الصنايعية وأنواعهم في المجتمعات العربية !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الناس اللي طلعوا عينينا .. الناس اللي يومها بسنة

الناس اللي كلامهم موزون بميزان ماية 

بس شغلهم محتاج له استشاري علشان يتظبط 

الناس اللي بتحب المناهدة والمفاصلة 

الناس اللي بيكبروا الأمور ، اللي بيعملوا من الحبة قبة 

اللي بتجيبهم لغرض بسيط ، عطل يتصلح بجنيه ،

 يقلعوك ويمضوك على بيع شقتك 

الناس الشقيانة ، والراعي الرسمي لكوباية الشاي  

الصنايعية ، والصنايعية ببساطة أي صاحب صنعة 

والمفروض انه فاهم فيها لدرجة اننا احيانًا بنطلق اللقب ده 

على أي حد شاطر لدرجة انه صنايعي .. يعني ممكن 

تلاقيك بدون قصد بتقول على دكتور انه صنايعي من شطارته 

انما بقى الصنايعية في مصر وبعض الدول العربية ليهم صفات مختلفة شوية 

و بيتقسموا لأنواع وأصناف كتير .. صحيح فيه منهم المريح 

والشاطر والذوق واللي بيجي في ميعاده ، لكن احنا هنتكلم 

في مقالنا النهارده عن أصناف وأنواع الصنايعية اللي مطلعين عينينا

 وزي ما انتوا عارفين علشان نتكلم عنهم في مقال ما تكفيش

و الصنايعية محتاجين ١٠٠ حلقة وحلقة.. 

لكن احنا النهارده هنركز على أهم الأنواع وأغربهم 

النوع الأول : الصنايعي المتدين بطبعه 

!!  أجل يا سيدي 

النوع ده من الصنايعية.. اول ما يدخل عليك الشقة

وقبل ما يمسك مفكة ولا بنسة تلاقيه 

بيقولك هاتلي المصلية ويسألك.. هي القبلة منين ؟

وكل ماتدخل تشقر عليه تلاقيه بيصلي

صلاة في غير مواعيدها .. يعني تدخل عليه الساعة ١٠ الصبح 

لا هو فجر ولا هو ضهر .. تلاقيه بيصلي ، 

با سيدي اللهم قوي إيمانك بس دي صلاة استسقاء ولا إيه ؟ 

ما تفهمش ..  فيه منهم ناس متدينة فعلاً 

ما نقدرش ننكر ده علشان محدش يفتكر اننا بنعمم 

بس احنا هنا نقصد نوع من الصنايعية 

بيستنى ميعاد الصلاة.. علشان ياخد بريك

هو متأكد إنك استحالة تكلمه في حاجة ، ده الراجل بيصلي يا عم 

إيه يا أخي ؟ هو انت كافر ؟ هتمنعوا أنه يصلي ..؟ 

لا هتسكت وتحط جزمة في بوقك .. وتستنى شقتك 

تخلص بعد ١٥ سنة ، ما يجراش حاجة  

الغريب في الأمر بقى .. إن التدين ده مش مجرد صلاة 

دي الصلاة حاجة بتعلمك الإلتزام ، وبتحسن منك 

وبتخليك طول الوقت صادق مع نفسك ومع الناس 

وتعاملاتك مظبوطة ومواعيدك مظبوطة 

انما بقى تبقى متدين بالإسم بس .. 

تصلي وتقوم تشغل مهرجانات .. 

وإيه السيجارة دي اللي بعد الصلاة 

أنا أعرف عن سيجارة بعد الأكل مع كوباية شاي 

انما بعد الصلاة .. دي غريبة .. ارمي السيجارة 

واحترم لقمة عيشك .. ده انت لسه قاعد ع المصلية 

بقى يا راجل يا محترم .. تصلي ١٤ صلاة في اليوم ، وتشتغل ٣ دقايق 

هو ده الدين ؟ ولا هو علشان ما بيتحسبش في المجموع يعني 

تعملوا فيه كده .. ؟  

يا راجل يا متدين .. هل من التدين إنك بمجرد ما تخلص الشغلانة  

تطلب ضعف التمن اللي اتفقت عليه ، 

بحجة انك حطيت ايدك في حاجات بره الاتفاق 

وتحط ايدك ليه يا عم ..؟ 

يقولك ما انا حطيتها في مصلحتك .. 

