أنواع الناس في الرحلات .. يا ترى انت أي نوع فيهم ؟!

 

أنواع الناس في الرحلات .. يا ترى انت أي نوع فيهم ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا ..  

أهلاً بيكوا مرة تانية في مدونتكم ، وموضوع مقالنا النهارده

عن زمايل الرحلة ، رفقاء الدرب .. 

صحاب الشمسية والعوامة ، صحاب الحسرة و الندامة 

زمايلنا اللي مجبرين عليهم علشان نقسم مع بعض 

إيجار الشاليه ومصاريف الأكل والشرب 

مقالنا النهارده عن أنواع الناس في الرحلات

والحقيقة إنه قبل ما نصنف الناس دول ونقول أنواعهم

لازم نعرف هو ايه أنواع الرحلات دي 

هل هي رحلة تبع الشغل وكل اللي فيها زمايل مكتب 

أو شركة واحدة ، ودي رحلة بتكون بدافع إن فريق العمل 

يقرب من بعضه ، وبيرجعوا كارهين اليوم اللي شافوا وش بعض فيه

ولا دي رحلة عائلية ، وبتكون بالنسبة للعازب سجن 

وبالنسبة للمتجوز نفي ..ولا دي رحلة صحاب 

وده اللي يهمنا .. من كتر ما بنشوف فيها من عشوائية

فقررنا نركز موضوع مقالنا النهارده عليها 

وأنواع الناس في الرحلات بيتغير على حسب 

إن كانت الناس دي اتجوزت ولا لسه عزاب 

الناس دي شباب ولا معاهم بنات .. 

مفلسين ولا معاهم فلوس ومرتاحين 

لكن الكذا نوع اللي هنتكلم عليهم في مقالنا النهارده

موجودين في كل رحلة في أي مكان وبأي شكل

النوع الأول : المتوتر

والنوع ده من الناس في الرحلات ، هو أول واحد بيصحى الصبح 

يأكد على الناس كلها المواعيد وأماكن التجمع 

ده إن جاله نوم أصلاً من كتر ما هو حاسس بقيمة الحدث 

وخايف تحصل أي حاجة تكدر الناس وتضايقهم

ما تحسوش انه واحد من الناس اللي طالعين الرحلة 

لأ .. ده تحسه صاحب المشروع ، وخايف انه يبوظ 

فتلاقي معاه قايمة طويلة عريضة بأسماء الناس

وعنواينهم وهيستنوا فين ، معاهم أطفال ولا لأ 

أعمارهم قد ايه ، فصايل الدم ، هل طلباتهم كلها موجودة ولا لأ

كمان بتلاقي معاه ورقة تانية فيها التايم لاين ، أو برنامج الرحلة بالكامل

من ساعة ما الباص ياخد الناس من نقاط التجمع 

لعند ما هيعدي على كام كمين في طريقه 

هيقف في أنهي ريست ، وهيقف قد ايه 

وهيمون ٩٠ ولا ٩٢ وفي انهي بنزينة 

والراجل ده بتلاقي معاه باقة مكالمات بلا حدود 

مجهزها ليوم الرحلة لأنه بيعمل مكالمات أكتر من نائب مجلس شعب

نازل انتخابات جديد ، وصلت فين ؟ معاك حاجتك ولا ناقصك حاجة

هتستنى فين .. هتاكل ايه ؟ بتحب السمك ولا لأ 

بتاكل رز ولا مكرونة .. صوص أبيض ولا أحمر 

وكافة التفاصيل اللي تيجي في خيالك واللي ما تجيش 

النوع الثاني : أبو كيس

والنوع ده ماشي بكيس من قبل ما تطلعوا من بيتكوا

لعند ما ترجعوا ، ولكن الكيس ده بتختلف خواصه 

ومكوناته على حسب الموضوع والحدث 

والنوع ده احذر منه ولازم تحاول على قد ما تقدر 

إنك تمضيه على كمبيالات قبل ما تطلعوا رحلة مع بعض 

لأن النوع ده عنده بدائل لكل حاجة .. يعني تبقوا شلة صحاب

متفقين انكوا هتاكلوا أكلة سمك حلوة مثلاً

تلاقيه قبل الخروجة راجع ع السكن بكيس فيه سمك 

وقرر يشوي ويقلي ويعمل صينية وهو خبرته صفر 

بس بيوفر .. فيضرب الخروجة .. يا إما يقعد ياكل لوحده 

ويوفر تمن الأكلة ، يا إما يجر معاه نفرين تلاتة وتتفركش الشلة

حد عيان تلاقي معاه كيس أدوية ، مش لمساعدة الناس .. لأ

ده بيسترزق بيه ، فيقولك مثلاً هتنزل تاخد برشامة مسكن 

ولا مضاد حيوي بكام ؟ ب ٢ جنيه .. معايا ب جنيه ونص

يعني كمان بيضرب الاسعار وبيسبب كساد في السوق

حد اتعور معاه بيتادين وشاش وقطن 

واحدة بتولد معاه حلة مياة سخنة .. 

