الشحاتين وأنواعهم .. مهنة بتكسب دهب 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن اللي ماليين الشوارع والحواري وع القهاوي 

عن اللي عاملين فيها غلابة .. عن أبطال في أدوار رئيسية

من غير شهادة ولا كارنيه نقابة 

ممثلين ، بيعرفوا يتقمصوا كل دور كويس قوي 

لدرجة تخليك تقتنع ، وتفر الدمعة من عينك 

وتقوم على حيلك لو قاعد وتقطع ايديك من التصقيف 

مقالنا النهارده عن الناس اللي عايشة على قفانا 

مدعيين الفقر والغلب ، وحساباتهم فيها ملايين 

اللي تشوفهم تقول لا حول ولا قوة إلا بالله

دول مش لاقيين وهما بيفطروا ويتغدوا ويتعشوا من كنتاكي 

لعند ما جالهم كوليسترول

عن أصحاب الفلل والعمارات من الباطن .. 

أصحاب المشاريع الاستثمارية الكبيرة 

اللي الصبح بشكل وصورة تخليك تقول دول مساكين 

وبليل بشكل تاني يخليك تقول عليهم بشوات 

وهما بشوات بجد .. أصحاب المقام العالي 

اللي مش تعبانين فيها ، وواكلينها والعة 

مقالنا النهارده عن الشحاتين .. والشحاتة والشحاتين 

ظاهرة موجودة في كل حتة في العالم .. في مصر 

وبره مصر .. طبعاً في أم الدنيا هتلاقيلها شكل وطعم تاني 

وبتحتاج مجهود أكبر من بره مصر بكتير 

يعني تلاقي الشحات بره راجل شيك كده 

قاعد في مكانه وحاطط جنبه يافطة وطبق

ولا تلاقيه بيعزف آلة موسيقية ومستني اللي يبصله 

انت بقى حطيت في الطبق ده فلوس وانت معدي كتر خيرك

عديت من غير ما تكلمه برضه محصلش حاجة 

انما هنا في مصر وبعض الدول العربية .. الموضوع بيحتاج مجهود أكبر 

من كتر ما احنا ناصحين ، وبقينا فاهمين يعني ايه شحاتين كويس

فما بيخيلش علينا الكلام ده ، لذلك الشحاتين كل شوية

بيحصلهم طفرة جينية وبيطوروا أساليبهم 

 الشحاتين في ما بيقعدوش مستنيين في مكانهم 

الشحاتين في مصر بيجولك لحد عندك ايًا كان انت قاعد فين 

ورايح فين وجاي منين .. هو انت بالنسبة له فريسة 

والنبي لو شافك أعمى وقاعد على كرسي بعجل وطالع من السجن 

لازم ياخد حاجة منك ، ومش له طبعاً.. ده لله 

الشحات المصري أو العربي بيتميز عن أي شحات في الدنيا بالنشاط 

فتلاقيه ملتزم بمواعيد شغله ما بيفكرش يوم ياخد اجازة 

ودي شغلانة يتاخد منها اجازة برضه ؟.. 

معقول هيضيع دخل يوم بحاله ؟ ودي تيجي ؟

هو كده كده معتمد إنه هيروح شهر في الصيف هاسيندا 

تنزل الصبح ، تنزل العصر ، تنزل الفجر تلاقيه 

هو موجود ومحاوطك من كل حتة ، عايش معاك 

وحافظك أكتر من نفسك .. ومهما كانت سرعتك 

هيجيبك ويوقفك ويثبتك لعند ما يقول الكلمتين 

اديته حاجة .. يبقى كتر خيرك ، ما اديتوش 

يبقى انت راجل ظالم وقاسي ومش حاسس بيه وقلبك حجر 

يا مفتري ، يا غني يا أبو ٢٠٠٠ جنيه في الشهر 

يا اللي مش حاسس بالشحات ابو ٢٠٠٠ جنيه في اليوم 

والشحاتين بينقسموا لأنواع  كتير 

احذر منهم عموماً كلهم .. واحنا النهارده هنركز على كذا نوع بس

 

النوع الأول : الرخم 

الخطير .. القرادة اللي ما بتطلعش إلا بالدم

اللي معندوش دم ولا كرامة .. متعدد السيناريوهات 

وصاحب الردود السريعة على كل كلمة رد 

على كل لأ هتقولها هيقولك بس أصلي ما كالتش 

ما شربتش .. ما اخدتش الكوفي بتاعي .. 