وهي المصلحة ناقصة ايدين ؟ 

هي المشرحة ناقصة قتلى يا معلم ؟

الأوحش من كده في التعامل مع الصنايعي المتدين

انه دايمًا بيحلفك ويزممك ، وبيستخدم اسم ربنا طول الوقت 

في الكدب .. يعني يقولك بذمتك شفت شغل أحسن من كده ؟

أه شوفت .. وكتير الدعاوي على نفسه .. يعني تلاقيه 

بيقولك طب ربنا ياخدني ما اوعى اروح بيتي لو كنت بكدب عليك 

انت كده كده عارف ان دعوتك مش مستجابة 

فما تخدهاش حلوانة في سلوانة بقى وتغرق الشقة كدب 

طب مادام هو ده المبدأ .. وهي دي المعاملة 

كان لازمتها ايه بقى الصلاة والعبادة اللي راحت ع الأرض دي ؟

ده انت لو بتعبد الجبنة الرومي مش هتعاملني المعاملة دي 

هُبلٌ.. هبل.. 

النوع الثاني : الصنايعي أبو فتلة 

ملك الكافيين .. صاحب الكوباية ، زعيم التلقيمة ، أبو فتلة 

والنوع ده هو الأشهر بين الصنايعية 

وده شخص قنوع وطلباته بسيطة خالص 

ومجتهد في شغله ، طول ما هو مزاجه رايق 

وعلشان تحافظ على شغلك لازم تحافظ على روقان مزاجه 

وده شخص كل اللي محتاجه م الدنيا 

جردل ماية سخنة ويتنقع فيه مع ربع كيلو شاي 

ويطلعلك أحلى شغل.. بس يخلص كوباية الشاي دي وربنا يسهل 

غير كده هو راجل تمام .. مشكلته الوحيدة 

انه بيحتاج عامل معاه ، يلقم ويديله ، يلقم ويديله 

وده لسبب بسيط وواضح جدًا

إن النوع ده طول ما كوباية الشاي في ايده 

فهو فايق ومركز وبيطلع جواهر

انما بقى لو حد قصر معاه في الشاي 

ممكن يهدرلك شغل بعشر الاف جنيه 

وتلاقي الموڤ طلع منه برتقاني 

وتضغط على زرار السخان الاسانسير يطلعلك قدام باب الشقة

فمش خسارة فيه بقى ربع كيلو الشاي بتاع كل يوم 

والصنايعي ده بمجرد دخوله أي بيت 

فإعرف كده على طول إنهم هيستنفذوا كل بطاقات تموينهم 

وبطاقات تموين جيرانهم وأهاليهم 

وهيعيشوا من غير قزازتين الزيت وكيس السكر

لمدة سنة كاملة ، طب ودي تبقى عيشة 

لكن النتيجة مبهرة ، فنان بيشتغل في الشقة 

والحقيقة انه العلم قصر في حق الصنايعي أبو فتلة بشكل كبير

يعني كان من الضروري نشوفله حل غير الكوباية 

يتعلقله محلول شاي ، ياخد حقن شاي في الوريد 

أي طريقة بدل المرمطة دي .. ومشغلين واحد وراه يلقمله 

بس برضه كانت هتفضل فيه مشكلة .. 

