الحسد في مصر !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الحسد ومش الحسد عمومًا كده في المطلق 

لا موضوعنا النهارده عن الحسد تحديدًا في مصر 

والحسد في مصر مختلف عن أي حتة تانية في العالم 

يعني نعرف ناس بتحسد بعضها لمجرد إنهم متفوقين أكتر منهم 

ناجحين في حياتهم في شغلهم .. خلفوا ، سافروا ، رجعوا من السفر

حاجات كتير ودوافع كتير ممكن تخلي إنسان يحسد التاني 

إلا إن الحسد في مصر له أبعاد تانية خالص 

يعني تلاقي جارك بيحسدك على ريحة شوربة الفراخ

اللي قالبة العمارة ، ويقول يااه هو فيه لسه ناس بتاكل فراخ 

وهما شوية رجول ما يستاهلوش 

تلاقي مثلاً جارتك بتحسدك على شوية كحل حطتيهم 

وانتي نازلة متكحولة على عينك ورايحة الشغل 

مش تقدر بقى إنك نازلة من بيتك ورايحة تشتغلي وهي نايمة جمب جوزها

لا دي تحسدك مرتين ، مرة ع الكحل ومرة ع الشغل 

تلاقي مثلاً زميلك في الجامعة بيحسدك على المادة اليتيمة اللي إنت مذاكرها

ويقول يا بختك ، ده إنت موس .. 

ولما تيجي في إمتحان مادة تانية مش عارف إسمها 

يقولك برضه يا بختك .. مش شايل هم حاجة 

طب أعمل إيه يا إبني ؟

الحسد كل الأديان السماوية حذرت منه 

وكل الناس بتشتكي منه ، حتى الأستاذ چورچ وسوف 

قال بيحسدوني لما بضحك ، وصدقني يا أبو وديع 

لو عيطت بدموع ، هيقولك يا بخته .. ده العياط ده نعمة من ربنا 

العياط بيريح القلب .. طب ياريتني أعيط 

بنتحسد على النومة والقومة والتخن والخسسان

والنجاح والفشل والنشاط والكسل 

وبنتحسد على اننا بنتحسد 

يقولك ، معنى انك تتحسد يبقى حد مركز معاك 

ودي حاجة في حد ذاتها تستاهل انك تتحسد عليها 

بنتحسد في مصر على العبادة والإلتزام 

وعلى البوظان والمشي البطال ، وبنتحسد لقربنا من بعض 

ولبعدنا عن الناس ، وبنتحسد لأهون وأتفه الأسباب 

والحسد أنواع كتير جدًا ، إحنا في المقال ده هنحاول نختصرهم في كذا نوع 

النوع الأول : الحسد في صمت

والحسد من النوع ده أسوء وأخطر أنواع الحسد 

تلاقي الواحدة من دول رايحة فرح صاحبتها 

وطول الفرح بتزغرط وتبصلها تقول دي مبسوطة 

شوف هتطير م الفرحة علشان صاحبتها بتتجوز 

لكن في الحقيقة.. هي بتموت من جواها 

وبيبقى هاين عليها تقوم تجيب العروسة من شعرها

وطبعاً لو قعدت ساكتة هيبان عليها ، وممكن تطلع نار من ودانها

لكن هي بكل ذكاء بتوجه كل طاقة الغل اللي جواها 

للزغاريط والرقص والشقلبة .. وقاعدة تفرك كده

 أكنها واخدة منشطات ، طاقة تنور محافظة 

و النوع ده من الحسد ومن الحساد خطر على اي بشر 

خطر لدرجة الموت .. وعلشانهم المصريين اخترعوا مثل

في الوش مراية وفي القفا سلاية 

ومحدش يسألني يعني ايه سلاية بس واضح انها حاجة بتغز 

يعني يشوفك يضحك في وشك ويبان مبسوط وطاير من الفرحة 

وهو من جوه بقى جواه مليون سؤال 

هو خس إزاي ؟ يابخته .. هو تخن إزاي ؟ يا بخته ..

هو إتجوز إمتى ؟ .. يا بخته خلينا قاعدين احنا لما هنخلل ..