ما روحتش مصيف السنة دي.. عنده ألف حجة 

وألف مبرر يخليه يبتزك وياخد منك اللي في جيبك 

وما عندوش مشكلة يفلسك ويروحك ملط 

بس هو يسهر في بار الليلة دي 

والشحات الرخم ده ما بدأش الكارير بتاعه رخم 

هو كان شحات عادي جدًا .. حافظ كلمتين 

ولا ماسك روشتتين في ايده وبيحاول يسعى 

لكن ده من كتر ما الناس حفظته 

وبقى عارف إنهم مش هيصدقوا أي حاجة هيقولها 

كبر دماغه من كل حاجة ورمى الروشتات في الأرض 

وقالك بس .. هي مش هتيجي إلا رخامة 

 الشحات الرخم ده بتلاقيه دايمًا في المواقف ومحطات القطر 

وده مش هيسيبك الا لو اديته اللي فيه النصيب 

هيفضل لازقلك لعند ما تديله حاجة 

والراجل ده عنده ذكاء رهيب ودارس علم الفراسة 

لأنه بيعرف يختار ضحيته كويس من نظرة عين

الشحات ده مجرد ما بيبص في عينيك

 بيعرف انت هتتكسف منه او لأ 

هترضخ لزنه ورخامته ولا بالك طويل 

وبناءاً عليه بيتحرك .. ويهجم على فريسته 

تبقى انت طالع عينك طول اليوم في الشغل 

وهو في جيبه يوزنك فلوس بس هو عايز منك جنيه 

جنيه واحد بس .. وهو الجنيه هيفقرك ؟

ده طبعاً قبل التعويم .. دلوقت أبسط كلام خمسة جنيه

ولو اديته جنيه ممكن يشتمك بالأم عادي

ويحسسك إنك جرحت كرامته ولازم انك تعوضه بورقة ب ٢٠٠ 

عن الآثار النفسية اللي سببتها ليه  

والشحاتين من النوع ده.. بيكونوا أوفياء لمهنتهم 

واوفياء لموهبتهم في الشحاتة.. فمفيش ملل أو كسل 

هتطلع يعني هتطلع ، هو لو مش مكسوف كان مد إيده وخد هو 

لكن خايف يتمسك سرقة .. 

والشحات الرخم .. أقوى أنواع الشحاتين 

هو معتمد إنك طالع من بيتك قرفان

أو داخل بيتك قرفان .. هو معتمد انك قرفان عموماً في أي وقت 

فتلاقيه زن زن زن .. وإنت عايز تشتري دماغك

طب دماغك الحلوة ومزاجك الرايق دول 

يندفع فيهم كام بقى ؟ ولا مال الدنيا 

هو مش طماع هو هياخد اللي يخليه يحل عنك بس 

ولازم العملية دي تتم بأسرع ما يمكن .. 

الراجل عايز يلحق يشوف غيرك .. عنده تارجت 

مش زيك يا موظف يا كحيان .. فإخلص وإنجز 

وشخلل علشان تعدي .. 

