أنواع العرسان (الجزء الأول) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن شركاء الحياة ، أو اللي مرشحين للمركز ده 

الناس اللي لسبب ما شافوا أنه من الممكن يكملوا حياتهم

كلها مع شخص بعينه فدخلوا الباب من بيته 

ناس اللي بينطبق عليهم مثل .. ساعة القدر يعمى البصر

موضوع حلقتنا النهارده عن أنواع العرسان 

وده بعيدًا تمامًا عن اننا نقسمهم لعرسان صالونات أوعن حب 

لا احنا هنقسمهم تقسيمة تانية تمامًا .. هنقسمهم 

وفقًا لحالتهم النفسية والذهنية ، والأهم المادية 

أمثال كتير بتدور على الجواز ، كان أبرزها 

يا واخد القرد على ماله يروح المال ويبقى القرد على حاله

بس أنا أعتقد إن المثل ده ملوش مكان اليومين دول

يا جماعة الفلوس بتحلي فعلاً .. يعني مش بتحلي بس الشكل

لا دي بتحلي الأيام كمان ، وبتخلينا نشوف القرد في عين عروسته غزال

وده ما يشغلناش دلوقت قد ما يشغلنا هو العريس 

جاهز بنسبة قد إيه .. وأولهم وأسرعهم وأجهزهم 

النوع الأول : المستعجل

والنوع ده من العرسان دايمًا تأكد من قبل أي كلام 

ومن قبل ما نسأل بعضنا عن العمر 

ومن قبل ما نخون بعضنا بعد ما نسأل بعضنا عن العمر برضه 

ونضطر نطلع بطايقنا لبعض علشان كتر الحلفان ما جابش نتيجة 

من قبل كل الكلام ده .. العريس مادام مستعجل 

فده معناه حالة من تلات حالات .. 

يا إما هو كاسر التلاتين .. يا إما حد من أهله بيودع 

أبوه أو أمه بيخلصوا وباقيلهم أيام في الدنيا

يا إما راجع من دولة عربية يخطب ويخلص ويطير 

حاجة كده شبه فيلم جاي في السريع .. 

في التلات حالات ، لو انتي مصنفة نفسك انك عروسة 

وجاهزة انه حد يشيلك ويجري ومش هتفرق 

فالعريس ده بحالاته التلاتة ممتاز ، لأن ده 

شعاره أصلاً.. حمل وشيل .. ده من النوعية اللي بيقول

الخطوبة وكتب الكتاب يوم الخميس الجاي 

فلو هو كاسر التلاتين ومستعجل يعني جاهز ومستقر ماديًا 

ومش هتتخانقوا كل يوم بسبب المصاريف 

وكمان قرفان من علاقات الدنيا .. فمفيش نفس للخيانة

بالعكس هو جاي يتجوز علشان يستقر 

فمناسب .. مناسب جدًا كمان 

ولو أبوه أو أمه بيخلصوا وعايزين يشوفوه عريس في أسرع وقت 

برضه ده في مصلحتك.. هو لا شماتة في الموت 

بس هو انت مش شمتانة .. ما كلنا هنموت 

بس يعني لما تبقي داخلة بيت فيه حماكي وحماتك

غير ما تدخلي بيت فيه فردة واحدة 

هي حالة واحدة بس تخليك ترفضي وتحطي شروط 

جامدة قوي .. لو العريس المستعجل ده جاي يتقدم

وسبب استعجاله ان أمه هي اللي هتودع 

وأبوه بيجوزه علشان يلاقي حد يخدمه .. 

فده يا اما تمضيه على كمبيالات الدنيا والآخرة

يا إما تودعيه وتخليه يرجع يخدم أبوه هو 

حتى رضا الأب من رضا الرب .. 

