أنواع الصايمين ، في الشارع العربي ،هل ترى نفسك من بينهم ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

مختلف شوية بمناسبة إننا في شهر رمضان الكريم

فكان ضروري نتكلم عن الصيام واللي بيصوموه 

واللي بقينا بنشوفه في الشوارع والمواصلات وكل حتة 

من الناس الصايمين .. كنا طول عمرنا نعرف 

إن شهر رمضان ده شهر العبادة والإلتزام 

وإن الصيام هدفه الأساسي التحكم في النفس 

اللي بقى جديد علينا و من فترة ظهر وانتشر

إن الصيام ما بقاش لأي حد .. الصيام اليومين دول عايز رجالة

وبالنسبة للرجالة الصايمين فاحنا بقى قسمناهم لكذا نوع

 

النوع الأول : الصائم التقليدي 

ياااه .. الراجل ده اللي أول ما تدخل أتوبيس ولا مترو 

هتلاقيه قاعد ماسك مصحفه وبيقرا ، ولا سبحته وبيذكر ربنا 

تبصله تلاقيه هادي ووشه بشوش .. لا بيكلم حد 

ولا بيتنرفز على حد ولا بيبص على حد .. صايم بجد

علشان كده سميناه الصايم التقليدي ، لأنه ده النسخة الأصلية 

الستاندرد من الصايم ، اللي هو عايز توري أي عيل صغير 

إزاي بيكون الصايم تشاورله عليه على طول يفهم

وده مش هنطول في الكلام عليه ، لأنه بقى نادر 

في زمن بقى الصيام فيه على حق غريب 

النوع الثاني : صائم الشيفت المسائي 

وده الراجل اللي اتقال عليه ، نوم الظالم عبادة 

ده اللي طول ما هو نايم ، فهو في مقام الصايم 

صايم عن الكلام والنميمة والمجايب في سير الناس

صايم عن البص لدي والغمز لدي 

صايم عن النرفزة والزعيق والتخليق على البشر 

صايم يبقى نايم ، لأنه بمجرد ما بيفتح عينه وبيصحى 

فبيروح صيامه على طول ، يعني يمسك موبايله ساعة علشان يفوق 

يتفرج على تيك توك ، يقوم من سريره 

عايز طن نيكوتين طبعاً فيبدأ يتخانق على اللي صحاه 

حتى لو هو صحي لوحده .. أبوه وأمه مثلاً يندمهم إنهم اتجوزوا بعض من أساسه

مراته يكرهها في صنف الرجالة كله وتفكر في الطلاق 

ولاده يتمنوا أنهم يتشردوا ، من كتر ما بيشوفوا منه من نرفزة وزعيق

المهم إنه مجرد ما يقوم من على السرير 

يبدأ بقى يشوف مين عايش معاه في الكوكب 

اللي هيحظى بالإصطباحة الطين بتاعته 

واللي هيتشرف بوش أمه اللي يقطع الخميرة من الفرن

وده الأفضل للبيت والحارة كلها ، أنه يصحى على الأذان

أو لو عرفتوه تسيبوه نايم لبعد العيد فتبقى مصلحة ليه وللبشر كلها

النوع الثالث : صائم الشيفت الصباحي

وعلى عكس كل اللي قولناه على الصايم اللي فات 

بتاع الشيفت المسائي .. ده بقى صائم الشيفت الصباحي

وده الراجل اللي طول نهار رمضان وشه منور 

بيقرا قرآن وبيصلي وملتزم في الصلاة 

بيوزع وجبات افطار صائم ، وقاعد بيسبح طول اليوم 

يأذن المغرب يا جدعان من هنا .. يقلب ١٨٠ درجة 

يسمع أغاني ومسلسلات الدنيا وحاجات +١٨ 

يجيب في سير الناس .. يشرب حشيش 

يكلم بنات ، يوأد بنات مفيش مانع ، يلعب قمار

يعمل كل حاجة غلط ، ولما تيجي تسأله يقولك 

ما خلاص يا عم ما أنا فطرت .. هو مش المغرب أذن

والصايم ده بيكون فاهم الموضوع غلط .. 

يعني هو مش واخد باله إننا بنصوم شهر رمضان 

بالنهار عن الأكل والشرب .. بس طول الشهر عن كل حاجة غلط

هو فاكر إن شهر رمضان عبارة عن نهار رمضان بس

لكن المغرب أذن ، ما أعرفكش يا إبن عمي

تحس انك عايش مع المزدوج ، أو حد عنده انفصام في الشخصية

النوع الرابع : الصائم جهرًا 

وده الراجل اللي طول اليوم واقف على الحركرك 

كل ما حد يكلمه يقولك يا عم أنا صايم 

ويسمع كل الناس كده بصوت عالي

وأكنه أول مرة يصوم في حياته 

عندك شغل أنا صايم ، عندك جامعة أنا صايم 

تعالى ساعدني في حاجة أنا صايم 

تعالى أنا بموت أنا صايم .. 

