الفرق بين مصر وإيچيبت !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

 

أهلاً بيكوا مرة تانية في مدونتكم ، وموضوع مقالنا النهارده

عن فرق كبير وشرخ حصل بين الطبقات في مصر

في الفترة الأخيرة ، مش عارفين وصل لكده ازاي 

كنا زمان وطول عمرنا نعرف إن الطبقات الإجتماعية بتتقسم 

لثلاث طبقات .. الطبقة الراقية أو الثرية ، والطبقة المتوسطة 

والطبقة الفقيرة ، تقسيمة معروفة وموجودة في كل حتة 

لكن الفترة الأخيرة إكتشفنا إن فيه طبقات جديدة محدش يعرف عنها حاجة 

ظهرت بين يوم وليلة قسمت مصر لطبقتين 

طبقة ناس إيچيبت واللي ما يعرفوش حاجة عن مصر 

وطبقة من المصريين اللي ما يعرفوش حاجة عن إيچيبت 

والطبقة الجديدة دي بتاعت إيچيبت ظهرت وترعرت 

داخل أسوار الكومباوندات ، وفي المدارس الانترناشونال

وعلى حمامات السباحة في هاسيندا والجونة وغيرها 

وظهر من هنا اختلافات كبيرة بين الطبقة المستحدثة (ناس إيچيبت)

وأي حد في أي طبقة تانية في مصر .. 

والاختلافات الكبيرة دي حاولنا نحصرها في كذا حاجة 

أولهم / فرق اللغة 

المصري معروف بجبروته.. دي حقيقة بتثبتها السنين يوم بعد يوم

74 سنة احتلت فيهم انجلترا أرض مصر 

74 سنة عاشت فيهم ناس وماتت ناس 

وفي الآخر كل اللي اكتسبناه كمصريين من الانجليزي ولغتهم 

شوية مصطلحات ما يعدوناش في اقل انترفيو 

في اي شركة تحت بير السلم.. 

74 سنة راحوا هدر.. 

