مسلسلات رمضان ٢٠٢٣ ، والاستعداد لأعمال رمضان 2024 الدراما المصرية إلى أين ؟ مساء الخير على كل حد بيدور على الضحكة  في وقت الفرح بقى نادر  مساء الخير على كل متابعينا ، وعلى كل اللي لسه ما عملش فولو لينا  هناخدكوا معانا لدقايق هيعيشوا في بالكوا لساعات طويلة  في ركن بعيد لوحدينا .. بعيد عن كل النكد والقلق المرطرط حوالينا  بدون حزق وبدون حرق .. استعدوا لجرعة مكثفة من الضحك ،  ما يقدرش عليها إلا كل صاحب قلب من حديد مرضى القلب يمتنعون .. لا تخافوا .. ولكن إحذروا .. إحذروا من اللي بيهزروا ..  أهلاً بيكوا مرة تانية في مدونتكم ، وموضوع مقالنا النهارده مختلف تمامًا عن كل اللي فات .. لأننا في الحلقة دي  قررنا نستعرضلكم خريطة الأعمال الدرامية لشهر رمضان ٢٠٢٣ بما اننا داخلين على رمضان 2024 فقلنا نفكر نفسنا بأعمال رمضان 2023 ونشوف هل فيه فرق ولا التكرار سيد الموقف شهر رمضان المبارك ، واللي فاضل عليه بس 3 شهور واللي اتعودنا إن كل الناس فيه بتتنافس وتعمل خير  فيه منهم بقى ناس قرروا يتنافسوا فيه للوصول لأكتر وسيلة آمنة لتحديد النسل  مسلسلات رمضان السنة دي يا جدعان شعارها التكرار  طبعاً بما اننا لسه ما اتفرجناش فمش هنقدر نحكم على حاجة  ولا هنقيم حد ولا هنعلق على حد ..  احنا بس هنتكلم عن الإنطباعات الأولى  اللي وصلتلنا من خلال البوسترات والبروموهات  للأعمال الرمضانية ، واللي عددها السنة دي وصل  لـ ٣٣ مسلسل يا جدعان ، ده عدد المسلسلات المصرية بس  لسه بقى البرامج والتكات والحركات ولكي يا سيدتي  هنبدأهم السنة دي من ورا لقدام .. وهنبدأ بسنة ٨٠٠ ميلاديًا  بمسلسل سيرة الإمام الشافعي من بطولة خالد النبوي  ونضال الشافعي وأجواء خيالية ونسيبه وننط لقدام ١٠٠٠ سنة   لسنة ١٨٠٠ وقت الحملة الفرنسية واللي بيناقش الوقت ده  مسلسل ولله العلم هيكون أقوى عمل في السباق الرمضاني مسلسل سره الباتع من إخراج خالد يوسف ومقتبس من رواية  سره الباتع ليوسف إدريس وبطولة أحمد فهمي وحنان مطاوع  وأحمد صلاح السعدني وكمية بشر محتاجين حلقة لوحدهم  علشان نقول أساميهم .. والمسلسل فيه دمج بين زمن الحملة الفرنسية ودلوقت  بعد كده هنطير ١٢٠ سنة ونروح لسنة  ١٩٢٠  واللي في الزمن ده كان فيه حاجة مشهورة إسمها سوق الكانتو  سوق الكانتو مسلسل بطولة أمير كرارة ومي عز الدين وفتحي عبد الوهاب واللي الحقيقة أمير كرارة السنة دي شكله هيفاجئنا فيه بأداء مختلف  ٣٦٠ درجة .. قصدك ١٨٠ درجة ؟ لأ هو ٣٦٠ انا عارف بقول ايه  نفس الشنب بس اختلف شيكا ونفس تون الصوت بس تخن سيكا  ونفس النيرڤ العالي والعصبية بس اللي فرق شكل البوستر  والملابس والديكور طب ما ده إبداع .. طبعاً هو بس لو كانوا يبعدوا  عن بوستر بيكي بلايندرز شوية ..  بعد كده نطلع من الزمن ده للوقت الحالي ، وقت الضحك  هنلاقي على طريقنا واحد صعيدي محتاج مواصلة تاخده أقرب مكان  شايل يافطة مكتوب عليها صعيدي يا رسول الله  عليه الصلاة والسلام يا سيدي بس مش فاهم إيه العلاقة  ومسلسل ضرب نار ، بين الدويتو الأكثر وحشية ودموية  على مدار الزمن .. أحمد العوضي وياسمين عبد العزيز  اللي طبعاً زي ما انتوا عارفين هيقعوا في بعض في أول حلقتين  ويفرجوا على بعض أمة لا إله إلا الله وبعدين يحبوا بعض  ونكتشف إن الحب بالحنجرة العالية أحسن وأطعم بكتير من حب النحنحة  ومن ضرب نار نلاقي عيلة واقفة في المطار جاية