تحس إنه صايم لوحده ، بطوله أو كل الناس فاطرة

وهو الوحيد اللي صايم .. وأكن الصيام ده حجة 

لعدم أي حاجة في الدنيا .. والصايم من النوع ده 

هتلاقيه عنده شعار واحد بيستخدمه في كل حاجة 

بعد العيد ، وتلاقيه أجل كل حاجة في حياته لبعد العيد 

أيوه ما هو الراجل صايم يعني .. يعمل ايه 

وأكت الحياة وقفت وانتهت وكل حاجة عطلانة وهتشتغل بعد العيد

والراجل ده لو جيتله بعد الفطار ، المفروض بقى يشتغل 

أو يذاكر أو يعمل مصلحته ، ولكن لأنه مش هيعرف 

يقولك أنا صايم فهيرد عليك رد يبهرك 

هيقولك أصل أنا كنت صايم 

النوع الخامس : المفرهد 

الصايم المفرهد ، ده نوع من البشر تطور جينيًا مع دخول شهر رمضان 

وده في أيام الفطار كان كسول ، ولكن مع رؤية الهلال 

بيتحول كده زي المستذئب بس بيبقى مفرهد 

وده دايمًا مش قادر ، مش قادر 

لا قادر يتحرك ولا قادر يتكلم ، ولا قادر يروح شغله 

ولو راح مش قادر يشتغل ، ولو اشتغل يخلص الشغلانة 

اللي بتخلص في ساعتين معاه وقت الفطار 

يخلصها في أسبوع ، مدرسة فوت علينا بكره 

المشكلة في النوع ده من الصايمين مش فيه هو شخصياً

هو يولع .. لكن في المحيط اللي حواليه 

لأن الصايم المفرهد عايز عناية خاصة 

يعني واحد يتحايل عليه ينزل الشغل ويقف يشجعه

أهو قام من على السرير .. بيغسل وشه .. 

بيلبس هدومه .. يا سلام .. هيخرج ولا ايه هيخرج ولا ايه 

راح الشغل ، ابن اللعيبة .. فمحتاج حد يشجعه 

علشان يتعتع من مكان ، وياريتها جات على قد كده 

حد يناولني قلم ، حد يديني ورقة .. حد يمضيلي 

حد يشغل المروحة ، حد يدخلني الحمام .. حد ي .. 

لا يا صاحبي .. انت مش قادر تصوم خد أجازة مرضي 

وأقعد في بيتكوا وما تجيش ما احنا صايمين برضه 

يا إما بقى تشغل معاك طقم مساعدين 

لكن علشان تصوم وتنزل شغلك مع بعض 

تخرجنا احنا من الملة ، يا اما نترفد بسببك .. لأ

النوع السادس : الصائم إن بابليك

وده الصايم اللي طول ما هو بره البيت قدام الناس 

وحد شايفه وبيتعامل معاه .. وهو ماسك الذكر 

والصوت الهادي ، والصلاة في الجامع 

تبص في وشه كده تلاقيه منور زي البدر

وزبيبة الصلاة في قورته تقولش اشارة مرور 

يقعد مع نفسه ولا يتقفل عليه باب ، فجأة

تلاقي النور اللي في وشه ده اتطفى 

زبيبة الصلاة راحت ، وأكنه عاملها بورنيش جزم

بقى مكشر ، حواجبه تخنت فجأة وصوته اخشن 

و كل الأخلاق والأدب والهدوء ده اترمى في الزبالة

وحاله اتبدل ، لا صلاة بقى ولا عبادة ولا أي كلام من ده

كل ده خدعة ، ويبقى ناقصله حاجة واحدة بس 

يقوم يفطر بدل ما هو صايم ع الفاضي كده 

والنوع ده من الصايمين اللي بيفضل يجمع فلوس طول السنة 

من المخدرات علشان يطلع يحج فيتقاله الحاج 

الحاج فلان راح والحاج فلان جه 

والحاج فلان لما راح ، كان رايح يبيع سلاح 

والحاج فلان لما جه كان بيغسل أموال 

المظهر عنده وكلام الناس أهم من أي حاجة 

النوع السابع : الصائم المغصوب 

عارف لما تنزل مصلحة حكومية في رمضان 

وتلاقي الموظف ساعة ما لمحك كشر وأكنك جاي تقبض عليه

أهوه هو الصايم ده .. مضايق ومخنوق إنك جاي تخلص مصلحة

في رمضان ، ويقولك الدنيا صيام يا أستاذ اخلص 

طب يا أستاذ انت لما هي الدنيا صيام 

مش تبتسم ، وتعمل شغلك اللي بتاخد عليه فلوس

زي ما ربنا أمرك تعمله ، ولا انت فاهم ان الصيام قريفة 

مش الصيام ده كلمة حلوة وخلق حسن 

ولا حسن غياب ، وانت اللي قاعد مكانه 

والصايم من النوع ده دايماً يحسسك بالذنب 

اللي هو دي مواعيد تيجي فيها تخلص حاجة 

ولا دي مواعيد تطلب فيها شغلانة ، 

معلش يا أستاذ ما أعرفش اني جيتلك في وقت مش مناسب 

همشي حاضر وأجيلك بعد العيد ، ولا أجيلك لما تكوي وشك

وبعدين انت لا طايق الشغل ولا طايقني ولا طايق قميصك

 خد أجازة يا أستاذ أجازة قريفة طول شهر رمضان 

يقولك ما اقدرش علشان ده شغلي وأكل عيشي 

طب ما تصونه يا أخي .. 

