الصحاب وأنواعهم (الجزء الأول) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن رفقاء الدرب ، العشرة .. الورث اللي طلعنا بيه من الدنيا

السند والضهر والكتف وكل أعضاء الجسد 

الحتة اللي في الشمال ، و اللي منهم ناس شمال 

بس بيحبونا وبنحبهم ، صحيح مطلعين عين أبونا 

بس بيحبونا .. صحيح ضيعوا عمرنا هدر 

في مشاكلهم وحواراتهم بس مفيش غنى عنهم 

المادة الخام لأغاني الميكروباصات بغدرهم وخياناتهم

الدليل الأول والوحيد إن مش بكترتهم بس بجدعنتهم 

مقالنا النهارده عن الصحاب يا أخواننا 

الصحاب يا جماعة.. الصحاب يا اما نعمة يا اما نقمة 

وفي الحالتين الصحاب رزق ربنا بيحطهم في طريقنا 

يا اما يساعدونا ويخففوا عننا يا اما 

ربنا بيبعتهم لينا عقاب على أعمالنا ، وفي الحالتين هما بيخففوا عننا برضه

في الحالة الأولى بيخففوا عننا قرف الدنيا 

في الحالة التانية بيخففوا عننا ذنوب الآخرة وبيكفروها 

طبعًا أنواع الصحاب لا تعد ولا تحصى 

واحنا النهارده استحالة نقدر نتكلم على كل الانواع

علشان كده قسمنا كلامنا عن الصحاب على جزئين 

وده موضوع يستاهل مليون مقال ..

ولكن احنا هنتكلم عن الأنواع الأغرب.. 

النوع الأول : فاتح الشهية 

ده صاحبك اللي معندوش بجنيه معلومات عن إدارة المال 

ولا عن الذوق العام والاتيكيت ولا عن أداب الطعام 

هو بس يتحط قدامه أي أكل .. أي حاجة 

تلاقيه شمر ودار على طول .. مش محتاج تشجيع 

وده دايماً شايل شعار إصرف ما في الجيب 

يأتيك ما في الغيب.. 

وده عدو لأي نظام غذائي.. وبالنسبة له الدايت أصلًا حرام 

ولو مسكت تليفونه صدفة هتلاقي كل القنوات اللي بيتابعها

بتتكلم عن الأكل والمطاعم وريڤيوهات لكل مطاعم العالم 

ولو فتحت درجه هتلاقيه مليان بالمنيوهات 

اشي سوري على مصري على يمني 

وحافظ كل مطعم فين وسعر وجباته كام ..

وكل مطعم في محيط مصر وضواحيها يعرفه وهو زبون عنده 

والصاحب ده ما بيفرقلوش بقى 

انت عندك مسؤوليات ايه ؟ معاك كام ؟

طب محتاج منهم كام ..؟ وبيكون عارف مفردات مرتبك أكتر منك 

وميعاده ولو جه يوم ٥ في الشهر تلاقيه كلم المحاسب بتاع شركتك

وأرغمه ينزل المرتب حتى لو فيه حريقة في الحسابات 

وبمجرد ما القبض ينزلك بقى .. تلاقيه عامل جدول 

من يوم واحد في الشهر ليوم خمسة .. 

يدوب كده ما هو المرتب مش هيكفي أكتر من الخمس أيام دول يعني

فتلاقيه بقى مقسم الأيام .. الفطار عند فلان ، الغدا عند علان 

والعشا حاجة خفيفة .. موزة ومحاشي مثلاً

والحلو وبين الوجبات .. ومش سايبلك فرصة تهضم 

هو ماشي معاه زبادي ورايب على طول

تبقوا ماشيين في أمان الله وطافحين لما هتفرقعوا 

وتلاقيه استوسخ عربية كبدة كلاب وداخل جايبله 

١٥ نص .. يا ابني ما احنا لسه واكلين .. 

يقولك شميت الكبدة ريقي جري 

لا يشغله بقى لا قولونك ولا حموضة ولا كل الكلام ده 

والصاحب ده دايمًا تليفونه مليان بأرقام دليفارية مصر كلهم 

ومكون معاهم صداقات وبيخرج معاهم وبيزوروه في البيت 

لو ما طلبش لمدة يوم ونص يقلقوا .. 