صوت الشفطة ، ودي من الحاجات اللي بتكيف في حد ذاتها 

يعني الشاي لوحده مش كفاية ، 

شرب الشاي من غير الشفطة اللي بيسمعها 

البواب تحت ، ملوش طعم 

زمان كانوا بيقولوا على حد ده صاحب كاس 

او على حد تاني ده صاحب سيجارة 

الصنايعي ده صاحب تفل وضغطه عالي ألف على تمانين

ولو ندهت عليه في أي وقت ، هيقولك أخلص كوباية الشاي وأجيلك 

ولو طلبت منه أي طلب ، لازم تحط في إيده كوباية شاي 

علشان يعرف يسمعك أصلاً.. واللي هو يتقال عليه بحق 

إيده مش فاضية .. فيها كوباية شاي 

النوع الثالث : الصنايعي الشقلباظ 

وده نوع من الصنايعية لا أتمناه لألد أعدائي 

الصنايعي الشقلباظ له أسماء وألقاب كتير

الزيبق ، فص ملح وداب ، الشبح 

محدش بيعرف يمسكه عشر دقايق على بعض 

الا لو هتقفله مان تو مان .. وتبقى رجلك على رجله 

في كل ثانية في اليوم ، واللي هو لو غفلت ثانية كده بس 

تلاقيه اختفى ، وملوش أثر واكنه ما جاش النهارده

الصنايعي ده اللي تتفق معاه في شغلانة وتلاقيه من بدري عندك 

تقول الله أكبر .. هو ده صنايعي أحلامي.. 

تسيبه وتروح تقضي مصلحة وترجع بعد ساعة ما تلاقيهوش

موبايله دايماً غير متاح أو على وضع الطيران 

ما عندوش واتس آب ولو عنده هتلاقيه اوفلاين 

ولو اونلاين مش هتعرف لانه خافي الظهور

ولو بيكلمك في الشات مش هتعرف وصلتله الرسالة ولا لأ 

لأنه خافي العلامتين الزرق .. وحاجة نيلة

وده بيتطب منك حاجتين ، أولهم قولناها .. تقفله مان تو مان 

والحاجة التانية تعينله مخبر خاص يراقبه 

يخرج من بيته يمشي وراه لعند الشقة عندك 

يخرج من الشقة يمشي وراه لعند ما يدخل مخبأه ويعملك شير لوكيشن 

ولو حصل وفتح موبايله أو لقط نت ورد عليك 

ده لو حصل يعني .. ده لو انت ممضيه على إيصالات أمانة

تلاقيه أولاً بيكلمك بكل بجاحة وأكنه بيقولك ما تقرفناش 

ما كانتش شغلانة يعني ، ده أولاً .. وثانيا ً بقى لما تزنقه جامد 

تلاقيه بيقولك أعذار في أعذار وما شاء الله

 دايمًا كرييتف في أعذاره مبدع ، طب ما تخلي الإبداع ده في شغلانتك 

وانت ايديك تتلف في حديد كده 

مرة مراته بتولد .. وهو مش متجوز أساسًا 

مرة حماته راجعة من الساحل ، ولازم يستقبلها والا هياكلوا وشه 

يا عم يارب ياكلوه ما يخلوا منه حاجة 

مرة صاحبه اتحجز في القسم ، ومرة صاحبه خرج م القسم 

مرة هو نفسه اتاخد تحري ، وهو يا عيني كان بيشتري طلبات للشقة 

وعلى كده يلففك العالم وانت ع السرير 

يدخلك في مليون حدوتة ولا أتخنها كريستوفر نولان 

وع الحال ده بقى لعند ما انت يا تزهق وتسيبله العربون 

يا تستناه سنين .. ما هو بيشتغل كل يوم عشر دقايق 

وهكذا ساعة في الشغل و ١٠ بره 

ويجي في الاخر يحاسبك على 900 يوم شغل 

والنوع ده لو نزلت وراه مرة م المرات اللي بيختفي فيهم

هتلاقيه ع القهوة بيشرب شاي جمب الصنايعي اللي فات 

و الصنايعي ده لو سبته براحته 

هيخرجلك احلى شغل بس تستلم منه شقة الفرح 

بعد ما تطلع ع المعاش .. يعني انت تعمل حسابك 

تتجوز في بيت أهلك وتبقى تستلم منه الشقة 

يوم تخرج ابنك من الجامعة .. أو يبقى إبنك يتحوز فيها بقى

أهو حتى يبقى جديد في جديد .. 

والحل للقضاء على ظاهرة الصنايعي الشقلباظ أو الشبح 

بسيط وسهل .. احنا مش بنتكلم على علاج المشكلة 

لأ .. احنا بنتكلم على القضاء عليها تمامًا ..