حد عايز يعمل الزايدة تلاقيه طلع المشارط من الكيس

وقال بسم الله .. المهم انه يوفرعلى قد ما يقدر 

وعلى قد ما يقدر يحاول يطلع الرحلة ببلاش 

أو يرجع الفلوس اللي دفعها

وتلاقيه بقى بيفاصل في كل حاجة 

تمن الباص .. يقولك المواصلات أرخص 

تمن الشمسية والكرسي تلاقيه طلع جرنانين

واحد قعد عليه وواحد حطه فوق دماغه 

الكيس ده ما بيخلصش ومليان بالمفاجآت

ولو حس ان تمن الشاليه كتير عليه  

و باظت منه خالص .. ممكن يبات في نفس الكيس عادي

والكيس ده بيكمل معاه طول الرحلة

معاه فيه مايوهات للي عايز يأجر

عوامات للي ما بيعرفش يعوم .. حلويات للي عايز يحلي

شاي وسكر وزيت وصابون وفوط كتير 

والكيس بيكمل معاه لآخر المطاف .. لأنه من كتر 

دعاوي الناس عليه بتلاقيه طول الطريق بيرجع 

فيه اللي طفحه طول الرحلة

النوع الثالث : صاحب البلاي ليست

والنوع ده من الناس على قد ما بيعمل جو

على قد ما بيجيب للناس صداع .. لأنه ما بيعرفش 

يعيش لحظة واحدة من غير أغاني شغالة 

وعالية أكنه مولود في فرح ، ولا في كباريه 

فتلاقيه من قبل الرحلة بأسبوعين 

قاعد بيجمع في أغاني من كل حتة وبيعبي في فلاشات

ومحدد لكل أغنية وقت وميعاد .. أكنه كان منى عينه

يطلع دي چي بس مجموعه ما جابش وخيشت معاه 

وطلع مهندس ولا محاسب مثلاً ، والراجل ده

من أول ما تقابله الفجر وانتوا بتتجمعوا 

حتلاقيه حاطط هاند فري في دونه .. وبيعدي على الناس 

واحد واحد يسمعهم وبيعمل تقييم عام للأغاني 

وهل أماكنها صحيحة ومواعيدها مظبوطة ولا لأ 

ومن أول ما تحطوا رجلكوا في الباص .. بعد شوية

القرآن اللي بيشغلهم السواق .. تلاقيه مشغل تراك 

تمهيدي كده بين القرآن والأغاني حاجة كده تاخدك من هنا لهنا

زي الأسماء الحسنى اللي بتشتغل في الأفراح 

ومن اللحظة دي تلاقي هبد ورزع وأغاني طول الطريق 

لعند ما توصلوا للشاليه أو الكوشة .. على حسب

تلاقي الناس بتحط حاجتها واللي بياخد دش من الطريق

واللي بيرتب حاجته في الدولاب وده عامل اتموسفير 

ومشغل أغاني مسمعة الشاليه كله 

وأكنه عنده تارجت ولازم يحققه .. 

لازم يخلص كل الأغاني اللي فضل يجهزها 

على مدار الأسبوعين وإلا هيحس إنه فاشل 

في الطريق للبحر ، وهو قاعد على البحر 

وهو في البحر .. وهو بياكل .. وهو بيشرب

وهو نايم .. وهو قايم وهو عايم .. 

ولو حصل وموبايله فصل ، ويارب يفصل 

تلاقيه مجهز ١٢ باور بانك 

ولو فصلوا ، يارب يتحرقوا تلاقيه هو بيغني 

ما هو عنده داتا بقى مش موجودة 

في نجوم اف إم .. 