بالإضافة إنه على علاقة وطيدة بكل الدعم الفني 

لطلبات والمنيوز وغيرها ، فتلاقيه مثلاً

غاب أسبوع ولا حاجة وما طلبش حاجة 

يعني كان بيعمل غسيل معدة مثلاً.. تلاقي الدنيا اتقلبت 

وتحصل حالة طوارئ من النوع الرابع .. 

والشركة كلها بتنور نور أحمر وبيضرب فيها جرس الإنذار 

و تلاقي المدير التنفيذي للشركة نفسها 

نازل بطيارته الخاصة فوق سطوح بيتهم 

وجايبله كومبو وبيصحيه من النوم .. 

لا يكون زعلان منهم ولا حاجة يعني ؟

وتبقى إنت مقاطع الأكل ولا نوع معين منه 

تلاقيه مطلعلك ألف وصفة ووصفة للنوع ده 

يخليك تاخد قرض لو مفلس علشان تدوقه 

طيب انت وصاحبك بقى فاتح الشهية ده 

فلستوا اللي كان كان يوم ٥ في الشهر

تفتكر هو لآخر الشهر هيعمل إيه 

هياكل عيش وجبنة مثلاً.. استحالة ، ده ما بيعطلش 

تلاقيه مجهز خطة بديلة وجدول كامل 

النهارده خطوبة فلان هنتغدا عنده 

النهارده فرح علان هنتعشا عنده .. 

طهور .. عيد ميلاد .. عقيقة .. طلاق حتى 

وواخدك من إيدك وسارح بيك تلفوا في الموالد

وع الموائد المهم إنه مش هيستسلم 

والوقت اللي يتوفر فيه ٣٠ جنيه 

تلاقي عنده بدل العرض ألف وواخد خصم 

٣٠٠٪ من مطاعم الدنيا .. 

الصاحب فاتح الشهية أوعى تفرط فيه 

إلا لو جالك نقرس .. أو لو بقيت نباتي 

لأنه في الحالة دي هيقاطعك ويمسح رقمك من عنده 

وينسى إنه يوم كان يعرفك 

 النوع التاني : صاحب المزاد وابنه

وده صاحبك اللي يستكتر عليك العيا نفسه .. 

ومستحرم إنك تحس بحاجة ما يكونش هو حاسس بيها وأكتر 

ما تفهمش بقى ده نوع من المشاركة ولا غيرة ولا إيه ؟

المهم إنه ما يقبلش على نفسه إنك تقوله

إنك حاسس بحاجة مش حاسسها .. تعرف حاجة مش عارفها

مريت بحاجة ما مرش بيها .. ومش بس كده 

لأ ده لازم يكون أعلى وأكتر منك بكتير 

وده اللي كل ما تقوله حاجة يقولك وانا كمان 

أو أنا أكتر.. أنا مصدع.. ومين سمعك 

أنا مولود مصدع ، أنا عندي جرب .. 

يقولك مدي ايدك في الدرج هتلاقي المرهم لسه داهن منه

أنا اتلبست.. يقولك انا ملبوس بالفعل من زمان 

انا طالع القمر.. يقولك يا عم ده انا لسه جاي من هناك

انتوا وانتوا رايحين كنا احنا راجعين ..

طب أنا هموت نفسي .. ها عطلت فيها دي ؟

وده مش محتاجين نقول عنه غير إنه ابتلاء من ربنا.. 

وربنا بيختبر صبرك فيه .. ويشوف مدى تحملك 

وده ما تستناس منه كلمة معلش أو استحمل 

أو انسى إنه يخفف عنك كده زي بقية الخلق 

ويخفف عنك ليه ؟ إذا كان اللي عنده أتقل بكتير من اللي عندك 

ولا تستنى منه لا حمد و شكرانية 

لأن اللي إنت عاملهولي .. هو عمله لنفسه وأكتر 

واللي إنت جايبهوله عنده منه فدادين 

ولو انت أحمد مكي عمره ما هينبهر بيك 

لأنه عنده مهاراتك ومواهبك دي وزيادة .. 