 هو طلق ؟ برضه يا بخته .. ارتاح م الصداع اللي احنا فيه 

طب مادام انت مش عاجبك حالك ، ومستكتر على أي حد 

انه حاله اتبدل ، طب ما تبدل حالك إنت يا ابني 

واغسل قلبك بديتول ولا اتنيل بنيلة على دماغك

يعني مادام مستكتر على الناس التغيير .. 

إبدأ بنفسك وغير نفسك ، ولو سألته إنت ما عملتش ده ليه ؟

يقولك خايف من الحسد .. 

الحسود الصامت عامل زي القنبلة الموقوتة

هيجي يوم وما يعرفش يمسك نفسه و يتفضح 

وهتلاقيه بيقولك في وشك كده انه بيحسدك 

فاقطع علاقتك بيه قبل ما يفرقع في وشك 

بس السؤال هنا .. إزاي هعرفه مادام هو صامت ؟

للأسف مش هتعرفه من أفعاله ، لأنه بيمثل إنه طول الوقت فرحان ليك

 إنت هتعرف من النتايج ، يعني هتلاقي مفيش حاجة بيعرف عنها 

إلا وبتبوظ وبتلاقي نفسك طول ما انت معاه بترجع لورا 

لعند ما تلبس في الحيطة بضهرك 

فالأفضل ليك ما تعرفوش أي حاجة عنك 

وكل ما يسألك عن جديدك قوله الحالة تعبانة مش قادرة 

بنكح تراب من فترة .. الخوف بقى إنه يحسدك 

لأنه بيكح هوا عادي مش تراب ..

النوع الثاني : الحسود المغفل 

والنوع ده من الحسد دايمًا بيقع على فاشوش 

وبيكون أصحابه مغفلين لسبب بسيط جداً 

الحسود من النوع ده بيحسدك على حاجات وهمية 

مش موجودة عندك اصلا فبياخد ذنوب ع الفاضي

ولا منك بتتأذي ولا منه بيسلك من جواه 

يعني تلاقيه بيحسدك على كترة المال 

وانت بتشتري العيش شكك ، وبتغمسه بملح 

فبالتالي مش هتخسر حاجة ، لأن مفيش حاجة تخسرها 

إيش ياخد الريح م البلاط يعني ..؟ 

المشكلة لو حسد البلاط نفسه .. 

