الإبتزاز العاطفي .. سرقة لا يعاقب عليها القانون

نكران الجميل أوحش إحساس ممكن تحسه في حياتك

لأنك بتكون عامل كل اللي عليك وزيادة

وبتكون فاكر إنك علشان بتتعامل بطيبة 

وبتقدر مشاعر الطرف التاني 

فمن المفروض إنك تتعامل بالمثل 

والسبب اللي انت بتكون متخيل إنه هيتشالك جميلة

وإنك المفروض هتتعامل أحسن معاملة بسببه

بيكون هو الدافع ورا خذلانك ، وبيكون هو السكينة 

اللي بتجرح قلبك بكل برود 

كل ده بسبب إنك عامل اللي عليك وزيادة

عامل اللي عليك من غير ما ينطلب منك 

فبتعود اللي معاك على الحاجة دي 

ومع الوقت بيعتبرها حق مكتسب

وأنا صغيرة اتعودت إني أعمل حساب صاحبتي 

اللي معايا في الفصل في كل حاجة 

زي ما بشتري لنفسي بشتريلها ، 

كل يوم كنت أعمل حسابها في السندوتشات معايا

كنت ببقى مبسوطة وانا شايفاها 

بتاكل من اللي انا باكل منه ، وفرحانة باللي انا فرحانة بيه

لحد ما في يوم نسيت ، لقيتها بتعاملني وحش 

وبتحاسبني وبتعتبر ده تقصير مني في حقها 

مع إنه كان في الأول مش مطلوب مني 

بس بقى مع الوقت حقها وانا مقصرة فيه

ماهانش عليا زعلها ، وعلشان أصالحها 

عرضت عليها أقسم سندوتشاتي معاها 

ومع انها معاها سندوتشات ، إلا إنها ما اتصالحتش 

إلا أما أخدت سندوتشاتي كلها كعقاب ليا

وما كانش عندي مانع بس تبقى مش زعلانة 

وهي كمان مكانش عندها مانع إني أفضل جعانة طول اليوم

ومن يومها علاقتنا ما رجعتش زي الأول

لأن صاحبتي اللي كنت بحس إني ملكت الدنيا 

لما اشوفها فرحانة باللي انا فرحانة بيه 

عمرها ما زعلت لزعلي .. عرفت إن ده مش حب

ولا له علاقة لا بصداقة لا وأخوة

ده كان مجرد إبتزاز عاطفي 

صاحبتي كانت بتتغذى على إحساس إنها مهمة عندي 

وإني ما اقدرش أعيش من غيرها 

كانت بتستمد ثقتها في نفسها وقوتها من ضعفي 

وكانت بتستمتع كل ما تحس إني زعلانة لزعلها 

اللي كان بيتحول لفرح ، ومن سذاجتي 

كنت بترجم فرحها المفاجئ ده إنها مبسوطة لأني زعلانة لزعلها

ما كنتش أعرف إن سر سعادتها نابع من ثقتها 

إنها بتمتلكني .. 

أنا بعدها قابلت الإبتزاز العاطفي في كل حاجة 

وفي كل مرحلة من مراحل عمري 

مع أهلي اللي مستعدين يشوفوني حزينة 

لمجرد إني أرضيهم وأختار اللي اختاروه

مستعدين يشوفوني بدبل بس ما اكسرش ليهم كلمة 

بحجة إن رضا الأهل من رضا الرب وكده يعني 

قابلته في زمايل الجامعة اللي بمجرد ما حد منهم 

يحس إني بعزه وبميزه عن الباقي ، يستغل معزتي عنده 

وبالتبعية يستغلني أنا شخصياً أسوأ إستغلال 

يجي على مشاعري ويخليني أشوف نفسي قليلة 

ما أنا بعزه بقى ومش هزعل منه ..

قابلت الإبتزاز العاطفي في أول حب ليا

واللي كنت بشوف فيه الدنيا بحالها 

وهو كان بيشوف فيا الحاجة اللي مهما هنت مشاعرها 

هتفضل برضه متمسكة بيا .. كان بيشوفني حاجة مش حد

مش انسانة عندها مشاعر وبتزعل وممكن تنفر وتبعد

وقلم ورا التاني .. اتعلمت 

اتعلمت اني ما اتعلقش بحد ولا احب حاجة أكتر من نفسي

اتعلمت إن الحد الوحيد اللي مش هيخذلني هو نفسي 

وإني لما بقصر في حقها وبخذلها 

بكون جاهزة إني أتعرض للخذلان والإبتزاز من أي حد 

لازم تعرف إن نفسك هي أغلى حاجة في الدنيا 

وإن سعادتك بتخرج من جواك 

ومستحيل تعرف تستمدها من حد

و لو علقت أملك في يوم في حد غير نفسك 

هتخسره وتخسر نفسك معاه 

وساعتها مش من حقك تلوم حد على خذلانك .. إلا نفسك لو حاسس انك مريت بنفس الحالة ياريت تقولنا في الكومنتات ، وماتنساش

تشترك في المدونة علشان يوصلك كل جديد

وأشوفكم على خير في مقال جديد