" اسفكسيا الغرق ووفاة نجل الفنان حسن يوسف "

تخيل انك ممكن تفقد الذاكرة بعد ما تنجو من الغرق 

وتفوق تلاقي نفسك مش عارف انت مين ولا انت فين ؟

هو ده اللي حصل بالظبط لعبد الله نجل الفنان حسن يوسف 

والفنانة شمس البارودي ، واللي انتشر خبر وفاته 

بالغرق في الساحل الشمالي خلال الساعات اللي فاتت 

واللي بعد ما اختفى في البحر وقدروا يطلعوه ويفوقوه 

بقى مش فاكر هو مين ولا عارف هو فين  

في حالة كانت غريبة لكتير من رواد السوشيال ميديا

واللي من ساعة انتشار الخبر وهما كلهم بيدوروا على كلمة واحدة

اسفكسيا الغرق ، سبب وفاة عبد الله حسن يوسف 

واللي خلته لدقايق فاقد الذاكرة قبل وفاته 

اسفكسيا الغرق هي حالة من الحالات اللي بتحصل 

بسبب حرمان الجسم من الأوكسجين لفترة طويلة 

واللي في حالة الغرق بيحصل فيها إن المياه بتدخل للأحبال الصوتية

وبتصيب الحنجرة بالبلل والتشنج 

وبينتج عنها انكماش فوري للعضلات حول الحنجرة 

والرئتين بيتملوا بالمياه .. وبيفقد الجسم كل الاكسجين بتاعه 

وبيفضل محتفظ بثاني أكسيد الكربون

ودي حالة بتحصل لعدد كبير من اللي بيغرقوا 

بتوصل ل ٨٠٪ منهم تقريباً

فعلى حسب تقرير نشره موقع Mayo clinic

إن لما الجسم ما بيحصلش على ما يكفيه من الأوكسجين

بتدخل المياه للرئتين ، وبترتخي العضلات 

الموجودة في لسان المزمار ، ده غير إنه أملاح البحر 

بتقوم بسحب السوايل من الدورة الدموية للرئتين 

وبتقلل معدل البلازما في الدم وبناءًا عليه .. الموت 

إلا لو حد قدر يسعف الغريق في مدة تتراوح 

ما بين ٨ دقايق ل ١٢ دقيقة 

على عكس الغرق في المياه العذبة 

اللي بيتطلب التحرك بشكل أسرع 

وإنقاذ الغريق خلال ٥ دقايق بس 

ومن أعراض اسفكسيا الغرق ، تسارع في عملية التنفس 

السعال الشديد ، بحة في الصوت 

وفقدان القدرة على النطق ، تغيير لون الوجه 

ده غير العرض الأكثر غرابة .. فقدان الذاكرة 

واللي بيحصل بسبب إصابة أو ضرر بيحصل للدماغ 

وبيعمل حالة من حالات فقدان الذاكرة

إسمها فقدان الذاكرة العصبية 

واللي بتحصل لأسباب كتير من ضمنهم 

عدم وصول كمية كافية من الاكسجين للدماغ 

في حالة ضيق التنفس أو النوبات القلبية

أو التسمم بأول أكسيد الكربون 

وده اللي حصل بالظبط في حالة عبد الله حسن يوسف 

اللي فضل وقت طويل ما بيوصلش لجسمه أكسجين 

مع إحتفاظ الجسم بثاني أكسيد الكربون

واللي تسبب في تسمم الجسم 

في حالة تسمى بـ (فرط ثاني أكسيد الكربون)

فبيرتفع ضغط الدم ومعدل ضربات القلب بيزيد بشكل حاد 

وبيفرز الجسم هرمونات الكاتيكولامينات 

وهي هرمونات دورها الأساسي تحفيز الجسم على القتال أو الهروب

لما بيحس بخطر .. خطر الغرق أو عدم القدرة على التنفس 

واللي على عكس المطلوب من أي حد بيتعرض لحاجة زي دي 

إنه يكون هادي لحد ما يقدر يوصل لمساعدة 

اسفكسيا الغرق حالة شائعة جدًا وما ينفعش نتعامل معاها 

زي ما بنتعامل مع أي غريق 

فده لازم فورًا انقاذه .. لأن كل دقيقة بتمر عليه 

إن ما ماتش لا قدر الله بتسبب تلف في وظيفة من وظايف الجسم 

يعني لو نجى من الغرق هيكمل حياته فاقد الذاكرة