أول حاجة نحصر ونعرف كل الصنايعية من النوع ده 

ونقضي على صبيانهم أو نكرههم في المهنة 

لأن الصبي بتاع الصنايعي ده لو اتعلم منه الشغلانة 

واتعلمها بالصفات السودا دي .. ده معناه امتداد لمدرسته 

وهينتشر ويزيد المرض ويتحول لوباء 

الصنايعي الشقلباظ ، هو اللي لو فشل في شغلانته

 ممكن يشتغل جاسوس ، أو عميل مخابرات 

لأنه فيه كل الصفات .. بيختفي ويظهر وقت ما يحب 

ملوش مالكة ، ومؤلف حجج شاطر 

النوع الرابع : الصنايعي الشماعة

والراجل ده دايمًا أخطائه مش ذنبه .. 

كل حاجة بتحصل في الكون بالنسبة بمحض الصدفة 

كل الأمور بيرجعها لمجهول ، .. فتلاقيه مثلاً

هادر كمية دهان بألافات .. ويقولك هو كده 

ازاي يعني ؟ يقولك ده النوع ده بيعمل كده لوحده 

ما انا قولتلك جيب النوع التاني ما سمعتش كلامي 

فانت اللي غلطان .. طب الشرخ ده ما اتداراش ليه ؟

يقولك مفيش حاجة بتستخبى يا بشمهندس

طب الماسورة دي فكت بعد يومين شغل بس ليه ؟

يقولك دوام الحال من المحال .. 

ودي طريقته الأولى .. انما بقى لطريقته التانية 

في اتباع مدرسته ومنهجيته في الشغلانة 

بتعتمد على ان الصنايعي اللي قبله ما بيفهمش 

فتلاقيه بيحط سبب كل تقصير في الشغلانة 

على اي حد دخل قبله الشقة 

يعني لو نقاش يقولك بسبب اللي اشتغل قبلي في الحيطة

ولو الحيطة لسه متمحرة 

يقولك اللي محر الحيطة بوظها 

ولو لسه ع الطوب الأحمر 

يقولك البنا ما بيفهمش 

وهكذا.. 

انا متأكد انك لو خدت الصنايعي ده من ايده 

ودخلت ارض فاضية ناوي تشتريها لسه 

وبتفكر تبني عليها بيت 

وفي يوم من الايام هتجيبه يدهن البيت 

برضه هيقولك العيب في الحي اللي قسم الأرض دي غلط 

دي عوامل تعرية وتربة مش مظبوطة بتشرب الدهان

والأرض واخدة ميل .. بتخلي الدهان ينشع 

المهم انه مش المذنب .. مش السبب في اللي باظ 

هو مجرد صنايعي غلبان جه يعدل اللي ما يتعدلش 

وعايز يعمل معاك واجب .. وانت غلطان

أيوه انت غلطان يا بشمهندس لأنك ما جبتهوش من الأول 

من الأول امتى يا ابني ده انا مدخلك على الأرض فاضية 

ده انا ما كنتش لسه اشتريتها .. 

يقولك كان لازم تستشيرني الأول .. 

كان قدامي حتة أرض أحسن .. كانت هتخلي دهان الشقة كده 

وتخلي الشغلانة سالكة واخر حلاوة .. 

المهم ان الذنب مش ذنبه ، وانه يا عيني مظلوم دايمًا كده 

وعلشان بيعمل الصح الناس بتشيله أخطاء مش أخطاؤه 

وإن اللي بيعمل الصح اليومين دول وبيحكم ضميره 

بيتاكل ، وان الديب اللي كان شغال في الشقة قبله 

ضحك عليك يا بشمهندس وانا اخدت بس حقي 

مش هضحك عليك زيه .. يعني ما تفاصلنيش من الاخر 

الصنايعي الشماعة موجود في كل حتة 

وفي كل مجال.. هو بس محتاج اللي يصدقه 

ويدعم موهبته .. ونفسه ومنى عينه كان يحضر صبة الأرض

 علشان يطلع الشغل مظبوط ، صبة كوكب الأرض نفسه 

بالشكل ده انتهت مقالتنا النهارده عن الصنايعية  

لو مريت بتجربة مشابهة للي اتكلمنا عنه في المقال

ياريت تقولنا في الكومنتات

وما تنساش تشترك في المدونة علشان يوصلك كل جديد 

لم العدة يا ابني انت وهو .. الله ينور يا رجالة