وفي الحالة التالتة لو العريس ده جاي اجازة 

من دولة عربية وهدفه الأساسي يشيل أي واحدة 

ويطير بيها فبرضه ده كويس مش بطال 

خلينا متفقين انك كمان سنك كبر .. وفتحتي باب الجواز

لأي حد .. صحيح مش أي حد أي حد 

بس يعني لو راجل مقبول ومقضي حياته في سفر 

وهتقضي معاه الباقي من غربته وتنزلوا

معاكوا لوكشة فلوس .. فده ممتاز .. يلا اتوكلي على الله

وصحيح العريس بالشكل ده زي القضا المستعجل

اللي هو يدخل البيت لأول مرة عن طريق حد 

رشحك له .. لا يعرفك ولا يعرف أهلك 

ولا بينكوا أي سابق معرفة .. وعايز يقرا الفاتحة 

وياخدك وهو مروح .. يعني الموضوع تحسيه خطف 

أكتر ما هو جواز ، بس بيوفر كتير 

يعني مش هتلاقيه بيدقق معاكي جبتي ايه وجهزتي ايه 

ولو مالحقتيش تجهزي حاجة معينة هو ممكن يتولاها 

هينجزك وعلشان ينجزك هيوافق على طلباتك كلها 

علشان يخلص وما يدخلش نفسه في حوارات تضيع وقت 

الخوف الوحيد بس .. ان العريس المستعجل 

يكون في حياته الزوجية برضه مستعجل 

يعني عايز يمر بكل مراحل الجواز المعروفة اللي فاتته 

يعني عايز يخطب أسبوع ، ويتجوز 

يخلف بعد ٩ شهور ع المسطرة 

ولو ٧ يبقى كويس ما جراش حاجة الواد هيبقى عصبي شوية 

والمشكلة يكون عايز يطلق بقى بعد كده ويخوض التجربة دي 

ولكن لو استعجاله للتلات اسباب اللي ذكرناهم اطمني 

مفيش مشاكل بإذن الله وقولوا لأبوها إن كان جعان يتعشى 

النوع الثاني : نص سوا 

والنوع ده من العرسان عكس اللي قبله تمامًا

هو راجل محترم داخل البيت من بابه 

وعايز يتجوز وكل حاجة .. بس هو جه بدري قوي

يعني المرحلة اللي هو فيها دي مرحلة 

واحد عايز يرتبط الأول ويتمشى بقى على كورنيش

ويجيب ورد ويحب في التليفون والكلام ده 

مش مرحلة جواز خالص ، ليه ؟

 لأنه زي ما عرفناه .. نص سوا 

في كل حاجة .. العريس ده بيكون يعني مقارنة باللي قبله 

سنه صغير .. لسه في العشرينات 

وكل حاجة عنده موجودة بس مش خلصانة 

يعني فيه شقة وشغلانة ودخل بس ما يأهلوش لجواز

وفيه مخ برضه وعقل ، بس اخرهم ارتباط 

فتلاقي بقى القاعدة بتاعته بالشكل ده 

مكسوف ووشه محمر وأكنه رايح يطلب حاجة مش ولابد

مش واخد أهله معاه لأن اكيد كلهم قالوله انت مش جاهز 

فتلاقيه جايب واحد صاحبه كان معاه في حجز كورة مثلاً

فقاله تيجي معايا مشوار .. فين ؟ هتقدم لفلانة

فصاحبه بدل ما يروح يقعد لوحده في البيت

قال أروح أفوت على الناس دي شوية 

كمان نوع اجاباته مختلف عن اللي قبله تمامًا 

وبما ان الراجل نص سوا ..فا شقتك جاهزة يا ابني 

لا هي مش جاهزة بس موجودة يا عمي .. 

ع المحارة يعني ؟ لأ أقل شوية .. 

