أنواع ركاب الميكروباص .. انت أي نوع فيهم ؟!

 

أنواع ركاب الميكروباص .. انت أي نوع فيهم ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

 

أهلاً بيكوا مرة تانية في مدونتكم ، وموضوع مقالنا النهارده

عن ناس بنقابلهم كل يوم وما نعرفهمش ولا هما يعرفونا 

ناس بقضي معانا وقت كبير بس كل واحد في حاله

تقدر تقول جيران بس صباح الخير يا جاري 

انت في حالك وأنا في حالي 

ناس العلاقة بينا أحيانًا بتكون محدودة 

مقتصرة على السلام و رده 

وأحياناً بتطور للتعامل المادي 

باقيلك كام وعليك كام .. وأحياناً

بتوصل بينا العلاقة لإننا نعرف كل حاجة عن بعض 

في وقت قصير جدًا .. ناس شعارهم وقت الزحمة اللي يلحق 

وشعارهم وقت ما تكون الدنيا نايمة .. اننا نكمل من بعض 

موضوع مقالنا النهارده عن .. ركاب الميكروباص..

النوع الأول : أول واحد بيوصل

فيه ناس واخدة فكرة عن إنه لما يركب جنب السواق 

بيوصل قبل الناس .. بحكم انه أول واحد في العربية

وبناءًا على الحكمة دي بيبدأ يرسم لنفسه برستيچ 

وله مميزات حصرية دونًا عن كل ركاب الميكروباص

لأنه ببساطة كده راكب خاص جدًا .. 

يعني الراكب اللي بيركب جنب السواق ده 

عنده إمكانية إنه يعمل حاجات كتير محدش يستجري يعملها من باقي الركاب 

زي إنه يشغل أغنية بيحبها .. يولع سيجارة 

ياخد ويدي مع السواق كده عادي بكل سهولة 

وبناءًا عليه بيفضل طول الطريق يطبله 

تلاقي السواق داخل مخالف ، وكاسر على كل اللي في الطريق 

وعامل ١٨ مخالفة ، لكن ده كل اللي طالع عليه 

انت صح .. انت صح .. هما اللي ملهومش فيها

مش عارف مين ركبهم عربيات .. 

وده بيديه مكانة وبرستيچ كده مختلف .. 

يعني تلاقيه بيعمل حركة مشهورة 

أول ما حد يجي يركب جنبه .. ينزل ويدخله جوه 

ويركب هوه ع الشباك .. وأكنه حاجز بلاكون في مسرح

ويا سلام بقى لو الراكب ده واخد نفرين 

كل الركاب يبصوله كده انه من طبقة وده من طبقة تانية خالص 

مع ان فرقها كلها ٤ جنيه يعني .. بس ال ٤ جنيه دول 

بيخلوه متميز .. وأكنه لوهلة نائب رئيس الميكروباص 

أو المساعد بتاعه على أساس إنه راكب جنب طيار مش سواق 

الراكب اللي جنب السواق ده هو الوحيد اللي يستجري 

إنه يولع سيجارة في العربية .. بحكم إن دخان سيجارته 

مش هيرجع للعربية ورا .. وأكن فيه عازل أو فلتر 

بين الكرسي اللي قدام وباقي العربية 

وطبعاً ما يقدرش يعمل كده إلا لو عزم على السواق بسيجارة

ولازم تكون فلة حمرا .. لكن لو هيعزم عليه بكليوباترا 

فقلتها أحسن .. وياريت هو كمان ما يدخنش 

كمان من مميزات الراكب اللي جنب السواق 

إنه ما بيشاركش في لم الأجرة ، بدون ما يعمل نفسه مش واخد باله 

أو بدون ما يرفض ويعرض نفسه للحرج

هو مجرد بس إنه في مكان بيسمحله 

إن الأجرة ما بتعديش عليه .. راجل برنس 

يركب نضيف وينزل نضيف

لا حد بيزنق فيه ، ولا حد بيقوله نزلني 

ولا حد بيقوله افتح باب ولا اقفل باب 

النوع الثاني : أبو سماعة 

وده راكب أول ما يركب الميكروباص بتلاقيه قعد جنب الشباك 

في آخر كرسي على الأغلب .. دفع أجرته مظبوطة 

علشان ما يشغلش باله بباقي ومش باقي 

وطبعاً تصرف زي ده بيحتاج انه يعدي على أي مقلة لب 

يجيب فكة .. يدفع أجرته من هنا .. ويحط السماعات في ودنه من هنا 

ووشه ناحية الشباك ، ملوش علاقة بإيه بيحصل في العربية 

بيتكلموا عن الأسعار ملوش فيه .. 