والراجل ده بيحطك بينك وبين نفسك في مقارنة 

بتدور في دماغك طول ما هو بيطاردك 

و بيكون عارف انه هيكسبها هيكسبها 

يا ترى الخمسة جنيه ولا التلاتة جنيه أرخص

ولا شريط البنادول بسبب الصداع اللي جابهولك ده ؟

فبتلاقي نفسك بتقلب نفسك سريع سريع 

وتتكل على الله وهو يتكل على الله هو كمان 

الراجل عنده شغل وانت معطله ومضايقه .. يا رخم 

النوع الثاني : شحات المونولوج

سيد رجب الشحاتين .. الراجل اللي صدره مليان نياشين

ودولابه مليان بجوايز الدولة التقديرية 

نجم الرصيف الأول .. صاحب الإحساس 

والأداء المتعدد والصوت الجهوري 

والراكور اللي ما بيغلطش .. الراجل اللي حافظ الاسكريبت 

أكتر من اللي أسامة أنور عكاشة 

شحات المونولوج .. عرض مسرحي في الشارع

أو في المترو ، تقدر تتفرج عليه وتستمتع بيه ببلاش 

يوازي في نجاحه نجاح عروض برودواي

كمية مشاعر مختلطة ، بين بكا واستعطاف 

وفرحة بكل جنيه داخل جيبه .. مش معقول

جرعة من الفن المكثف الغير مبتذل .. 

تخليك تستغرب .. هو إنت ليه صورتك مش على قفيش ؟

و النوع ده من الشحاتين بيكون متدرب كويس

وعارف كويس هو هيقول كلامه ازاي 

وهيقف فين وكاميرته فين واضائته فين 

وعارف ياخد نفس امتى ويضغط على أي جملة 

وعارف ومستني السوكسيه 

النوع ده من الشحاتين هو ذكي قوي ومركز قوي 

بس احيانا بيكون متكرر.. 