بس هو مش حابب يدوس ولو داس هيقدعهم 

صاحبك ده هتلاقيه بيزايد عليك في أي حاجة

المهم إنه ينتش منك المايك ويقول كلمتين

وياريتهم كلمتين .. ده ممكن يدخلك في رواية وقصة وحدوتة 

ويحكيلك مغامراته اللي ما بتخلصش .. واللي ما حصلتش 

فتلاقيك مثلاً بتقوله أنا مرتبط ببنت .. 

يقولك أنا مرتبط باتنين .. طب أنا متجوز أربعة 

يقولك غبي أنا عملتها وزهقت .. 

المهم إن القاعدة الأساسية عنده .. 

إن اللي إنت لسه هتجربه .. هو شبع فيه تجربة 

وإن المشوار اللي إنت هتخطي فيه 

هو حافظ مطباته .. طب إمتى وإزاي ؟ ما تعرفش

يعني تلاقيك عارفه وعايش معاه من ٢٠ سنة 

وقاعد بيحكيلك في يوميات وأبطال من وحي الخيال 

جم امتى ومشيوا امتى ما تشغلش بالك 

والنوع ده من الصحاب خياله خصب جدًا 

وفي العادة بيكون مثقف بس من بره بس 

يعني يقعد مع ده يجمع منه كلمتين 

يحطهم على كلمتين جمعهم من ده بقى عنده جورنان 

طب وده نخلص منه ازاي ؟ 

لا ده ما بنخلصش منه.. ده تكفير ذنوب 

ولما تتوب عن الذنب اللي بتعمله هيختفي من حياتك لوحده 

النوع الثالث : راكب السلام 

وده صاحبك وحبيبك وسندك اللي بجد

الراجل اللي لو قولتله أنا هبيع كليتي يقولك وأنا كمان 

هو أنا هعيش بكليتين وانت بكلية واحدة .. استحالة 

وده موافقك في أي حاجة نخرج يلا بينا 

نقعد يلا بينا .. يبقى الجو برد وتقوله أنا حران 

يقلع الجاكيت.. مفيش معاكوا جنيه 

وتقوله يلا اسكندرية مشي .. تلاقيه بيقولك انا تحت البيت

يبقى جعان ميت من الجوع .. وتقوله بس أنا شبعان 

يقولك وأنا كمان شبعت .. تقوله أنا نفسي أحمل وأولد زي الستات 

يقولك أنا بتوحم .. جاي معاك في أي حتة إنت رايح فيها 

وموافق على أي حاجة إنت موافق بيها 

ورافض أي حاجة إنت رافضها .. 

