" تطبيق threads أول بوكس في ماتش ملاكمة إيلون ماسك ومارك زوكربيرج المرتقبة "
في شهر ٥ اللي فات إيلون ماسك كتب على تويتر
إنه مستعد لمباراة ملاكمة مع مارك زوكربيرج
لما عرف إن مارك شغال على مشروع هينافس تويتر
ورد زوكربيرج ساعتها بيقول فيه لإيلون ماسك
إبعتلي اللوكيشن !
لحد هنا وتمام .. وقولنا إن الموضوع هدي على كده
ودي شوية تويتات لا راحت ولا جات
لكن إيلون ماسك ما سكتش ويوم ٥/٢١ كتب تويتة تانية
وحدد فيها المكان ، مركز فيجاس أوكتاجون في ولاية نيفادا
قام رادد مارك بصور بيتدرب فيها على القتال
قام رادد ماسك بتويتة قال فيها
إنه ما بيمارسش أي رياضة غير هشتكة عياله ، بس مستعد ..
لحد يوم ٧/٥ لما ضرب مارك زوكربيرج أول بوكس لإيلون ماسك
لما أعلن رسميًا عن إطلاق برنامج جديد إسمه Threads
وده تطبيق شبه تويتر صدر من شركة Meta
بيجمع بين تغريدات تويتر اللي ما بتعديش ال ٥٠٠ كلمة
ومزايا انستاجرام من صور و ريلز وشات
ومتوفر في ١٠٠ دولة كلهم بره الإتحاد الأوروبي
اللي لسه مش مسموح فيه بتنزيل التطبيق
وبرغم ده قدر يجمع ٣٠ مليون مستخدم في يوم واحد
لدرجة إن CNN سمت تطبيق Threads
في مقال ليها twitter killer أو قاتل تويتر
وقالوا إن التطبيق الجديد لميتا قدر يجمع
عدد ضخم من المشاهير والنجوم والبراندات
وتصدر عمليات التحميل على google play و app store
لأنهم ببساطة قدروا يخلقوا هجين بين تويتر ومزايا انستاجرام ..
وتقدر تسجل عليه بحساب انستاجرام
وفولورز الانستاجرام بتاعك هيروحوا تلقائي لحساب Threads الجديد
يعني محدش هيبدأ من الصفر ..
ولكن في مقابل ده اشترطوا إن محدش يقدر يحذف حسابه من Threads
إلا لو حذف حساب الانستاجرام بتاعه شخصيًا
وده معناه ولاء تام .. واللي هيسجل بحساب هيلبسه للأبد
طبعاً المصريين كالعادة كانوا في حتة تانية
وكانت كل تعليقاتهم عن الموضوع كانت بخصوص معايير Meta
وهل هتكون متطبقة بحذافيرها في threads ؟
ولا اللي نفسه في حاجة يلحق يقولها قبل ما ياخد بان ؟
بس لحد دلوقت محدش رد على سؤالهم ده
وأكن مارك بيقول جرب بنفسك
والحقيقة إني واحد من الناس فرحان في تويتر
لأن التطبيق فقد مزايا كتير من بعد رئاسة إيلون ماسك
وجه تطبيق threads لمستخدمين تويتر من السما
واللي طالب كتير منهم بتوفير بديل لتويتر
طبعًا إيلون ماسك من ساعتها ما نطقش
من البونية اللي خدها في وشه
ولكن طلع الرئيس التنفيذي لتويتر Linda Yaccarino
وقالت في تويتة (لا يمكن الاستغناء عنه)
والحقيقة برضه أنا مش فاهم إيه اللي مخلي مستخدمي تويتر صابرين عليه كل ده
إيه اللي يخليك تتعامل مع تطبيق لابس بابيون
وبيكلمك من طراطيف مناخيره ؟
إنت إيه رأيك ؟ ممكن نشوف موت تويتر على ايد ثريدز فعلاً
ويبقى راح زي اللي راحوا ؟
ولا إيلون ماسك لسه بيسخن ؟
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..