يعني لو انت من الناس اللي بتركب مترو طول الوقت 

هتلاقي شحات بيركب المحطة الفلانية يتحرك ويقف في النص 

وياخد اضائته ويبدأ يقول المونولج اللي اتدرب عليه 

هو هنا بيعتمد على الزبون الجديد الطياري 

لكن بالنسبة لك كحد بيتكرر الموقف ده قدامك يوميًا ما بيفرقلوش 

والشحات ده انت كمان كنمرة محروقة وزبون دايم ما بتفرقلوش

لانه عارف انه مش هيعرف يحرك مشاعرك 

وده من شدة ذكائه مس هيجيلك 

هو عايز الفريش .. اللي واضح عليه إنه إتأثر 

وباين من لغة جسده إنه أول مرة يركب مترو 

وواضح على وشه إنه ناقص يقوم يساعدك 

ويلماك الغلة ويزعق في الناس بصوت عالي

هو انت إيه ؟ ما بتحسوش .. الراجل بيتعالج 

انتوا ما عندكوش قلب .. وتطلع وتديله 

ضحك عليك ، وخلاك تتعاطف معاه يدخل عليك دخلة 

تخليك تأنب نفسك طول الليل إنك ما ادتوش كليتك

وروحت بكلية واحدة تكفيك باقي عمرك 

ملامحه بتترسم جواك وأداءه بيفضل عايش معاك ومتأثر بيه 

وصوته بيرن في ودنك طول الوقت 

وهو بيقول عاجز وبصرف على تسع عيال وأمهم 

ما هو ده كتير برضه يا عم الحاج 

امال لو مش عاجز .. بس هو خطفك 

ونساك تفكر بأي منطق ، نساك نفسك من كتر ما هو لابس الشخصية 

ومشاك من المسرح أو المترو ودموعك على خدك 

وخلاك تشوف الناس كلها قلبها حجر 

إزاي راجل زي ده يروح من غير الألفين تلاتة اللي اتعود يعملهم كل يوم 

يعيش إزاي ؟ ولا يدفع أقساط الشاليه بتاعه ازاي ؟

ولا يقضي الويك اند ازاي ؟ 

يعيش إزاي ؟ إزاي ؟ .. خد فلوسك 

وخد معاهم قلبك ومشاعرك وتعاطفك 

وسابلك ذكرى سودا أول ما تفهم 

لو كان ليك عمر أو تركب من نفس المحطة وتلاقيه 

ولا تقابله في شيل اوت بيفول البي ام دابليو 

هتكتشف الحقيقة المرة .. وساعتها هتضرب نفسك بالجزمة

مش علشان إنك اديته فلوس وشربتها يا كرودية 

لأ .. علشان إنت كانت تايهة عنك فين الشغلانة دي

وتقعد تندم على سنين راحت في جامعة ومذاكرة 

مش كنت اشتغلت شحات وكان زمانك مكانه دلوقت

ولكن انت فاكرها سهلة .. ما تعرفش إيه بيحصل في الكواليس

ما تعرفش راجل زي ده علشان يوصل للحالة دي

اتدرب قد ايه .. طب عمل ميك أب فين ؟

طب فشل كام مرة وروح بألف وتسعمية جنيه بس 

ما تعرفش حاجة .. ولا حد يعرف .. ودي شطارته 

لأن اليوم اللي هتعرف فيه .. هتبطل تديه 

وهتبطل تصدقه .. وده ممكن يؤدي لإعتزاله 

قبل ما ياخد الإقامة الذهبية لدبي .. ودي كارثة 

النوع الثالث : الشحات الحاقد 

وده أسوأ أنواع الشحاتين وأخطرهم لأنك مش هتعرف تتجنبه 

ولو لمحك بتبعد عنه علشان ما يطلبش منك حاجة 

هياخد منك حاجة انت مش متخيلها .. 

يا إما بقى راحة بالك أو تلاقيك فلست 

أو عملت حادثة موت بالعربية اللي عليها أقساط 

أو فقدت قدرتك الجنسية .. ولا اتجننت 

هياخد منك هياخد .. يبقى ياخد فلوس بقى أحسن 

ولا ياخد كل حاجة .. ؟ لا تغور الخمسة جنيه

والنوع ده خطير لأنه فيه صفات تكفي ٣ أشرار من بتوع الأفلام دول

فهو مش بس شحات .. ودي مصيبة .. 

لا ده شحات وحاسد وحاقد وياكل مال النبي 

والنوع ده من الشحاتين بيلعب لعبة نفسية كبيرة جداً 

يصعب على أمثالنا فهمها ، وبتفوق إدراكنا بكتير

ودي بتجيب نتيجة في أغلب الأحيان وبنسب نجاح كبيرة

والطريقة انه يبصلك بصة انك قادر تشتغل وهو لأ

او انت شكلك حلو وهو لأ.. لابس كويس وهو لأ

ماشي على رجليك وهو لأ .. مع انه بيمشي عادي 

بس أهوه كده .. متجوز وهو لأ .. المهم 

إنه أي حاجة عموماً وهو لأ.. ويحسسك إنك واكل أكله 

أو إنت وأمثالك من الشقيانين اللي طالع عينهم 

إنتوا السبب في اللي هو فيه .. 