النوع الثامن : الصائم المتحول 

وده أحياناً بيسموه صائم النيكوتين ، وده الراجل 

اللي بيكون بيتكلم معاك عادي جدًا مفيش مشاكل 

وفجأة يمسك دماغه ويصرخ .. صدااااع 

وفجأة رتم كلامه يزيد ، صوته يعلى ، ضربات قلبه تعلى 

وإن كان واخد وقته في شغلانة عايز ينجز

وإن كان واقف عايز يقعد قاعد عايز يمشي 

عايز أم الوقت يجري علشان يولع سيجارة 

ويبدأ وشه يدي اشارات عكس بعض 

ما تفهمش ان كان زعلان ولا هيتشل ولا ايه ؟

كلامه مش مفهوم ، ويبقى على تكة .. 

عامل بالظبط زي البوتاجاز اللي تفتح الغاز بتاعه من فترة 

ومستني بس يشم النار يروح مولع في الدنيا 

فاللي هو من ٣ دقايق بس كان بيقولك حضرتك تؤمر 

فجأة بدأ يزعق فيك ويقولك اخلص يلا 

ولو غلطت ولمست طرف جلابيته وانت معدي 

ممكن يفتح عليك مطواه عادي .. 

والنوع ده من الصايمين ملهومش أمان 

ونصيحة أوعى تتعامل معاه قبل ما يشرب 

١٢ سيجارة وفنجانين قهوة .. لأنه قبل الجرعة دي فهو خطر 

النوع التاسع : صائم الوقت الضائع

والراجل ده بقى مركز وفاهم هو بيعمل ايه ..

ده بيفضل سهران لعند ما ربنا يديله صحة يسهر

إن شالله ينام العصر حتى .. المهم يسهر على قد ما يقدر

وقبل ما ينام يظبط المنبه على قبل أذان المغرب بتلات دقايق بالكتير 

يدوب يقوم من السرير ، يدخل الحمام و يغسل وشه 

وعما ينشف يكون الفطار اتحط .. 

وأول ما يقعد ع الفطار بقى تلاقيه بيقول 

اللهم لك صمت وعلى رزقك أفطرت 

صمت إمتى .. ؟ إنت الكون اتغير وانت نايم 

ذهب الظمأ وابتلت العروق 

أنهي ظمأ ده اللي ذهب .. مش لما يجي الظمأ 

وبعدين نشوف هيذهب ولا ايه 

وبعدين عروق اللي ابتلت .. ده انت ما عندكش عرق واحد 

فيه دم ، كلهم مياه ساقعة 

ده انت صمت فترة غسيل وشك بس 

٣ دقايق ويمكن أقل من كده .. 

وده بقى أكتر حد جاي على البيت بخسارة 

لأنه لا يعرف يدعي لحد دعوة مستجابة

 ولو مات مش هيشفع لحد لأنه ما لحقش يصوم 

هو بس بيخلص أكل الفطار على الفاضي 

النوع العاشر : الصائم البيتوتي

وده عكس الصائم إن بابلك تمامًا .. الراجل ده بقى 

طول ما هو لوحده وبين أربع حيطان تلاقي وشه منور 

وبيصلي وبيتعبد وبيقرأ قرآن ومفيش أجمل من كده 

أول ما يخرج من البيت بقى ما تفهمش بيجراله إيه 

تلاقيه ماشي يتلكك يعمل ذنوب .. 

ماشي يشمشم على خناقة .. عارف قبل الفطار بعشر دقايق 

تبقى قاعد في بيتك وفجأة تسمع ناس بتجلد في بعض

في الشارع .. أهوه هي دي عينة الصايم البيتوتي 

ده بيفضل مستني اليوم بطوله صايم وجميل ومؤدب 

ويخرج من البيت بس يجيب عصير مثلاً

تلاقيه راجع بجنحة قاعدتين عرب 

و١٨ غرزة في وشه بالعرض 

والصائم البيتوتي الحل الوحيد معاه يتحبس 

يتربط في رجل السرير .. يتسلسل زي الشياطين 

لعند ما المغرب يأذن ، المغرب أذن ده حميل بقى 

هتلاقيه نازل يصلي التراويح معاك كمان 

الصايمين أشكال وألوان ، ربنا يهديهم ويهدينا 

بس عايز أقولهم حاجة واحدة .. السنة فيها

٣٦٥ يوم .. التزم واعقل منهم ٣٠ 

واعمل اللي انت عايزه في ال ٣٣٥ الباقيين 

وبكده تكون انتهت مقالتنا النهارده عن أنواع الصايمين

ياريت لو مريت بتجربة مشابهة أو تعرف حد فيه صفة 

من الصفات اللي اتكلمنا عليهم دول تمنشنه في الكومنتات

وما تنساش تشترك في المدونة علشان يوصلك كل جديد

وكل سنة وانتوا طيبين