بيتعرضوا للخطف .. هو مخطوف جاهز بدون مقاومة 

نزل عليهم كائنات فضائية ، هو في حاله 

بتصور معاهم منى الشاذلي هو مش في دماغه 

هو كل اللي عايزه من الدنيا يسمع التراكين اللي هيسمعهم

ويفتكر كل ذكريات حياته اللي مرت عليه من لما كان عنده سنة

لعند اللحظة اللي ركب في الميكروباص

ويتخيل كمية خيالات ولا أجدعها مؤلف في الكوكب 

مشكلة الراكب أبو سماعة تلات حاجات ..

أولهم لو ما عملش حسابه في فكة 

فبيروح عليه الباقي مفيش كلام 

وتانيهم لو حصل ونسي ترتيب خطوات ركوبه 

ولبس السماعة قبل ما يدفع ممكن يتسبب في مشكلة طائفية 

توصل للمحاكم ، بسبب إن السواق بيدور على اللي ما دفعش 

ولأنه مش معانا ، هو في عالم موازي 

السواق ممكن يوقف العربية ويتخانق وينزل الركاب في القسم 

ومشكلته التالتة .. إنه عمره ما وصل للمكان اللي هو عايزه على مرة واحدة 

يعني ده وهو نازل من البيت والدته تسأله هتوصل إمتى يقولها على حسب الظروف 

لأنه ممكن يفضل راكب لحدود السلوم عادي .. ده لو البلاي ليست اللي مشغلها 

طولت شوية ، إنما بقى لو بيسمع أم كلثوم .. فممكن ينزل يلاقي نفسه في ليبيا 

فدايمًا ولاد الحلال بيلحقوه ، بعد محطته بمحطتين تلاتة 

وبيضطر يرجع تاني يركب ميكروباص تاني وياخد نفس الخطوات 

ولو الموسيقى اللي بيسمعها هادية شوية .. فده هيفضل راكب

لعند ما السواق يسلم العربية في المرور في الفحص السنوي 

أو على الأقل في نهاية الوردية ، ويسلمه لصاحب العربية مع الايراد 

النوع الثالث : بواب الميكروباص 

عارف لما تبقى نازل من البيت مزعل والدتك فتكشف راسها وتدعي عليك

أول لما تبقى ظالم حد ويحسبن عليك في صلاة فجر 

أهوه الراجل ده .. نازل متشيك ورايق ولا بيه ولا عليه

وفجأة يجي يركب الميكروباص يلاقي نفسه مضطر 

إنه يركب جنب الباب .. وده يوم خلص من قبل ما يبدأ أصلاً

فلان طالع يفتحله الباب ، فلان نازل يفتحله الباب 

علان عاوز يعدي ، ترتان شايل شنطة يحطها قدامه 

حاجة شايلة سبت شوية بط ووز يفتح الباب 

ويمد ايده يشيل ، ويحط ويسندها ويشيلها السبت 

لعند ما تقرر تنزل براحتها .. كله تكفير ذنوب 

والراكب ده مش كل حياته بايظة 

لا هو عنده ميزة برضه .. انه عايز ينزل في اي حتة 

على جنب يا أسطى وينط .. إنما باقي مواصلته 

مآسي ، وأوجاع .. يلف السواق يشتم حد من الركاب 

هو أول واحد ياخد الشتيمة في العربية 

الباب اتقفل جامد السواق يهينه ، اتقفل بالراحة يحاول مرة واتنين

انه يقفله تاني ، والمميز في الراكب ده انك تعرف تطلعه 

من وسط ألف بني آدم .. يعني إمشي في أي شارع 

جنب موقف وبص بصة ع الناس ، هتلاقي منهم 

واحد ماشي معووج .. نصه اليمين أضخم من الشمال 

هو ده .. من كتر ما فتح الباب وقفله وركب ناس 

ونزل ناس وشال شنط واسبته واكياس 

فعمل فورمة بس للأسف في نص واحد بس 

والحل الوحيد للراكب ده علشان يخلص من معاناته

انه يستغفر ربنا كتير ، ويعمل استطلاع رأي 