ع الطوب الأحمر .. ؟ لا برضه انزل شوية 

أيوه ع العمدان ولا ايه ؟ لا هي الحقيقة 

مجرد حتة أرض بس ليا فيها شقة 

اه هي موجودة بس في ذهنك.. في خيالك بس 

وطبعاً ده لو خياله مريض هيجيبلكوا السكر 

طب بالنسبة للوظيفة … اه شغال وكل حاجة 

بس تحت التدريب فبياخد في اليوم ٢٠ جنيه مثلا

شيء من هذا القبيل .. برضه فيه شغلانة بس مفيش منها فلوس

حاجة كده زي الفريق اللي بيمرر الكورة كتير 

بش مفيش ولا شوطة ع الجون 

والعريس ده بقى مصطلحاته مختلفة تمامًا عن اللي قبله

ده من نوعية الخطوبة أم تلات أربع خمس سنين 

أدونا وقتنا وكل مرحلة تاخد راحتها 

يعني مرحلة قراية فاتحة وسنة ونلبس دبلة وخاتم 

وسنة تانية ونعمل خطوبة ونلبس شبكة 

وسنتين تلاتة ونعمل فرح.. وده مش بطال 

يعني هتعرفوا بعض كويس .. بس كويس قوي 

والمدة الطويلة دي ممكن تكون سبب للخناق والخلافات

يعني خمس سنين .. ده انتوا هتتخانقوا فيهم 

٣٠ ألف مرة وفلانة راجعة بالدهب 

وعلانة واخدة الدهب ومرجعاه تاني .. وهما كلهم دبلة ومحبس

يعني الموضوع مش مستاهل ، فالعريس ده 

والخطوبة منه خطر شوية ع الطرفين 

لأن العروسة ممكن تعلق نفسها وتضيعلها 

١٢ سنة على ما يبني حتة الأرض ويعمل شقته 

ويجهز نفسه يعني وفي الاخر بسبب كتر الخلافات

ما ياخدوش بعض .. وبرضه الموضوع خطر عليه 

لأن أكيد خلال الفترة الضخمة دي .. هيظهر اكيد منافسين 

يعني الأمر ما يسلمش من ابن خالة جاي من الكويت 

ابن عمة جاي من السعودية .. كده يعني

وزن على الودان بقى .. هتستني لامتى 

وكلام من ده .. لكن امتى توافقي على العريس 

من العينة دي .. في حالتين .. الأولى

عايزة تخلصي م البيت وتحكماته وتقضيها 

خروجات رايحة جاية ومش في نيتك جواز دلوقت

والسبب التاني ، لو الواد عاجبك .. لانه ١٠٠٪

هيبقى صغير في السن وشيك .. ولسه مهتم بنفسه

الشرطين متواجدين .. يبقى نقول ألف مبروك

النوع الثالث : العريس المفاجئ

وده عامل زي الإمتحان المفاجئ بالظبط 

يعني تبقوا قاعدين في محاضرة وبتهزروا 

والدكتور دمه شربات ومفيش أي مشاكل 

فجأة تلاقيه بيقول كل واحد يطلع ورقة وقلم 

عندكوا امتحان وينكد على اللي جابوكوا

 ويقلب الترابيزة فوق دماغكوا ويدي كرسي في الكلوب

أهو هو ده العريس المفاجئ بالظبط 

انتي لسه بتدرسي أو في دماغك عيل تاني 

بتحبيه من طرف واحد أصلا ومستنياه بقى

يفهم من نفسه ويجي يتقدملك 

أو مش في دماغك الجواز دلوقت 

وممكن تكوني متعقدة وكارهة الجواز كله 

وفجأة تلاقي نفسك داخلة في قصة

انه فيه عريس لازم تبرري لأهلك 

انتي رافضاه ليه .. وهو عيبه ايه ؟

وهتقعدي لحد امتى .. ولو اتخرجتي من غير ما تتجوزي 

نسبتك قلت .. وفرصك قلت في الجواز

طب جه منين ولا ازاي ؟ أكنه وقع على الصالون بتاعكوا من السما

ولما تدوري وراه وتدققي في ملامحه كده 

هتعرفي .. شاب نزلتي من البيت يوم 

لاقيتيه مستني قدام البيت سألك عن الساعة مثلاً

عرف مواعيد خروجك ودخولك .. 

ركبتي توكتوك من على أول الشارع مع شاب من الحتة 

وأصر يدفعلك .. لا انتي عارفة هو مين 

ولا هو منين .. بس شكله من النوع المألوف 

فشاب زي ده يسألك عن الساعة الصبح 

تلاقيه هو وأمه بعد العشا في الصالون عندكوا

قاعدين مع الحاج والحاجة وانتي جاية من جامعتك 

لا بيكي ولا عليكي تلاقيهم في وشك بقى 

تعالي يا عروسة .. شفت فين عروستنا يا فلان

سألتها على الساعة الصبح يا عمي .. بس كده ؟

انت متسرع قوي على فكرة .. يعني سألتها على الساعة 

اطمنت ليها واتأكدت ان هي دي اللي تقدر 

تقضي معاها عمرك كله وتأمنها على نفسك

وعلى عرضك وعلى مالك وعلى جمالك وجمال أمك 

المهم انه العريس ده مش شرط تقبليه ولا ترفضيه 

انتي سيبي الباب مفتوح .. انتي في جامعة 

لسه بدري ويمكن الواد اللي انتي بتحبيه 

من طرف واحد ده يجي لوحده يتقدملك 

مش فاهم ليه .. بس لو العريس ده كويس 

وافقي وخديها من قاصرها .. كويس ازاي بقى ؟

يعني عنده وظيفة .. مبهور بيكي كده .. وبيقدرك قوي

بيحبك فوق الوصف .. ومش مصدق انه قاعد مع ابوكي

مش معاكي انتي لا ده هو حب وداب 

في صباع رجل ابوكي اللي خارج من الشراب ده 

وافقي فوراً.. ده لقطة مش هتلاقي حد يحبك كده 

حتى لو كانت امك .. ده هينفذلك كل اللي بتحلمي بيه 

فما تخليهوش يمشي الا وهو قاري الفاتحة 

مش هتفرق بقى شكله ايه بيلبس ازاي 

مادام بيحبك هيقبل انك تغيريه .. متعلم جاهل 

هيوافق انك تعلميه .. المهم يكون بيحبك بالدرجة دي 

لأنه ده مش هيتكرر تاني لأن محدش بيطيقك

النوع الرابع : الإتش آر 

وده بقى تحسيه أرسطو العرسان . 