الحقيقة هما ما راحوش هدر قوي يعني 

والموضوع بيختلف بناءًا على معيار مهم جدًا 

هل انت من ايجيبت ولا من مصر ؟ 

اللي مش متابع واللي كان في البلكونة بيشرب سيجارة 

هيسألني سؤال مهم.. هو فيه فرق يا عمنا ؟ 

مش ايجيبت ومصر حاجة واحدة ؟

أحب أقولك لأ.. او يعني ده اللي كنا فاكرينه 

لعند ما ظهر العرق الجديد ده وبدأ يحتك بالمصريين  

في الشارع المصري ، ويعاشروهم ويتفاجئوا بطباعهم

وظهروا بإنطباعات على السوشيال ميديا 

وبعد ظهور الفئة دي بنكتشف ان الشعب المصري انقسم لنصين

ناس من مصر ملهاش في الإنجليزي وبتكرهه وبتكره اللي بيتكلموه

وناس من ايجيبت متفاجئين ان المصريين بشر زيهم

وفي وسط الظلام ظهر ناس بين البينين.. لا هما بيتكلموا مصري 

كما يجب.. ولا عارفين يتكلموا انجليزي 

ناس بيتكلموا لغة تحس من حروفها انها انجليزي 

ولكن نطقها عربي .. ما تفهمش هي عربي مكسر ولا انجليزي مكسر  

سبحان الله.. لغة هجينة عاملة زي خضار الصوب 

ما تفهمش معاييرها ولا قواعدها ولا ليها اساس من الصحة

ولكن موجودة ومع وجودها بنكتشف ان المصريين 

انقسموا ثلاث اقسام.. ناس من مصر ما بيتكلموش انجليزي تمامًا 

وناس من ايجيبت بيتكلموا عربي مدغدغ 

فقرروا يدوا كل حاجة اسم مختلف عن اللي نعرفه 

يعني الطعمية .. جرين برجر ، الملوخية جرين سوب 

غزل البنات كوتون كاندي والكرش الحريمي بامب 

والكرش الرجالي دادي بيلي 

وواقف في النص بين بتوع ايجيبت وبتوع مصر 

ناس تانية تماما و دول تقريبا ما بيتكلموش خالص

لا هما عارفين ينطقوا الانجليزي كما يجب 

ولا بقوا عارفين يتكلموا مصري زي ما هوا  

طبعًا الظواهر دي كانت دافع كبير

 قدام كل دكاترة وعلماء الاجتماع

وبقت عامل جذب فظيع قدام الاجانب 

عامل جذب اكبر من الاهرامات.. فمنهم اللي رفض الظاهرة دي

ومنهم اللي وقف جمبها وشجعها 

وشاف فيها فرصة ياكل منها عيش وسبب في شهرته

في النهاية.. لازم نعرف ان لكل فئة أغراضها من اللغة اللي بتتكلمها

يعني فيه ناس بتاخد اللغة وجاهة اجتماعية

تدل على تعليمهم وتعليمهم يدل على الفلوس اللي اتصرفت عليهم

وهكذا.. 

وفيه ناس اخدت اللغة كضرورة من ضرورات الحياة

وسبب أكل عيشهم انهم معاهم لغة.. 

وناس تانيين زي اللي رقصت ع السلم.. 

حاولوا يتكلموه علشان يتقايموا بيه قدام الناس 

وبقى سبب في القلش عليهم.. 