على الفيس بوك .. ويسأل الناس اللي زعلان مني 

يسامحني ، ويتصل بكل معارفه يراضيهم 

يمكن حد شايل منه وبيدعي عليه 

وفيه حل تاني بس محتاج تكتيك 

إنه يتابع بكل تركيز في وسط اللي بيعمله ده 

الراكب اللي جنب السواق .. في اللحظة اللي ينزل فيها 

ينط يركب مكانه .. أو في ينزل ياخد أوبر ويريح نفسه

النوع الرابع : بين البينين (محاسب الميكروباص)

وده راكب لا هو عارف يسند على شباك 

ولا عارف يحط سماعة في ودنه ولا عارف يمد رجله

ده الراكب اللي قاعد في النص في الكنبة اللي في النص 

والراكب ده لو امكانياته مش مناسبة للمكان اللي هو فيه

هتحصل مشكلة كبيرة في الميكروباص

لأن الراجل ده هو اللي بيكون عليه 

الإعتماد الأكبر بين الركاب في لم الأجرة 

وكل العربية بتدعيله من أول السواق لعند صاحب العربية 

ومنى عينهم إنه يقدر يلم الأجرة في سلام وبدون خلافات

ويرجع لكل ذي حق حقه ، بس الموضوع مش بالساهل كده

دي مسؤولية يا جماعة محتاجة قدرات خاصة زي ما قولنا

وخصوصاً لو الأجرة مش رقم صحيح .. 

يعني مثلاً لو ٣ وربع .. فدي عايزة عالم رياضيات

وخصوصاً مع التقصير اللي بيحصل من الركاب 

و خد عندك بقى .. ١ من ٢٠٠ ده أبسط كلام

٣ من عشرة جذر تربيع ، ٢ من ١ فاصلة ٨ من عشرة

من عملة البيتكوين ، أو أي عملة رقمية

١ من شيك مستحق الدفع لحامله من أقرب فرع للبنك الأهلي

حسابات في حسابات لو الراجل ده مش قدها 

هيشيل الليلة وينزل أخر الخط معجز ويضطر يدفع الفرق من جيبه 

ولو السواق نفسه مسامحه هينزله في أقرب حتة مقطوعة 

ويدعي عليه والركاب يقولوا آمين 

ومحاسب الميكروباص ، لو اتكرر وركب في نفس المكان 

مرة واتنين وتلاتة واكتسب خبرة ، فيقال 

إن خبرته تعادل خبرة مدير مالي بقاله ٢٠ سنة 

متغرب في دولة عربية ، وتقدر تعتمد عليه في أجعص المواقف

مش مواقف الميكروباصات مع انه يسد برضه 

لأ .. انت تقدر تعتمد عليه في حياتك ، لأن الراجل ده قد المسؤولية

ده خد قرار إنه يشيل أمانة ١٤ راكب ويوصلها للسواق في أمان 

رغم كل المعوقات .. فتقدر بقى تاخده وانت بتخطب 

أو وانت بتطلق والمحكمة بتجرد قائمة المنقولات 

تقدر كمان تسافر معاه لأي حتة في أمان 

وده الراجل اللي يتطبق عليه المثل اللي بيقول

اختار الرفيق قبل الطريق .. ولو صاحبت حد من دول 

إياك تفرط فيه أبدًا لأنه عنده حل لكل مشاكلك 

لأن كل مشاكل العالم ، ما تجيش حاجة جنب 

اللي هو بيعمله في الميكروباص 

النوع الخامس : اللي واقع من فوق 

والنوع ده من الركاب ، مستحدث وجديد على الميكروباص 

وده واحد كان معاه عربية لوقت طويل

وفجأة حصلتله أزمة مالية باعها 

وبدأ يركب أوبر لفترة ، ومع التصخم ما بقاش قادر يكمل 

فإضطر آسفًا إنه يركب الميكروباص

وده اللي يقع عليه قول ، إرحموا عزيز قوم ذل

ده واحد كان مرتاح ماديًا .. عمره ما ركب مواصلة 

عمره ما راح مشوار بهدوم مكرمشة .. 

