" الفطار في الشغل - قنبلة في نعش الدايت والكارير "
أوعى تفطر في الشغل .. لأن الفطار في الشغل
ممكن يدمر الدايت بتاعك ، والكارير نفسه
وجبة الفطار بتشكل 12٪ من احتياج جسمك للطاقة على مدار اليوم
لكن علشان تفطر فطار يوصلك للنسبة دي فانت محتاج شوية خطوات
أولهم زي ما قولنا ما تفطرش في الشغل
فبناءًا على دراسة نشرها موقع (فيسين) الألماني
إن الفطار له قواعد لازم نتبعها وأولهم عدم الاستعجال
واللي بيكون سمة أساسية للفطار بتاعنا في الشغل
وثانيًا البعد عن التليفون أو اللاب توب وده صعب ، خصوصًا في مكان شغلك
فلو انت موظف خايف على أكل عيشك
فحاول بقدر الإمكان تفطر في البيت
إنما بقى لو للأسف ما لحقتش الفطار واضطريت تفطر في المكتب
فلازم تعرف إن ده هيأثر على انتاجيتك
وكمان هيزود وزنك .. وكفيل يبوظ أي دايت .. ليه كل ده ؟
هقولك .. صحيح ممكن الفطار يكون عامل أساسي
لتوطيد العلاقات بينك وبين زمايلك في الشغل
لكنه قنبلة في نعش الدايت والكارير نفسه ..
فعلى حسب دراسة نشرها موقع بيزنس انسايدر
إن فيه شوية شروط للفطار في الشغل لو ماقدرتش تنفذهم
فربنا يعوض عليك ..
وأولهم تجنب الأكل أثناء الشغل .. يعني لو انت متعود
انك تفطر وانت بتشتغل في نفس الوقت
فده هيخليك تستهلك كميات أكبر من الأكل لا إرادياً
وهتكون عرضة للسمنة وهترتكب أخطاء في الشغل
مالهاش أول من آخر ..
تاني حاجة ، التقليل من تناول الكربوهيدرات زي العيش والمعجنات
واللي هيسحبوا الطاقة من الجسم تمامًا
وهتلاقي نفسك في نص اليوم بتنام
تالت حاجة تقليل السكريات واللي زيادتها هيخليك في حالة
من التشتت وعدم التركيز .. فهتزيد أخطاءك في شغلك
رابع حاجة .. عدم التأجيل .. يعني لو عايز تستفيد
من وجبة الفطار فلازم تاكل بعد أقل من ساعة
من بداية احساسك بالجوع .. لأن بعد كده
هتاكل بنهم أكبر ..
أحب اقولك بقى إن كل الشروط اللي فاتت دي
احنا بنعمل عكسها تمامًا في فطارنا في الشغل
وخصوصاً في مصر ومجتمعاتنا العربية
وقت الفطار في الشغل في العادة بيبدأ بسؤال تقليدي
هنفطر إيه ؟ ولحد ما حد يجاوب على السؤال ده
والفطار يوصل فعلاً بيكون مر وقت طويل
وطوال الوقت ده هيكون ذهنك مشتت بين الشغل
وبين انتظار الفطار .. ده غير النهم اللي اتكلمنا عليه
بسبب طول انتظارك لوجبة الفطار
تاني مشكلة إنه كالعادة الفطار المعروف بينا
كموظفين مصريين .. الفول والطعمية .. أو أحيانًا كشري
ودي كمية كربوهيدرات .. تسحب كل طاقتك
وتخليك بعد ساعة عايز تستأذن وتروح تنام ساعتين
وكل اللي فات ده هيزود وزنك
طب نعمل إيه ؟ ما نفطرش خالص أحسن
الحقيقة إن فيه كلام كتير في النقطة دي
وآراء بتقول إن الناس اللي ما بتفطرش
بيزيد وزنهم بنسبة أكبر .. لكن هل الكلام ده صحيح ؟
في دراسة عملتها جامعة موناش في ملبورن بأستراليا
من مجموعة باحثين وعلى رأسهم دكتورة فيلافيا سيكوتيني
إن الأمر راجع في النهاية لنوعية الفطار
وبعد دراسة على عدد كبير من الموظفين
قالت فيلافيا .. إن السعرات الحرارية هي هي السعرات الحرارية
أيًا كان وقت تناولها ..
وهنا بقى مربط الفرس .. هنفطر إيه ؟
وعلشان تتجنب السؤال ده .. أو تعرف تجاوب
بكلمة لأ وانت قلبك جامد
فالأفضل تخصص وقت لفطارك في البيت
ولو ما عرفتش فحاول تجيب فطار معاك
واللي لازم يحتوي على كربوهيدرات بنسبة بسيطة
وبروتين زي اللبن أو الزبادي .. ده هيديك طاقة
مناسبة ليوم شغل طويل .. وهتتجنب لمة الفول والكشري
وهتركز في شغلك ويمكن كمان تترقى ..
.jfif)
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..