الحسود المغفل وبيكون فاكر انه بحسده ليك الحاجات دي هتروح منك 

ازاي يا ناصح وهي مش موجودة اصلاً ؟

بيكون متوهم إنه تحت القبة شيخ ، يا شيخ 

الناس دول بيشيلوا ذنوب على ذنوب طول الوقت 

ومن غير فايدة.. يعني يقول بينه وبين نفسه 

يا بخته زمانه مرتاح البال.. او زمانه ما بيتعبش خالص 

هو اللي زيه ده يتعب ليه أصلاً ؟

جاتك نيلة يا اهبل.. يا اهبل وامك عارفة 

ده إحنا ماشيين بعلاج ، مش كلمة كده والسلام 

لا حرفيًا كل واحد مننا شنطته مليانة علاج رايحين جايين بيه

النوع ده مش مضر لأي حد إلا لنفسه .. لانه زي ما قلنا

 بيحسدك على حاجة انت ما تملكهاش فانت ما بتتأذيش

 بس هو قاعد يشيل في ذنوب وموقوف حاله بسبب القر 

ودنيته بايظة ، وأخرته كمان بايظة 

لأن النوع ده مش هيدخل النار كده عادي 

ده هيدخل النار في لجنة خاصة

الحسود المغفل ، ما كفانوش م الدنيا لقب مغفل بس 

لأ حط جمب إسمه وجمب الجوب تايتل بتاعه كلمة حسود 

يعني خد من أوحش الصفات أوحشهم 

النوع الثالث : الحسود المتجدد 

وده بقى اخطر انواع الحسد اللي ممكن تمر عليك 

ولو في حياتك واحد من النوع ده ، عمرك ما هتتوفق في حياتك 

إن كنت لسه قريب منه ، ولا ربنا نجاك وبعدت عنه 

لأن الحل الوحيد للنجاة من عينه إنه يفقد الذاكرة 

وينساك وينسى كل حاجة تخصك 

والحسود المتجدد خطر جدًا لأن ده مش بيحسدك 

على حاجة موجودة معاك دلوقت 

لأ.. ده بيحسدك على حاجة احتمال تحصلك في المستقبل 

يخربيتك.. يعني واحد صاحبك يلاقيك بدأت تروح جيم 

بقالك يوم واحد بس .. يقول ايوه كلها كام شهر وتبقى صحتك حلوة 

ومين قدك يا عم .. عد معايا ٩٠ يوم وتعمل فورمة 

طب عد انت ، الغريبة بقى إنك كالعادة بعد أول ٣ أيام بتقعد في البيت 

وتنسى شكل الچيم وتبدل مصاريفه بالسجاير 

أو بمحلات السمين وعربيات الكبدة ، لكن هو ما يشغلوش ده 

هو مركز وقاعد يعد ومستني الفورمة 

احيه.. لا احيه فعلا.. ده باصص لقدام ، باصص في حتة انت شخصياً مش شايفها

يلاقيك مثلا بتفكر في السفر يعني بتفضفض معاه كده 

تقوله هخلص جامعة وادخل الجيش واسافر

تلاقيه بيقول في باله.. يا بختك يا عم ، هتسافر

اه وتسيبنا للقرف هنا ، بكره ترجع عامل فلوس زي الرز 

طب ما تسافر انت كمان ، ما هو ده أوبشن متاح 

وبعدين هو انت شايفني على باب الطيارة

 ده لسه في سنين .. ما يمكن ما أتخرجش م الجامعة اصلا

هو ملوش فيه .. انت ناوي تسافر يعني هتعمل فلوس 

يعني فيه فلوس زي الرز جاية .. بيحسدك ع النية بس 

النوع ده خطر ع المجتمع جدًا وانا من مكاني هذا بناشد الحكومة 

وبقولها يا حكومة لازم تسستغلي الموارد البشرية لأنك بصراحة مقصرة في حقه

لأن أنا شايف إن الحسد ده ممكن يكون سلاح فتاك 

في الماتشات الكبيرة مثلا المفروض يجيبوا حد م العيال الحسودة دي

او الستات اللي بتقعد ع المصاطب.. عارفينهم ؟

وتقعد بقى تبص على سمانة اللاعيب ده و فخدة اللاعيب ده 

ونكسب بدون مجهود.. نكسب فرق اصابات 

ولا مشاكل الإرهاب ومفاوضات المياه ونهر النيل 

الست من دول تتغدى كويس وتمسك كوباية الشاي 

وتقعد قدام السد كده ربع ساعة هتجيبه الأرض 

الحسود المتجدد أخطر أنواع البشر اللي ممكن تشوفها في حياتك 

لأنه زي ما بيحسدك على حاجة ناوي تعملها 

زي ما كمان بيحسدك على حاجة ممكن توصلها في يوم 

وده طاقته الإنتاجية زيادة قوي ، وبتفوق قدرة الإنسان الطبيعي 

وبيفكر بمية عقل ، عقله وعقل اللي بيحسده 

