفسك بتزعق وتحرق دمك لأتفه الأسباب ،أهو أي تنفيسة وخلاص

أي حاجة تثبت بيها رجولتك يعني مش أكتر

زي مثلاََ بيت خالتها.. ومش عايزها تروح هناك

وتبدأ تحقق معاها بعد المشوار الأسود ده 

كنتي لابسة ايه ؟ مين ضحك مين هزر ؟ 

مين ؟ مين ؟ مين ؟ طب جابوا سيرتي ؟

واللي مش مفهوم بقى.. ان البنت دي بقالها 25 سنة قبلك 

وقبل ما حضرتك تظهر في حياتها ودي خالتها ودول ولاد خالتها

وبتزورهم بقالها سنين وكانوا قدامها لو حد فيهم عايزها لنفسه كان قال 

ببساطة كده لو كان فيها الخير.. ما كان رماها الطير 

يا صاحبي لو فيها الطمع ما كانش حد سابهالك

لكن هما ما صدقوا حد شال عنهم الحرج 

ومش بس انت اللي بتغير عليها غيرة مش مبررة 

لا هي كمان بتلاقيها بتغير من حاجات غريبة 

زي مثلاً البنات اللي بيعملولك لايك على صورة 

ولا على بوست على فيس بوك او انستجرام 

ولو.. ده لو ربنا كارمك بصفحة ريتشها عالي

فنهارك أسود.. واعمل حسابك على خناقة كل يوم 

مرحلة الغيرة الغير مبررة دي برضه بتعلمنا حاجات كتير 

زي إننا ما نصدقش كل اللي يتقالنا 

كما ما نبالغش في قيمة الأشياء 

يعني نعقل ونوزن كل حاجة بميزانها الطبيعي 

ما ينفعش نحط كيلو طماطم على ميزان دهب حساس 

كمان ما ينفعش نصدق إن خطيبتك ولا خطيبك 

كل الناس بتراقبه وبتجري وراه ونفسهم فيه 

إلا لو كان عليه حكم ودول مخبرين 

المرحلة دي بتعلمنا إن الغيرة مش دليل للحب 

على قد ما هي دليل واشارة كبيرة على جلطة 

جاية قبل اوانها .. أو بداية ضغط وسكر 

المرحلة الخامسة : نسيان كل ما سبق 

والمرحلة دي هي الكام يوم بالكتير الشهر اللي قبل الجواز 

الكلام فيهم بيقل.. وبيتحول من كلام حب لكلام عن الصنايعية 

واطقم الجيلي والمصاريف وقرفها 

وبتموت كل الغيرة والمشاعر اللي تحسسك انك غالي 

وبيظهر مكانها مشاعر الكام بكام ؟ وبتتحول يا ولداه 

لراجل بيفتح مشروع وبيجهز نفسه للافتتاح 

في المرحلة المنيلة دي.. كل حاجة بتظهر على حقيقتها 

بتقابلوا بعض بعد قاعدة مع الصنايعية كل يوم 

ولف على محلات مصر علشان تجيب طقم حلل اقل اتنين جنيه

فبتتقابلوا ده لو حصل بشكل مختلف 

يعني بيحل مكان البيرفيوم روايح العرق 

بيحل مكان الورد.. فواتير وايصالات 

في النهاية.. محدش بياخد غير نصيبه 

ومفيش حلاوة من غير نار.. ومفيش جواز من غير خطوبة 

ومفيش داعي للاتنين أصلاً في الظروف المنيلة دي

لكن المرحلة دي بتقوينا أكتر من كل اللي فات

وبتخلينا نعرف اننا نقدر نكمل بدليل 

اننا مرينا بكل اللي فات وما حصلناش حاجة 

صحيح جالنا شوية مشاكل وعقد نفسية 

هتحتاج علاج دوري مع طبيب نفسي 

لكن عدينا ، وعدينا سلام .. 

وبكده بالمرحلة دي نكون خلصنا مقالنا النهارده 

لو عندك تجربة شبه التجارب اللي اتكلمنا عليها في مقالنا

ياريت تقولنا في الكومنتات

وما تنساش تشترك في المدونة علشان يوصلك كل جديد