وده مش ضعف شخصية منه ولا هو إمعة مثلاً

لأ .. ده راجل عارف إن أي حاجة مع صاحبه 

هتبقى أحلى وليها طعم فبيعمل ده من غير كلام  

مريح كده ، وما بيجادلش .. المهم إن إنتوا مع بعض 

والنوع ده من الصحاب .. إستحالة ينجح وإنت ساقط 

إستحالة يتجوز وإنت عازب .. ولو انتوا الاتنين 

متجوزين لا قدر الله .. تلاقيه مانع الخلفة في البيت 

ومحرج على مراته أي دخول الفرحة في البيت 

ولا أي وأوأة تحصل ، إلا أما تخلف معاه 

ده صاحبك اللي لما تخطب تلاقيه خطب صاحبة خطيبتك 

أو أختها  ، ولو عندها أخت توأم يبقى تمام قوي

يوم ما تدخل السجن ، تلاقيه داخل في الدفعة اللي بعدك 

ويوم ما تفكر تسيبه تلاقي نفسك قدام كمية ذكريات مهولة

مشاوير وخروجات ولبس زي بعض 

ومقاسات واحدة وأفلام واحدة ، وفرق بلاي ستيشن واحدة

فإستحالة تفرط فيه .. ولا تخسره 

لأن اليوم اللي هتخسره فيه هتبقى حرقت سنين طويلة 

من عمرك وهتعيش في متاهة مش هتعرف تخرج منها 

مشكلة النوع ده من الصحاب إنه نادر الوجود

لانه مش بيفرق معاه الحاجة اللي هيعملها 

اللي بيفرق معاه بجد انه بيعملها معاك

النوع الرابع : المدعي 

ده الكداب بقى ، أو نقيب الكدابين بذات نفسه 

ده صاحبك الفشار اللي بيفضل يملى دماغك بحوارات ما بتحصلش 

ولا بتخلصش .. المشكلة إنك بتكون عارف ومتأكد

إنه بيكدب .. بس هتعمل إيه ؟ صاحبك 

ولازم تسمعله وتاخده على عيبه أو على قد عقله

ويفضل يدخلك في حارات وشوارع ضيقة 

ويتوهك بس هو ما بيتوهش أبدًا.. ده بيكون دارس ومخطط

ومراجع الاسكريبت قبل ما يمثله عليك مليون مرة

وكل اسكريبت فيه شبه بينه وبين حاجة يا إما شوفتها

أو سمعتها قبل كده .. ما تدورش كتير .. 

إنت سمعتها منه برضه مع بعض التعديلات

تخلي القصة تبان جديدة مية في المية .. 

حاجة كده تفوق خيال فريق إنتاج كامل 

طب تفتكر بقى كل الكلام ده منين ؟ 

يعني دي كهربا زايدة ع المخ .. ولا جاب كل الخيالات دي ازاي

هو بيعتمد على أسلوب متبع من قديم الأزل 

وإنه بيفضل يجمع داتا من كل مكان بيحط رجله فيه 

يعني ركب المواصلات سمع حكايتين تلاتة 

راح مصلحة حكومية سمع حدوتة راجل معدي السبعين 

هيعدل فيها الأسماء والأعمار بس 

ويلم كل ده في شوال بقى ويجيلك انت يستلمك 

 يرميها في حجرك آخر اليوم أكنها بطولاته الشخصية

وكتر خيره إنه بيجي آخر اليوم 

لأن لو اليوم بدأ بالراجل ده .. فلا هنسترزق ولا هنشتغل 

وهتعيش حياتك مدمن بنادول من كتر الصداع اللي هيعملهولك 

يعني سمع في المترو إن فلان ارتبط ببنت بأربع ودان 

يجي يحكيلك اكنها بطولته الشخصية 

وانفراد ليك وحاجة سر ما ينفعش حد يعرفها غيرك 

وإنه كده بيميزك عن بقية الخلق 

وبيعرفك عنه اللي محدش يعرفه ولا يخطر على بال الجن الحقيقة

الوحش والمضحك في الموضوع بقى 

انه احيانا هتلاقيه بيحكيلك حاجات 

انت شخصياً حاكتهاله.. وممكن كمان تكون مريت بيها 

في وجوده ، يعني حصلت معاك انت شخصيًا قدامه 

ويجي هو بكل بجاحة يحط التاتش بتاعه 

ويسمعك ، وإنت مضطر تسمع غصب عنك 

وغصب عنك لازم تعمل نفسك منبهر

 كأنك أول مرة تسمع الموضوع ده .. 

هتعمل فيه إيه ؟ صاحبك .. والعلاج من النوع ده من الصحاب 

بيحتاج يا إما الراجل ده يتجوز ويستلم ودن مراته بقى يجيبلها صرع 

يا إما يتوفاه الله .. ويبقى ربنا كرمك 

الصحاب انواع واشكال ما نعرفش نستغنى عنهم 

ولازم نقبلهم على وضعهم 

وبكده تكون انتهت مقالتنا النهارده عن أنواع الصحاب

لو مريت بتجربة مشابهة للي اتكلمنا عنه في المقال النهارده

ياريت تقولنا في الكومنتات

أو عندك صاحب فيه صفة من الصفات اللي ذكرناها 

ياريت تعمله مينشن .. بس بلاش النوع الأخير ده لأنه هيصدعنا وينتش علينا

وما تنساش تشترك في المدونة علشان يوصلك كل جديد 

وأشوفكم في مقال جديدة ..