ما هو اللي يخليه يحسدك على ناوياك ، معناها انه بيحسدك على أفكارك 

والحل مع الحسود ده ، يا إما تضربه على دماغه تفقده الذاكرة 

يا تستناه وتفصل قاعد في مكانك لعند ما ربنا ياخده 

وبعدها ابقى سافر يا حبيبي واتخرج واتجوز واعمل اللي نفسك فيه 

النوع الرابع : الحسد للحسد

النوع ده هو نقيض اعمل خير وارميه البحر 

ده حد بيحسد ومش منتظر أي مقابل ، يعني مش نفسه يبقى زيك 

وتزول منك النعمة وتروحله .. لأ ده بيحسدك لله في لله

فتلاقي حد بيحسد حد على حاجة هو مش هيستفيد منها في شيء 

يعني بيحسده على طوله مثلاً ، استحالة يقصر وانت تطول مكانه

بيحسده مثلا على لون شعره ولا انه ناعم 

هو ممكن شعر المحسود يتحرق اه

بس شعرك انت برضه هيفضل زي ما هو خشن ومكركت 

تلاقي بنت بتحسد صاحبتها على لون عينيها مثلاً

اه يا بختها لون عينيها أخضر ، ما هي ما بتشوفش 

ونظرها ضعيف ، وانتي عينك عادية بس نظرك زي الصقر 

وبعدين هي استحالة تقوم من النوم تلاقي عينيها قلبت بني عادي 

من اللي موجود في السوق كتير ده 

لا دي مصيبة يا ماما .. دي ممكن تقوم عامية 

وتمشي بنضارة سودا وعصاية طول حياتها 

وانتي برضه في الحالة دي مش هتستفيدي حاجة 

هتفضلي معمصة وعينيكي ضيقة زي ما انتي 

الحسد لمجرد الحسد ، نوع خطير ومخيف لأنه مليان بالإعتراض على خلقة ربنا نفسها 

الناس من النوع ده مش قابلة نفسها زي ما هي 

ولا حاسة انها حلوة ولا تتحب .. فكل حد بتشوف ملامحه مختلفه عنها 

على طول بتحدسها .. طب ما هو ده الطبيعي .. استحالة الناس كلها تطلع توائم 

علشان تبقي مرتاحة .. ومبسوطة ومتهنية 

والناس دول أخدوا الحسد في الأول كهواية وحبوا الموضوع قوي 

وما قدروش يبطلوه ، وماشيين بقى يحسدوا في خلق الله 

عمال على بطال ، يعني هتلاقيه بيحسد واحد

لمجرد إنه عنده موهبة معينة .. وبيتمنى زوالها 

طب لو ده حصل وزالت ، انت هتستفيد إيه ..؟ 

أصله ده مش مال ، ولا حاجة ممكن تاخدها 

الا لو كانت موجودة فيك  

النوع ده من الحساد بيهووا الحسد وبيحبوه 

وبيحبوا يمارسوه ويطوروا من اسلوبه 

يعني الموضوع بالنسبة لهم هواية زي ما قولنا

لا هيزودهم ولا هينقصهم … المهم عنده انك تخسر اللي في ايدك

وتبقوا انتوا الاتنين خسرانين زي بعض .. يا ساتر 

وأعتقد النوع ده الحسد كانت بدايته الأهل 

اللي كانت دايمًا بتقارن بين ولادها وولاد الناس 

شايف ابن خالتك هادي ازاي …؟ 

طب يارب يبقى قرد ، فجأة تلاقي قرد بيتنطط جمبك على حيطان البيت 

شايف إبن عمتك هدومه نضيفة وشعره متسرح إزاي 

فجأة الواد يبصله بكره وضيقة 

تلاقي التاني بعدها بكام يوم بيلم ورق م الشوارع

يعني الناس دول من كتر ما اتقارنوا حسوا ان كل الناس أحسن منهم 

طب وليه ؟ ما احنا نخلي كل الناس وحشين زينا 

هو أسهل بصراحة ، لسه هنكون احنا كويسين زيهم 

لا احنا نجيبهم الأرض وتبقى الروس اتساوت  

والنوع ده من الحساد خطير جدًا لانه بيحب شغله 

ايوه ما هو الحسد ده شغلانة.. شغلانة كل واحد فاضي 

وفاشل وعايز مبررات لفشله.. يحسدك من هنا تفشل 

فيقولك ما هو فلان زيي اهوه.. هو انا لوحدي 

وبكده نكون اتعرفنا مع بعض على أخطر أنواع الناس الحسودة 

اللي ممكن تقابلها في حياتك ، ياريت لو مريت بتجربة مشابهة

للي اتكلمنا عليها في حلقتنا النهارده ياريت

تقولنا في الكومنتات ، ولو تعرف حد برضه فيه الصفات دي 

منشنه علشان نعمله بلوك وما تنساش

تشترك في المدونة علشان يوصلك كل جديد 

ولعند هنا ولازم نقفل مقالنا .. وربنا يسترها علينا