الفرق الثاني : مستوى الأسعار

من فترة ظهرت مجموعة فيديوهات على السوشيال ميديا

للعبة إسمها guess the check 

أو يعني خمن مبلغ الشيك كام .. يعني تلاقي

كام واحد وواحدة من ناس إيجيبت خارجين في كافيه 

ولا مطعم وبعد ما ياكلوا يبدأوا يصوروا فيديو 

وكل واحد يبدأ يقول تقريباً العشا أو المشاريب اللي طفحوها بكام 

ومن هنا بدأنا نسمع أسعار خرافية ، وحسينا اننا بعيد قوي 

حسينا بغربة ، لما تلاقي مرتبك اللي فضلت تشتغل بيه شهر كامل 

بيتقال على ترابيزة من دول تمن عشوة .. وياريت المرتب هيكفي 

وتبدأ تسمع أرقام يا معلم في شوية فول وطعمية أو جرين برجر وبينز 

٢٠٠٠ و ٣٠٠٠ جنيه .. على الجانب الآخر بقى 

قرر المصريين يقلدوا الفيديوهات فتلاقي ١٨ نفر 

قاعدين على قهوة بيتعشوا وبيشربوا شاي ب ٢٥ جنيه 

يحسسوك ان لسه فيه أمل في الدنيا وإنك ليك مكان تعيش فيه بين الوحوش 

ومش بس أسعار الأكل والشرب .. لأ ده انت تلاقي صورة 

لبنطلون أو بلوزة ب ٥٠٠٠ او ٧٠٠٠ أو أكتر 

اللي هو محتاج تاخد قرض علشان تشتريه 

المبلغ ده يا افندم ممكن يصرف على عيلة مكونة

من خمس أفراد لمدة شهرين ياكلوا لحمة وفراخ 

وعلى الجانب الآخر برضه تلاقي فيديوهات لرجالة جدعان 

نزلوا العتبة والموسكي وسوق الجمعة 

بيوروك نفس الهدوم ، بس لا هي بنص ولا بربع التمن 

فتلاقي البنطلون عامل ١٠٠ جنيه والجزمة المستوردة ب ٢٠٠ 

وهنا فيه سؤال سببه الحيرة اللي بقينا فيها 

هو احنا هنا ولا هناك ؟ هي العيشة غالية ولا رخيصة ؟

والاجابة على السؤال ده تتطلب إنك تكون عارف بس 

هي دي مصر ولا إيجيبت 

الفرق الثالث : درجة الحرارة 

عارف لما تبقى من مصر و نازل في يوم برد .. ده من وجهة نظرك 

وتلبس كل اللي في الدولاب .. شرابين وكلسون وبنطلون 

واربع فانلات وجاكيت وكوفيه .. وايس كاب 

ورجلك تاخدك على حتة من حتت ناس ايجيبت 

وأول ما تدخل المكان تلاقي الناس لابسين قطعتين بالكتير من كل ما سبق 

كمية عري مهولة ، وأكنك في شهر ٨ في الساحل 

ويبدأوا يبصولك باستغراب .. انت ليه حران ؟ 

هو ايه كل اللبس اللي انت لابسه ده ؟ 

وبعد لحظات يهرشوك ، ويعرفوا انك مش من هنا 

انت من مصر مش من ايجيبت .. بس جاي إعارة مثلاً وراجع

هما بتوع مصر بيبقوا بردانين في الشتا كده

انما بقى بتوع ايجيبت حرانين ولابسين قصير ومقور 

طول شهور السنة ، صيف شتا ربيع خريف 

وأكنه زي رسمي ، ده أنا لو قلعت الجاكت 

مش قعدت بالفانلة بحمالات زيكوا .. لو قلعت الجاكت بس 

هيجيلي ذبحة ، وهحتاج نص نقل دم 

الغريب بقى إن الناس بتتكشف بره طبقاتها الاجتماعية 

لأسباب كتير .. زي مثلاً طريقة الأكل والشرب أو اتيكيت الأكل 

زي مثلاً ، نوع اللبس ماركة أو لأ أو الموبايل 

لكن تقل اللبس نفسه وقد ايه مغطي من الجسم 

دي غريبة بصراحة .. بس منطقي لأنك لو من ناس إيجيبت 

مش هتبقى بردان للدرجة دي 

عارف لما تقعد مكان واحد وتلاقيه دافي 

ساعتها بتقول ايه ؟ بتقول عليه معاه فلوس 

اهو ده الفرق بالظبط .. الفلوس بتدفي يا جدعان 

حتى لو كنت عريان .. 

وبمجرد ما تخرج من المكان ده وتبدأ تشوف موقف تركب منه 

لأي حتة في مصر تلاقي انه عادي .. 

كل الناس لابسه زيك .. كل الناس بردانة وبتكتك 

تكتشف إنك كنت في دولة غير الدولة .. وان انت الحمد لله 

رجعت لأرض الوطن

الفرق الرابع : المسافات والزمن

وزي ما دايمًا بيكون فيه اختلاف بين أي عالم والتاني ، 

زي ما اتعودنا نشوف في أفلام الخيال العلمي ..

فبرضه الفرق بين المصريين 

وبتوع ايجيبت واضح جدًا في المسافات والزمن 

انت كمواطن مصري متعود ، ده لو معاك فلوس يعني 

تنزل يوم الخميس بليل ولا الجمعة .. تقعد على قهوة 

تشدلك حجر ، وتشرب خمسينة شاي 

تروح تلعب بلاي ستيشن مع تلاتين واحد من عينتك 

كل واحد يدفعله ١٠ جنيه كده بالكتير يعني

وأكتر من كده تبقى الميزانية باظت 

وأكتر من كده مش هتعرف تكمل لآخر الشهر 

كل خروجات يوم الخميس والجمعة دي 

أول حاجة بتفكر فيها بعد الفلوس طبعاً .. هي المسافة .. 

يعني اخرك تركب ميكروباص ب ٣ جنيه لاخر الشارع 

تتمشى لأقرب قهوة على ناصية .. أبعد من كده تحس انك في خطر 

تحس انك هاجرت يا صاحبي .. ده لو كنت مواطن مصري 

انما بقى لو انت من ايجيبت .. فهتلاقي الوضع مختلف تمامًا

يعني الخميس والجمعة دول اسمهم ويك اند 

نهاية الأسبوع ، ونهاية الأسبوع ما ينفعش تعدي كده

بمجرد اننا نروح كافيه ولا مطعم .. ما احنا عايشين كل ليلة فيهم  

لأ ده احنا لازم نروح الساحل ، ده أبسط كلام 

تحس ان الساحل ده عندهم تحت البيت 

ولو زهقنا من الساحل ، عادي نطلع تركيا في الويك ايند

أو تايلاند أو المالديف .. نقضي الويك اند ونرجع 

تحس انهم بيسافروا بسرعة الضوء 

او بيستخدموا وسايل مواصلات غير اللي نعرفها 

ولما تيجي تدخل في نقاش مع حد من دول يقولك 

يا عم جواز سفرك جاهز .. هي طيارة صد رد نكون هناك 

طيارة ؟ ده لفظ طيارة ده ما بيتقالش الا لو جايلك عقد عمل 

في دولة عربية وبيكون حدث ، ده انت بتبيع العيلة كلها دهبها 

وممتلكاتها وتروح وتسيبهم بايتين في الشارع عريانين 

علشان تركب الطيارة دي .. وهي مرة واحدة تقعد ١٥ سنة 

وترجع عامل أي فلوس تجوزك وتسترك كام سنة 

هي مرة واحدة في ال ١٥ سنة رايح ومرة راجع 

من غير اجازات ما هي مش قصة بقى رايح جاي بطيارات

انما الوضع في ايجيبت غريب جدًا .. 