عمره ما راح مشوار عرقان لأنه اتعود ع التكييف 

ما يعرفش حاجة عن المجتمع ده .. ولا هو فين 

بيروحله منين وبيركبله من فين .. 

ولا يعرف المواصلة دي بكام ولا دي بكام 

فتلاقيه لا معاه فكة ، ولا عارف أي قاعدة من قواعد الميكروباص

يعني تلاقيه نازل أول واحد في الميكروباص 

وفي نفس الوقت راكب في اخر كرسي 

فبعد ما الميكروباص يتحرك ب ٣ ثواني 

تلاقيه بدأ يردد بينه وبين نفسه جمل على شاكلة

على جنب يا أسطى .. أو على إيدك يا باشا

أو الشارع الجاي ، بيحاول ينقي ويختار واحدة منهم 

تناسب الموقف وتناسب وضعه الإجتماعي 

وهوب أول ما ينطق بالجملة دي .. كل الركاب يبصوله بصة قرف 

لأنه هيضطر ينزلهم كلهم واحد واحد علشان ينزل

والراجل ده دايمًا بيوصل متأخر لأنه ما يعرفش احتمالات 

زي إن ممكن مفيش مواصلة أو ممكن مفيش ركاب 

ودايمًا بيتوه ، بسبب الخجل .. لأنه على ما ينطق بكلمة 

على جنب يا أسطى يكون عدى محافطة كاملة 

والراكب ده تقدر تعرفه وتميزه برضه من وسط ألف

لابس براندات ، صوته هادي .. مش لابس هاند فري بسلك

لأ لابس اير بود أصلية .. كمان برفانه مختلف نضارته مختلفة 

اللي هو أول ما تشوفه في ميكروباص .. لازم تمصمص شفايفك

وتقول لا حول ولا قوة إلا بالله .. لأنه صعبان عليك 

الميكروباص مش مكانه .. 

طبعاً ركاب الميكروباص فيه منهم أنواع مختلفة

زي اللي مش معاهم فكة دايمًا ودول بدون كلام 

هما بنات مش امتى نازلة من البيت معاها ١٠٠٠ جنيه ورقة واحدة 

والأجرة جنيه ونص .. 

واللي عكسه تمامًا ، صاحب الفكة ، وده بيحل أزمة مواقف كاملة 

ولو انت سواق وراكب معاك النوع ده 

يبقى تأكد إن ربنا بيحبك وأمك راضية عنك 

ده غير اللي بيفاصل ، وده راكب عنده جملة واحدة 

في دوره .. يعني هو المخرج عايز كده 

ده بيركب يقول أنا بركبها كل يوم بكذا وبينزل 

السواق قال خمسة جنيه يقول أربعة

قال أربعة يقول ٣ ويحلف أيمانات إنه بيركبها كل يوم ب ٣ 

ده غير الراكب أبو شيلة ، اللي شايل ومحمل 

وواخد نفر وشايل فوقع نفرين 

والقرفان والمضايق والمبسوط وكتير الكلام 

وأنواع كتير جدًا ما بتخلصش 

حاولنا النهارده في مقالنا نتكلم على أهمهم 

ياريت لو مريت بتجربة مشابهة للي اتكلمنا عنه

تقولنا في الكومنتات.. وما تنساش

تعملنا لايك وتشترك في المدونة

علشان يوصلك كل جديد

وبكده تكون انتهت مقالتنا النهارده عن

أنواع ركاب الميكروباص.. 

وأشوفكم على خير