بعد غياب سنين من كندا واللي هيتفاجئوا انه ياي الناس في مصر بقت بيئة  والبلد باظت وإن احنا اللي هنغيرها .. ومسلسل ألف حمد الله ع السلامة واللي كان من أيام بسيطة إسمه حمد الله ع السلامة بس  بس واضح إن الإنتاج صارف ياما فقرروا يحطوا ١٠٠٠  قبل إسم المسلسل وده بطولة يسرا وهنشوف  أول ظهور تلفزيوني لمطرب الجيل الرابع (عنبة)  مع انه مش الموسم بتاعه .. واللي اتكرر ظهوره السنة دي في فيلم عصابة عظيمة ، بطولة اسعاد يونس ومن ألف حمد الله ع السلامة لمسلسل حضرة العمدة  بطولة روبي ، سميحة أيوب ، أحمد رزق ووفاء عامر  وجه الزمن اللي يتقال إسم روبي قبل سميحة أيوب .. هزلت  ومن حضرة العمدة وعلى الطراز الصعيدي هنلاقي قدامنا مسلسل  عملة نادرة بطولة نيللي كريم اللي مامتها روسية وشكلها شبه الفراشات لكن هتعمل صعيدية بكل جدارة ، وبيشاركها البطولة الفنان الجميل  أحمد عيد .. انت فين يا راجل ؟ قلقتنا عليك ..  ومن عملة نادرة للست القادرة اللي كل سنة السوشيال ميديا  بتتقلب عليها وبتضطر تشغل كتايب من اللجان الإلكترونية علشان تثبت انها غير ما بيتقال وهي ناجحة .. ريهام حجاج  في بطولة مطلقة للمرة الرابعة يمكن بمسلسل جميلة .. يا ستي الجمال جمال الروح  ثم الأجهر .. اللي معناه إيه مش فاهمين .. بطولة عمرو سعد  وبأداء وملابس وديكور وأجواء تقريبًا هي هي بتاعت توبة  وملوك الجدعنة .. ونفس طريقة الكلام اللي استحالة تسمعها إلا في مهرجان  وبعدين مسلسل تغيير جو .. بطولة منة شلبي  والله احنا اللي كلنا محتاجين تغيير جو يا فنانة  لمسلسل علاقات مشروعة من بطولة دقن ياسر جلال  ومي عمر .. مش عارف ليه ؟ وهو على العكس من  أعمال ياسر جلال اللي فاتت إلا إن المسلسل بتدور أحداثه  عن قضية إجتماعية وخيانات وطلاقات وجوازات وحوارات  من علاقات مشروعة لمسلسل بابا المجال  واللي بيصر فيه النجم مصطفى شعبان على  نفس الكراكتر ، نفس الأداء ونفس البيئة  ونفس طريقة الكلام المسجوع ، اللي هو لو المتنبي  في زمنه مش هيتكلم كده .. وعموما لو عايز تتفرج على الأجهر وبابا المجال تقدر تشوف ملوك الجدعنة تاني وتريح نفسك  ومن بابا المجال للمداح الجزء الثالث .. تاني وتالت تقريبًا كده حمادة هلال لقى نفسه في المداح خلاص  وع الأغلب هيعتزل بعد كده ويشتغل شيخ  يعمل أحجبة للناس ويطلع عفاريت ويدق زار  وكالعادة واللي رمضان ما بيمشيش من غيره  الكبير الجزء السابع ، السابع يا جدعان.. ده كتير قوي  أحمد مكي فاجئ الجمهور من أيام بالبرومو بتاع المسلسل  وأغنيته اللي أغلبنا مافهمش كلامها من سرعته ..  والحقيقة الكليب كان لطيف إلا إنه زحمة قوي قوي  كمية مؤثرات بصرية وألوان غريبة وتفاصيل راحت ع الأرض .. محدش لحق يشوفها يا كبير  وبعد ما شوفنا مسلسل حضرة العمدة دلوقت مسلسل جعفر العمدة .. واللي محمد رمضان بيقوم فيه بدور  عمدة ستيني راجل رايق والكلام على سلاح ومخدرات وأثار  وحوارات ما بتخلصش .. نتمنى إنه ينسي الجمهور مسلسل المشوار  بتاع رمضان اللي فات .. واللي اكتشفنا منه انهم مجرد رايحين باي  مش مشوار ده خالص يا جدعان .. ده انتوا ما طلعتوش من الجيزة  ونروح لمسلسل اجتماعي تاني من بطولة طارق لطفي  وخالد الصاوي وعائشة بن أحمد إسمه مذكرات زوج  وقبل ما نسيب مذكرات زوج هنقف هنا شوية  قدام صورة مدام روجينا بالصلعة أنا من حقي كإنسان أفهم إيه ده ؟ .. دي ستهم  يا عم ستهم ولا تاج راسهم .. مسلسل ستهم من بطولة روجينا  واللي بيناقش قضية عمل الست في مصر وأحداثه مبنية على  أربع قصص لنساء حقيقيين .. وده شيء يحترم الحقيقة  بس برضه إيه ده ؟ حد يجاوبني .. ومن ستهم لرشيد .. وبنشوف محمد ممدوح المرة دي باستايل مختلف تمامًا هو وريهام عبد الغفور اللي بقت موجودة أكتر من بيومي فؤاد تقريبًا وبتحاوطنا من كل حتة ..  ومن رشيد لصانعة الجدل الأولى في مصر  من بعد واقعة الأندر الشقي .. منى ذكي  بتثير الجدل بحواجب أستاذ سمير الاسكندراني  في مسلسل تحت الوصاية .. واللي طالعة فيه صيادة  بس هو يا فنانة مفيش ملقاط في بيتكم ده باتنين جنيه من على أي رصيف  ومن تحت الوصاية لرمضان كريم الجزء الثاني ..  الله أكرم يا سيدي وعدد برضه من النجوم تحتار فيه الأطبا  بس منهم سيد رجب عموماً ومن هنا لفكرة تكاد تكون مختلفة الا انها رابطة بين السفر عبر الزمن  والشخصيات الكتير المختلفة على طريقة طير انت  مسلسل الصفارة ، بطولة الموهوب أحمد أمين ولأول مرة  وطه الدسوقي ، واللي لمع نجمه في الفترة الأخيرة بأعمال زي (موضوع عائلي) ، وأخيرًا مسلسل حالة خاصة   ومن الصفارة لـ توحة .. ده مش اسم مطعم ده مسلسل عملاه علا غانم  أول بطولة درامية مطلقة ، وطبعاً مش هنشوفه  ومن توحة لكامل العدد بطولة دينا الشربيني وشريف سلامة  وهو ١٥ حلقة كله على بعضه ، بس كامل العدد  ومن كامل العدد للصندوق بطولة أحمد داش للمرة التانية في رمضان  بعد مسلسل مين قال ؟ واللي كان لطيف وخفيف  لولا أستاذ جمال سليمان اللي بقاله مئات السنين في مصر  ولسه بينز تومية من لسانه  ومن الصندوق لمسلسل تلت التلاتة .. واحد يا فنانة..  بطولة غادة عبد الرازق واللي كانت اعتذرت وشاركت  واعتذرت وشاركت ٣ مرات ..  ومن تلت التلاتة للهرشة السابعة  أتمنى أعرف يعني إيه .. من بطولة أمينة خليل ومحمد شاهين  مش عارف ليه مش محمد ممدوح ؟ احنا اتعودنا عليكوا والله لكشف مستعجل بين الدويتو اللي بيحاول وبيحاول  يعلم مع الناس مصطفى خاطر ومحمد عبد الرحمن توتا  ومن كشف مستعجل لجات سليمة الحمد لله  واللي قبل ما رمضان يبدأ نلاقي مرفوع عليهم دعوة بسرقة  رواية من طالبة في أولى جامعة لسه ..  وده بطولة دنيا سمير غانم المتعددة ومحمد سلام  الفنان الشاطر قوي .. وبرضه بيتكلم عن السفر عبر الزمن  ومن جات سليمة لمسلسل استحالة نقول عليه كلمة وحشة  احنا نرفع العلم ونحييه ونضرب تعظيم سلام مسلسل الكتيبة ١٠١ بطولة آسر ياسين  وعمرو يوسف .. واللي بيتكلم عن الإرهاب عموماً ومن الكتيبة ١٠١ لمسلسل بطولة ممثل احنا بنستناه من زمان  وياريتنا ما استنيناه لأنه للأسف بيكرر نفسه بشخصية الحناوي  محمد سعد في اكسلانس .. واللي بنقوله كفاية بقى كاراكترات يا فنان  نفسنا نشوف وشك الحقيقي ونسمع صوتك الأصلي لأننا نسيناه  وبكده يكون انتهى استعراضنا لمسلسلات رمضان ٢٠٢٣  واللي عددها كبير جدًا جدًا ، ٣٣ مسلسل وفي انتظار ليستة أعمال رمضان 2024 وربنا يستر مع شوية برامج وشوية إعلانات كتير قوي قوي قوي  يدوب تفطر من هنا وتقعد قدام التلفزيون للصبح  وتقدم استقالتك لأن إنت صعب مع كل الكم ده تشتغل  وإلا تكون بتشتغل نفسك ..  وبكده تكون انتهت مقالنا النهارده..  ياريت لو عندك تعليق على أعمال رمضان الدرامية السنة دي تقولنا في الكومنتات  وما تنساش تشترك في المدونة علشان يوصلك كل جديد وكل سنة وانتوا طيبين