يعني تحس انهم بيتعاملوا مع الطيارة والسفر 

اكنه نازل يجيب علبة سجاير من الكشك اللي على أول الشارع 

ده بالنسبة للمسافات ، بالنسبة بقى للزمن 

فانت لو من مصر ، تلاقي نفسك صاحي الساعة ٧ بالعافية 

تغسل وشك بشوية ماية وتلبس وتفطر أي حاجة وتنزل جري

علشان ما تتأخرش على شغلك ويدوب توصل ٩ ده لو ما وصلتش متأخر يعني 

تخلص يومك على ٤ ولا ٥ وتاخدلك كمان ساعتين في المواصلات 

لعند ما توصل بيتك تكون مدغدغ ومش قادر تتحرك

يدوب تلحق تصليلك ركعتين وتاكل 

وتتنيل قدام اي حاجة تتفرج عليها 

وتلحق تنام كام ساعة علشان تعرف تصحى تمر بنفس الطريق 

إنما بقى لو انت من إيجيبت فالدنيا مختلفة تمامًا

زي ما اتفقنا .. إنه ده عالم مختلف وله قواعد زمانية ومكانية مختلفين 

فتلاقي ناس ايجيبت بيصحوا زيك عادي من ٧ 

بيعملوا كل اللي انت عملته قبل ما ينزلوا شغلهم 

بالإضافة انهم بيلعبوا رياضة ساعتين 

ويعملوا القهوة الجميلة ويتصوروا معاها 

ويتمشوا بين المروج والبساتين وينزلوا صور على الانستاجرام

وبعدين يبدأوا يومهم ، وبعد ما يخلصوا اليوم 

هتلاقي كل يوم ويوم عندهم بارتي .. حفلة بمناسبة 

أو من غير مناسبة خالص.. عيد ميلاد حد

عيد جواز حد .. عيد طلاق حد .. عيد القمح الصيني 

أي حاجة المهم ان فيه بارتي .. والبارتي دي 

بتكمل ل ١٢ ولا ١ بليل .. خد بالك انت متكوم في بيتكوا من ٧ المغرب

دول بقى ل ١٢ ولا ١ بيرقصوا وبيتنططوا 

ومش بس كده .. يعني ياريت الموضوع انتهى لحد هنا 

لأ ده كمان بدأ يظهر بما يسمى أفتر 

أفتر بارتي .. يعني بعد الحفلة والهيبرة .. 

نروح نقعد في مكان ناكل ولا نشرب .. 

ودي فيها ل ٤ الفجر عما نشوف مكان ونختار هناكل ايه 

وناكل ونجيس ذا شيك وكل الحاجات الحلوة دي 

ونبدأ يومنا تاني من ٧ صباحا ً .. طب إزاي ؟

والحقيقة ان علماء الإجتماع غلبوا يعرفوا ازاي 

ولو ان السبب واضح قدامنا ، وإنه فيه ثقب دودي 

بعد ميدان جهينة ، بينقلنا لعالم مختلف له معاييره الخاصة

وإن كل ما هو خلف زايد فله حسابات 

وقواعد ومعايير مختلفة في كل حاجة 

العملة ، الزمان ، المكان ، درجة الحرارة 

غير كده مش منطقي ، ومش هنصدقه .. ومش هنوافق ع التطبيع

وبكده تكون انتهت مقالتنا النهارده عن

الفرق بين مصر وايچيبت

ياريت لو مريت بتجربة مشابهة للي اتكلمنا عنه النهارده

تقولنا في الكومنتات ، وما تنساش

تشترك في المدونة علشان يوصلك كل جديد

وأشوفكم على خير في مقال جديد