" هل تربينا بشكل لا يناسب عصرنا الحالي ؟! .. تربية أهلك مش عيب "

 

" هل تربينا بشكل لا يناسب عصرنا الحالي ؟! .. تربية أهلك مش عيب "

أوعى تشك في أهلك وتتهمهم ظلم 

إنهم كانوا السبب في كل اللي انت فيه 

علشان ربوك كويس ، علموك يعني إيه إخلاص 

وفاء ، و صدق .. 

صدقني .. العيب مش فيهم ولا في تربيتك 

العيب فيك انت .. انت اللي اخترت غلط 

اخترت حد ما اترباش نفس تربيتك 

ولا خرج من بيت علمه نفس اللي انت اتعلمته 

العيب فيك انت .. إنك اخترت حد مش شبهك 

أحيانًا بنغلط غلطة كبيرة لما بنفكر إننا نقرب 

من حد مليان عيوب ما تناسبناش 

بحجة أننا هنغيره .. و هنحببه فينا لدرجة أنه يغير طباعه

 .. في حين اننا عارفين كويس

إن العيوب دي هو عايش بيها من صغره 

وإنها مش مجرد عادات ممكن يتعود على غيرها 

يعني الراجل مش بيسهر كتير فهنعوده ينام بدري 

لا .. دي عيوب ترسخت في شخصيته 

زي الأنانية وحب الذات ، أو الغدر

ونفضل نحاول معاه ويؤذينا فنسامح ونرجع

نحاول مرة تانية فيؤذينا مرة تانية 

وفي كل مرة نحطله ألف عذر 

أصل طبعه كده .. بكره يتغير .. لا إيأس ده مش هيتغير 

كل اللي هيحصل انك هتفضل تحاول 

لحد ما تتحول العلاقة لمعركة بينك وبين الشخص ده 

الشخص ده اللي المفروض يكون سبب راحتنا 

ومعركة تانية أصعب بيننا وبين نفسنا 

نكمل ؟! .. نحاول ؟! .. نجرب طرق جديدة ؟!

ولا نستسلم ؟! .. وعلشان إحنا مش فاهمين نفسنا كويس

ومش مدركين حقيقة إن كتر المعارك دي هيأذينا 

و هيخلص على طاقتنا وكده كده هتخلص العلاقة بالتدريج 

واللي بيخلص بالتدريج ما بيرجعش 

كل ده بسبب إننا فاكرين إن المطلوب .. اننا نكون ابطال

مش لازم تكون بطل ، ولا لازم يتقال عليك 

إنه ضحى وحب بكل طاقته 

ولا لازم تكمل لآخر نفس على فكرة 

هو العمر فيه قد إيه ؟! 

التضحية بكل مشاعرك غباء .. وعِند هتكون انت ضحيته 

مش حد تاني ..

خليك دايمًا فاكر انت دخلت العلاقة دي ليه 

سواء حب .. صداقة .. ولا جواز 

مش دخلت العلاقة دي علشان تعيش مبسوط ؟

وتكمل اللي ناقصك باللي موجود في الطرف التاني ؟

فكر لدقيقة واحدة .. و إسأل نفسك سؤال بسيط

هو انت فعلًا مبسوط ؟!

لو طلعت الإجابة لأ .. يبقى الهدف من العلاقة نفسه ما اتحققش 

وما تكملش ، وده هيكون صعب في أوله لكنه 

أسهل من إن إجابة السؤال ده تكون (مش عارف)

مش عارف أنا مبسوط ولا لأ .. 

مش عارف إن كان فيه أمل في النهاية .. نور في نهاية النفق زي ما بيقولوا ؟

طيب خليك كمان مش عارف إن كنت هتخرج من العلاقة دي 

سليم ومعافى نفسيًا .. ولا هتخرج معندكش ثقة في حد ولا في نفسك ؟

لازم تؤمن إن كل إنسان في الكون له طاقة وآخر

لازم تدرك إن مفيش فايدة .. وتعترف إنها بتحصل وعادي 

لازم تختار انك تستلم وتعترف برضه إنه حقك وعادي 

ولازم بعد ما تستسلم تسامح نفسك على اختيارك الغلط 

عادي ما حصلش حاجة 

والأهم إياك تشك في تربية أهلك