والنوع ده من الناس بيتضايق من حاجتين 

الناس اللي لابسة هاند فري وبتسمع أغانيها الخاصة 

فبيحس إن الموضوع ده بيجرح كرامته 

وبيقلل من مجهوده وتعبه ، والناس أصحاب الذوق الخاص

والرأي واللي عايزين يغيروا الأغاني دي

بأغاني تانية على ذوقهم .. لأنه بيفترض 

إنه مادام الأغاني دي عاجباه يبقى أكيد 

لازم تعجب كل البشر على وجه الأرض 

والحل مع الراجل ده حد يثبته ويسرق موبايله 

أو حد يشغل قرآن فيخرسه خالص 

لأن الراجل ده السبب في زيادة مبيعات 

بنادول اكسترا لوحده ..

النوع الرابع : غاوي مشاكل

صاحبك ده اللي مجرد ما تطلعوا مع بعض رحلة 

إنت عارف إن الموضوع مش هيعدي على خير

وعارف إن تسعين في المية من الوقت هيروح

بين الخناقات والأقسام ، ده اللي كل الناس بتطلع الرحلات

علشان تنبسط وتهدي أعصابها إلا ده .. 

ده الوحيد في الكوكب اللي بيطلع الرحلة

علشان يشد أعصابه ويلاقي مبرر للخناقات

فتلاقيه بقى من أول ما تتجمعوا بيتخانق مع الناس اللي اتأخرت

وبيتخانق مع السواق سواء سايق بسرعة أو ببطء

وبيتخانق مع صاحب الشاليه ، وبيتخانق مع اللي بيأجر الشمسية

وبيتخانق مع أي بياع ماشي ع الشط .. 

وقاعد بقى مش على بعضه لمجرد إنه ما اتخانقش لمدة ٣ دقايق مثلاً

فيقعد يأمرز لواحدة وجوزها جنبها فيتخانقوا 

يزق واحد في البحر ويحاول يغرقه فيتخانق معاه

يخطف الكورة من أي عيل بيلعب ويشوطها بعيد

فيتخانق مع أهله .. وهكذا .. وده إنت تعرفه من حاجتين

أول حاجة بتلاقيه لابس فانلة بحمالات ملونة 

وصوته من أول ما تركبوا الأتوبيس مبحوح 

استعدادًا للخناقة لأن ده صوت الخناقة

والراجل ده الحل معاه انت من طريق وهو من طريق

لأنه هيجرك معاه وهتقضي أحلى يومين في السنة 

في القسم وترجع لبيتكوا ترحيل كعب داير 

على أقسام مصر بحالها .. ومش بقولك بيعه 

لأ .. لو معاه حق اتخانق معاه.. بس ده ما بيحصلش 

هو دايمًا غلطان ، وبيعامل المصيف كأنه چيم 

حاجة كده يطلع فيها كبت السنة كلها 

طب هل ده ما بياخدش فاصل .. يعني بيفضل طول 

الوقت كده مهيبر وبيتخانق وبيرازي في خلق الله ؟

والله على حسب التامول اللي معاه خلص أو لأ 

وطبعاً بياخد فاصل في آخر ١٠ دقايق وانتوا مروحين 

بينام استعدادًا لتحوله لإنسان عادي عنده شغل بكره الصبح

النوع الخامس : المحاسب

وده صاحب الميزانية واللي على الأغلب بيكون هو نفسه

صاحب فكرة الرحلة ، واللي تلاقيه قبلها 

بشهر معاه دراسة جدوى وبيلف ع الناس

 يعرض عليهم الفكرة بناءًا على مواعيد 

اجازاتهم السنوية ، و رواتبهم وكل المعايير 

اللازمة اللي تخليهم يطلعوا مع بعض رحلة 

ويبدأ يعمل دراسة جدوى ويعرضها على الأطراف 

بحيث يطلعوا يقضوا الأسبوع بأقل تكلفة

وده على الأغلب كان نفسه يطلع محاسب 

بس أهله أجبروه على كلية تانية 

والراجل ده هو اللي بينظم النظام وعارف من الأول كده 

من قبل ما تتحركوا كل واحد في جيبه كام 

علشان محدش يقدر يزوغ منه في حساب حاجة كده ولا كده 

ومشكلته الوحيدة انه فصيل .. يعني تبقى بتلعب وتبلبط في المية

وده جايلك جري من اخر الدنيا وماسك في ايده ايصال استلام 

ربع الفرخة اللي كلته ع الغدا وبيمضيك عليه 

يا سيدي ، هي حبكت .. يرد عليك يقولك 

ما انتوا عايزينها ميغة .. وقتاية محلولة 

ونفس الراجل ده لو دورت وراه وجبت مدير مالي 

ومحاسب قانوني ودققتوا شوية في الحسابات بتاعته 

هتلاقيه هو الوحيد اللي ما دفعش ..