ده صاحب الأسئلة ، راجل محترم عنده وظيفة

بيلبس فورمال وقمصان مقفلة لعند الزرار الأخير

أكيد لابس نضارة نظر .. تحسي الكرافاته واقفة في زوره

مش جاي يتجوز .. هو جاي يحقق معاكي 

مجرد ما قعد شوية واتكلم مع أهلك كلمتين 

تلاقيه قال كده بلهجة رسمية كده لأهلك 

ممكن تسيبونا نقعد مع بعض شوية 

قاموا ابوكي وامك .. استعدي لأكبر وأصعب 

امتحان هيمر عليكي في حياتك .. 

رياضة ٢ ولا حاجة قصاد أسئلته 

الفيزيا قدام التوتر اللي بيخلقه في الأوضة 

مجرد امتحان رسم .. خرجوا أهلك من هنا 

وفجأة نور الصالون خف .. وكل اللمبات طفت

الا لمبة واحدة بس فوق دماغك بسلك طويل 

رايحة جاية في سقف الأوضة عاملة خايلة

وده بدأ يتحرك حواليكي في الغرفة 

يقف وراكي في سؤال .. يوشوشك

في سؤال .. يعلي صوته ونيرفه يعلى في سؤال

تحسيه مش عريس عادي .. ده من الموساد 

أسئلة بقى من نوع .. لو أنا وانتي 

في شهر من الشهور حصل والمرتب اتسرق مني

هتعيشينا لاخر الشهر ازاي ؟

وانا مالي حضرتك.. ربنا يعوض عليك

لكن انا هعيشكوا .. أيوه الست لازم تكون مدبرة 

والشاطرة تغزل برجل حمار .. أيوه يعني 

المرتب كله اتسرق اتسرق .. 

هعملك ايه .. كل طين بقى .. 

لو أنا وانتي خارجين خروجة ولقيتيني بغمزلك بعيني

كده كده .. ده معناه ايه ؟ 

معناه ايه يا اخويا .. اني بقولك يلا نروح ..

طب ما تقول يلا نروح ولا انت هتخرس قدام

قولي علشان اعمل حسابي .. 

أسئلة في أسئلة بتحبي ايه بتكرهي ايه 

هتشتغلي بعد الجواز .. هتقبضي كام

ارتبطتي قبل كده ما اتجوزكيش ليه 

وهكذا كمية أسئلة لا يتحملها بشر 

والعريس من النوع ده غير انه مريض نفسي

ولكن هو بيكون شايف نفسه مفيش حد 

في الكوكب بحاله يستاهل ضفره 

فده يا اما تمسكيله الشبشب وترعبيه من أول لحظة 

يا اما تقوليله شرفت .. من غير ما تردي

على سؤال واحد .. تسيبيه حيران 

ومروح بياكل في نفسه.. ونفسه يعرف 

احابة واحدة من اجابات الاسئلة دي

وعريس الاتش ار .. ممكن توافقي عليه في حالة واحدة بس 

لو هيتعهدلك بتعهد مكتوب وممضي وعليه 

أربع شهود انه هيبطل يسأل أي نوع 

من الأسئلة تماماً.. هيبطل حتى يحط علامة استفهام 

ورا أي جملة أيا كانت .. ويمضي على ايصال 

وتسيبوا الورقة دي مع شيخ البلد 

وربنا يتمم بخير 

والعرسان أنواع كتير .. منهم ابن أمه 

واللي ما بيتحركش من غيرها ولا بياخد قرار من غيرها

ومنهم المجامل واللي كل حاجة عاجباه بس 

كل حاجة قسمة ونصيب .. ومنهم المتكلم 

وده مش معناه انه بيعرف يتكلم قدام الناس يعني 

لا ده معناه انه هو الوحيد اللي بيتكلم في القاعدة 

وما بيديش فرصة لأي حد .. 

ومنهم المغفل ومنهم الطيب والشرس

والقبيح والمريح .. وأنواع كتير قوي 

هنعملهم جزأ تاني .. بس بالشكل ده

تكون انتهت مقالنا النهارده عن أنواع العرسان

ياريت لو تعرف حد فيه صفة من الصفات

اللي ذكرناها في المقال تعمله منشن 

وياريت لو مريت بتجربة مشابهة للي اتكلمنا عنه في الحلقة

برضه تقولنا في الكومنتات

وما تنساش تشترك في المدونة علشان يوصلك كل جديد

وربنا يتتمملكوا بخير ..