عقوق الأباء للأولاد.. هل العقوق حصرًا على الوالدين ؟!

 

عقوق الأباء للأولاد.. هل العقوق حصرًا على الوالدين ؟!

طول عمرنا بنسمع عن عقوق الوالدين

وإن طاعتهم واجبة حتى لو على حساب سعادتنا

لكن عمرك سمعت عن عقوق الأولاد ؟

عمرنا ما سألنا نفسنا سؤال مهم .. 

هو مين بيربي مين ؟ مين اللي بيعلم التاني الحنية أو القسوة ؟

هل الأولاد بتكبر تعامل اهاليهم بجفاء وبرود

وبيوصل أحياناً لكره فجأة كده منهم لنفسهم ؟

ولا الأهالي هي اللي بتعلمهم ده ؟

هما اللي بيربوهم على الكره .. 

عمرك تخيلت إنك كأب ممكن تكون عاق لأولادك 

ومش بار بيهم .. مش العكس ؟

عمرك تخيلت إن كل كلمة جافة بيقولهالك إبنك

انت اللي علمته حروفها في يوم من الأيام 

عمرك حاسبت نفسك على التقصير في حق أولادك ؟

ولا بتحاسبهم بس على تقصيرهم في حقك ؟

طبعاً هتقولي تقصير ايه وبتاع ايه ؟

ده انا بموت نفسي في الشغل علشان أخليهم مش ناقصهم حاجة

بياكلوا أحسن أكل .. وبيلبسوا أحسن لبس وبيتعلموا أحسن تعليم 

صح .. من الناحية دي إنت مش مقصر 

بس أحب أقولك إنك فاهم الأبوة غلط 

وانتي فاهمة الأمومة غلط .. 

مين اللي قالك إن ولادك كل اللي محتاجينه منك 

أكل ولبس وتعليم ؟ .. مش يمكن يكونوا

بيبالغوا في احتياجاتهم دي علشان عندهم فراغ نفسي 

مش حاسين بوجودك معاهم فبيحاولوا ياخدوا منك أي حاجة 

مين قالك إن دورك كأب مقتصر على الفلوس وبس ؟

هو انت عارف يعني ايه أب ؟

انتي فاهمة يعني ايه أم ؟

طب بلاش دي .. ما جربتش مرة تحضن ولادك ؟

ما فكرتش تقولهم كلمة حلوة وتشجعهم ؟

ما جربتش تسمعلهم .. بدل ما تخليهم بيدوروا بره ع اللي يسمعلهم ومش لاقيين

ولا انت بتصرف عليهم وبس ؟ 

زمان لما كنا بنشوف حد مجرم أو عامل مصيبة 

كان أول وصف بيجي في بالنا إنه مش متربي

ما بنقولش ده مش بياكل كويس ، ولا بيلبس كويس 

بنقول عليه مش متربي ، يعني محدش قعد معاه

محدش فهمه الصح من الغلط .. مش أجبره ع الصح من غير ما يفهم 

قولي بقى .. إمتى آخر مرة قعدت مع ولادك ؟ .. من زمان مش كده

فما تستغربش بقى لما تلاقي نفسك بعد ما ربيت وكبرت وصرفت 

بتتعرض للتجاهل ، محدش بيقعد معاك ، محدش بياخد رأيك في حاجة 

هو انت كنت أخدت رأيهم في حاجة قبل كده ؟ 

انت كنت بتعاملهم كقطعة ديكور في البيت 

لازم تلمعها علشان تظهر قدام الناس شكلها حلو 

فيبقى شكلك انت حلو .. مش أكتر 

بستغرب من كم الناس اللي بتفضل تدور على الحب

في صاحب ولا حبيب وتقدم قصاد ده تنازلات كتير جدًا 

وبيغيروا مبادئهم وأخلاقهم مقابل إنهم يتحبوا

بس لما بسمع قصصهم منهم ، بعرف انهم بيعملوا كل ده لسبب بسيط

الناس دي محدش حبها بجد .. محدش حضنها 

محدش قالها كلمة حلوة ، فبيفضلوا يدوروا على اللي يقولهم كلمة حلوة 

ومهما اتقالهم ما بيشبعوش .. لأنهم خارجين من بيوتهم جعانين 

مش جعانين أكل ولبس وتعليم .. جعانين حب .. 

برضه كنت بستغرب لما أشوف حد عنده استعداد يخسر كل الناس 

بكل سهولة وملوش عزيز.   بس لو دورت وراه 

هتلاقيه محدش حضنه وهو صغير .. محدش حسسه انه عزيز وغالي 

الشارع مليان بمرضى نفسيين ملهونش أول من آخر 

اللي مش واثقة في نفسها وبتاخد ثقتها من اللي حواليها 

واللي مشتت ومش عارف ياخد قرار

واللي تايه واللي ظالم واللي عايش دور الضحية 

واللي أناني . وغيرهم كتير .. 

كل دول ما اتربوش .. ما اتحضنوش وهما صغيرين 

محدش سمعلهم .. كل دول تعرضوا لعقوق 

لأ وكمان مطالبين لما يكبروا انهم يبروا أهاليهم 

طب ازاي ؟ ازاي يبرك ويعاملك كويس 

وانت سبب مشاكله في الحياة ؟ 

انت سبب توهانه ، وسبب جحود قلبه 

فما تستغربش بعد كده .. لما تتفاجئ 

إن ملكش مكان عند ابنك ، ما تتفاجئيش 

انك آخر حد بيعرف عن بنتك اسرارها 

وانها بتفضل صاحبتها عليكي .. لأنك ما بتعرفيش تسمعي 

ما تستغربوش انكوا مش مهمين في حياة أولادكوا 

انتوا اللي حطيتوا نفسكوا في الخانة دي 

انتوا كأب وكأم .. كنتوا عاق ..