 وبرضه مش هتعرف تاخد منه لا حق ولا باطل

ولو مسكته هيقولك طلعت معاكوا بشغلانتي 

هو انتوا فاكرين الحسابات دي أي كلام 

ده لولايا كان زمانكوا دافعين الضعف 

ولو وقعت مش هقع لوحدي .. لأني 

معايا ورق يوديكوا في داهية

والراجل ده الحل معاه انك تربطله عهدة 

وتمضيله على كل الايصالات اللازمة 

قبل ما تتحرك من مكانك .. علشان ينزل 

من على ودانك بقى ويسيبك تصيف 

النوع السادس : عدو الفرحة

وده الراجل اللي مجرد ما تعرض عليه الموضوع 

تلاقيع بيقولك قاعدة هنا زي هناك 

مين قالك لو روحنا مصيف هنتبسط

وانت مالك يا بارد .. تعالى وسيب نفسك 

وانت هتتبسط وتبقى زي الفل .. 

ومن لحظة ما يركب الباص وتلاقيه 

حط الهاند فري في ودنه وشغل كل 

أغاني هاني شاكر ومصطفى كامل

ومحمد محيي وتامر عاشور وعامل بينهم ميكس

ولو سابه صاحب البلاي ليست يشغل 

أغنية واحدة هيخلي السواق يقطع شرايينه 

وينط في أقرب ترعة تقابلكوا 

علشان يخلص من أوجاعه .. 

وطول الطريق بقى الناس تهزر 

وهو سرحان ، الناس تلعب وهو حزين 

ومكشر ومضايق أكنه مترحل علشان يقضي 

خمسة وعشرين سنة سجن .. ولا رايح 

وعارف انه مش راجع .. وأول ما توصلوا الشاليه 

تلاقيه بيقولك كل الشاليهات بتتسرق 

هنرجع نلاقي حاجتنا متقلبة . 

تنزلوا البحر وهو قاعد بيحرس لبسكوا 

وحاجتكوا ولما تخرجوا علشان ينزل 

يقولكوا تعرفوا البحر ده مات فيه كام واحد 

قبلكوا ؟ مات فيه كام شاب من عمركوا كده 

كانوا جايين يصيفوا برضه وفرحانين بشبابهم 

يا باي عليك وعلى فالك يا أخي .. 

تعالى نتفسح يقولك هنصرف كل اللي معانا

وهنروح بيوتنا مشي .. تعالى نركب عجل 

يقولك هتدخل فينا تريلا .. 

والحل الوحيد مع الراجل ده محدش يكلمه 

ولا حد يعرفه انكوا طالعين رحلة 

هو كده كده هيزعل .. سواء رحتوا من غيره

أو راح معاكوا .. فخليه قاعد في أوضته الضلمة 

مع أغانيه على حافة الإنتحار يبقى أحسن 

للبشرية بحالها .. وأريح لكل معارفه

أنواع الناس في الرحلات كتير جداً 

منهم الشيف اللي بيقيم كل مطعم تروحوه 

ويكرهكوا في نعمة ربنا ويحسسك انك صرفت فلوسك

على الفاضي وكان ممكن يعملك نفس الأكل ده بتكلفة أقل 

 ومنهم السباح اللي عايز يعلم كل الناس السباحة .. 

ومفيش على لسانه غير سيب نفسك والماية هتشيلك 

تتقابلوا في الجنة على خيرة الله 

ومنهم الفلاتي اللي نازل مصيف يشقط وراجع 

ومنهم المتدين اللي مجرد ما يروح المصيف 

يحرم كل حاجة عليك ويحرم عليك عيشتك نفسها 

أنواع كتير لا تعد ولا تحصى

ياريت لو مريت بتجربة مشابهة للي اتكلمنا عنه

في مقال النهارده تقولنا في الكومنتات

وياريت لو تعرف حد فيه صفة من الصفات

اللي اتكلمنا عليها تعمله مينشن 

وما تنساش تشترك في المدونة

علشان يوصلك كل جديد

وبكده تكون انتهت مقالتنا النهارده

عن أنواع الناس في الرحلات

نتقابل في مقال جديدة ..