إنتوا المجتمع الظالم اللي خلاه يقعد قاعدة زي دي يشحت 

ويفضل الذنب ياكل في جتتك .. وتأنب نفسك 

وتدي عبر لنفسك .. كان زماني مكانه دلوقت

ياريت يا أهبل.. ده كفاية الأملة اللي هو فيها 

البصة دي في الأول بتكون استعطاف ليك 

ولو عملتها أو لو فكرت مجرد تفكير انك ما تدلوش حاجة 

بتتحول نظرة الإستعطاف دي لنظرة حقد 

وحسد .. وغيرة غير مبررة .. هتفهم نتايجها بعدين 

و ربنا ما يوريك .. تروح لو انت متجوز تطلق

وطبعاً لو طلقت يبقى هتعيش في الشارع بعد ما طليقتك

هتاخد الشقة باللي فيها .. لو انت شغال

هتروح تلاقي رسالة ع الواتس اب بخبر إن الشركة قفلت

يعني مش انت اتفصلت .. لأ دي الشركة كلها في ذمة الله 

و لو كنت مروح في دماغك حاجة كده ولا كده إنسى 

علشان هيبقى شكلك وحش قدام المدام 

والشحات الحاقد عمره في المهنة طويل

لأنه ضامن إنه هياخد منك حاجة زي ما قولنا 

فيبدأ في عملية تصفية لكل اللي ما بيعبروش 

ويوقع ضحايا في بلاوي بسبب حقده

لعند ما تصفصف على الغلابة .. اللي بيدوله كل يوم 

الإتاوة .. اللي تخليهم يتجنبوا شره 

والنوع ده من الشحاتين ، استحالة يحط نفسه مكانك 

وملوش علاقة بوضعك .. وضعك لنفسك 

فين نصيبي أنا طيب .. ؟ مع إنه لو حط نفسه مكانك 

هيتف على نفسه ويستقيل ويطلق المدام وينزل يشحت بكره عادي 

النوع ده من الشحاتين لو دخل جواك هيعذرك

وتبقى مصيبة .. لأنه ساعتها هيفقد سلاحه ونقطة قوته 

ومجرد ما هيعذر الناس مش هيطلع منهم جنيه  

احيانًا تبقى ماشي كاره جزمتك وتلاقي شحات بيبصلك انك احسن منه

طب ما تيجي تجرب.. ده انت مليونير يا عم 

هو بالنسبة له ده كلام فاضي .. 

وشايفك أهبل من الآخر انك مضيع عمرك ولسه ما شحتش 

نصيحتي ليك لو قابلت النوع ده من الشحاتين لازم تديه 

خليه يطلع عينه من حياتك.. ومش لازم يدعيلك 

بس احسن ما يدعي عليك 

النوع الرابع : الشحات الدبلوماسي

وده البرنس بتاع المجال .. ده إبن الناس ، اللي لما فشل في سياسة واقتصاد 

شحت .. وقال لله .. بس بطريقته 

والنوع ده من الشحاتين بيعرف يعمل حاجة مهمة جداً 

ومهارة مش موجودة عند اتخنها مدير مبيعات

الايس بريكنج أو كسر الجليد

ده شحات اول ما بيشوفك من بعيد يعرف دخلتك 

يبلفك فورًا.. ليك في الضحك يضحك معاك 

ليك في الكورة يلاغيك.. ليك في الاكل يلاغيك

المهم انه ياخد انتباهك وخلال 10 ثواني يكون مسك ايدك 

ويقولك اخوك جعان وعايز يشتري سندوتش 

أنا مرة واحد من دول دخل عليا الساعة ٩ بليل 

خلاني فضلت أصرف عليه للصبح 

مش علشان حاجة .. بس قاعدته ما يتشبعش منها ابن الايه 

نوع الشحاتين ده انا شايف انه مش مستغل كويس 

لان الراجل ده عنده قدرة على التفاوض رهيبة 

وعنده مهارات مش عند حد 

وهو يقدر من بكره يشتغل في اكبر شركة مالتي ناشيونال 

بس الشحاتة بتكسب اكتر 

ويقدر يدخل في أتخنها صفقة يخلصها 

ولو بعتناه يباشر القضية الفلسطينية

هيحلها في ثانية إلا ثانية 

الشحات الدبلوماسي ، يقدر يشتغل شغلانات كتير

تقدر تشوفه مرة بتاع تنمية بشرية 

ومرة تانية اتش آر بيبعلك وظيفة بمرتب قذر 

ومرة تشوفه بتاع تسويق شبكي 

ومرة تانية تشوفه بتاع تايم شير

لكن هو كبر دماغه لكل ده .. وباع الهوا .. 

حتى الهوا ما بتاخدوش .. ولا بيقولك كلمة حلوة 

ولا بتاخد منه دعوة تنجيك .. لكن انت بتديله 

علشان انبهرت بيه مش أكتر 

الشحاتين أنواع وأشكال .. فيه منهم اللي هيقنعك بيه 

ومنهم اللي هيفشل يحط ايده في جيبك 

لكن وجودهم مهم ، وبيكمل اليوم لو كان ممل

وبكده نكون وصلنا لنهاية مقالنا النهارده عن الشحاتين في مصر

لو مريت بتجربة مشابهة للي اتكلمنا عنه في المقال النهارده

ياريت تقولنا في الكومنتات

وما تنساش تشترك في المدونة علشان يوصلك كل جديد 

كريم يارب