" هل كل الأشياء تستحق الحزن ؟! .. قبل ما تزعل استنضف "

قبل ما تزعل استنضف .. قبل ما تقفل على نفسك فكر كويس 

هو إيه السبب اللي أنا هزعل علشانه ده ؟

هو يستاهل زعلي ؟! 

هو أصلًا كان في يوم سبب في فرحي ؟!

ولا أنا لما اخترته استرخصت قوي ؟ .. استرخصت قوي !

يبقى ما تكررش الغلطة دي تاني وتسترخص 

في اختيارك مين اللي تزعل عليه 

ومين اللي ما يستاهلش زعلك .. 

بستغرب قوي من حالنا .. إزاي قادرين نحب ونخلص

وكمان لما اللي حبيناه يبيعنا نزعل عليه ؟

إيه الطاقة دي ؟!

هو إحنا إزاي معندناش الطاقة دي لنفسنا ؟

ليه مش قادرين لما نحب نحب نفسنا ؟

ليه مش قادرين لما نخلص نخلص لنفسنا ؟

ليه لما نختار إننا نزعل على حاجة تبقى الحاجة دي نفسنا وبس ؟!

ما تفكرش إن حد ممكن يعاملك بطيبة لطيبة قلبك 

وما تفكرش إن طول ما دمعتك قريبة فدي حاجة كويسة 

ما تخليش زعلك سهل ولا دمعتك رخيصة تنزل على حد رخيص

الدموع غالية وما تنزلش إلا للغاليين 

اللي واجب عليك تزعل لزعلهم أو لفراقهم 

إنما الرُخاص عقابهم الوحيد التجاهل 

وزعلك لفراقهم ضروري يكون زعل على نفسك مش عليهم 

زي ما اختارتهم في يوم وغلطت 

إقعد مع نفسك وفكر دقيقة ، هما يستاهلوا الزعل ولا لأ ؟

إختار اللي يتزعل عليه من اللي خسارة الزعل فيه 

زي ما اختارت في يوم صديقك .. اختار عدوك 

ما تبقاش غلطت في اختيار الناس 

وبرضه تغلط في حق نفسك وتسترخص اللي تزعل عليه منهم 

كمان مش أي حد ينفع يزعلك 

فيه ناس صحبتهم خسارة والزعل عليهم 

إستسلام ويأس إنك مش هتلاقي حد يعوضك خسارتهم 

خايف تكون لوحدك .. 

طب هو من امتى وانت محتاج حد ؟

وهل لازم علشان تفرح وتحس بإنجاز يبقى في حياتك حد ؟

إفتكر انك عشت لوحدك كتير 

وآمن إنك لسه هتعيش كتير برضه لوحدك 

الوحدة مش حاجة وحشة زي ما احنا فاكرين 

الوحدة أحيانًا بتكون طريق للسعادة والسلام النفسي 

ودايمًا بتكون أستاذ بيعلمك ويفرق في حياتك

كام مرة كنت لوحدك واستفدت من حالة الوحدة دي ؟

كتير.. أكيد كتير 

إحنا اتولدنا لوحدنا ، وبنعيش لوحدنا 

وبنموت ونتحاسب لوحدنا .. 

طب مادام الوحدة شيء قدري وهيحصل هيحصل 

ليه بنخاف منها ؟ وبنزعل علشان مقبلين عليها 

ما بقولكش عيش لوحدك وبطل تعامل الناس

لا عادي صاحب وحب .. بس اختار صح 

وحط كل واحد في مكانه وحجمه الطبيعي 

حط كل واحدة في مكانه اللي يستاهله 

وخلي بينك وبين الناس مسافة بتاعتك لوحدك

فيها كرامتك اللي محدش يقدر يقرب منها 

أحلامك اللي الناس مجبرة تحترمها 

زعلك اللي مش لأي حد 

وسيب بينك وبين زعلك مساحة تانية

مساحة تفكر فيها في إختيارك وتفلتر فيها 

مين اللي يتزعل عليه .. مين يستاهل زعلي 

وقبل ما تزعل .. استنضف