أنواع اليوتيوبرز (الجزء الثاني)

 

أنواع اليوتيوبرز (الجزء الثاني)

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الناس اللي شاغلين فراغنا .. ومضيعيين رصيدنا

ومخلصين باقاتنا .. الناس اللي مع الوقت بنتعود عليهم 

ونحسهم جزء من يومنا .. وحد من عيلتنا 

الناس اللي أكل عيشهم من المشاهدات 

واللايكات ، وأحياناً من التريقة في الكومنتات

موضوع مقالنا النهارده عن أنواع اليوتيوبرز الجزء الثاني

وزي ما قولنا في المقال اللي فاتت 

إن اليوتيوبرز أنواع كتير جدًا .. ذكرنا منهم 

الريڤيور اللي بيجرب كل حاجة وأي حاجة 

واتكلمنا عن نوع منهم محتواه قائم على فضايح العيلة

واللي أكل عيشهم من المشاكل بينهم وبين حمواتهم 

ومنهم ملوك التحديات اللي ما يعرفوش يعيشوا 

إلا أما يتحدوا بعض في أكل وشرب وغيرها 

ومنهم النحيت اللي ملوش محتوى غير انه بيتريق على محتويات الناس 

وفي الحلقة دي هنستعرض أنواع تانية مختلفة .. يلا نبدأ على طول 

النوع الأول : الجيمر 

وده عيل كل اللي بيعمله في حياته إنه بيلعب جيمز 

وده أياً كان عمره قد إيه إلا إن حياته وقفت 

عند سن ١٣ سنة ، وما اتقدمتش حياته خطوة واحدة بعدها 

وكل اللي حصل في حياته إنه بقى بيلعب أحسن 

وعلى الأغلب النوع ده من الجيمرز كان عنده في طفولته 

عقدة من كل الجيمز ، ممكن مثلاً وهو صغير 

زوغ من المدرسة علشان يلعب بلاي ستيشن واتقفش 

وأبوه علقه من ودانه وبقى حلمه مش إنه ينجح 

ويثبت لأهله إنه دي كانت مجرد غلطة 

وهو شاطر ومتابع دراسته حتى لو زوغ مرتين تلاتة 

لأ .. ده خد الموضوع تحدي وقرر يثبت لأهله حاجة تانية تمامًا

إن الألعاب اللي حرموه منها وهو صغير دي 

وانضرب بسببها .. هي اللي معيشة البيت دلوقت 

والبيت اللي فيه جيمر ، أكنه عنده مصيبة 

دايمًا متوترين وأعصابهم تلفانة وده لأسباب كتير جدًا

يعني أولاً ، حط نفسك مكان أم لشاب عنده ٢٥ سنة 

وظيفته في الحياة إنه يلعب جيمز ويطلع لايف وهو بيلعب

طول اليوم الست يا عيني سامعة ضرب نار 

وقنابل ، وزعيق ونرفزة وتكسير لو خسر 

ثانيًا .. الست دي لو حد سألها إبنك شغال إيه 

لا هي عارفة تقوله محاسب ولا مهندس 

ولا عارفاله ملة .. يعني مش ممكن تلاقيها بتقول

وكلها فخر .. إبني جيمر قد الدنيا .. ثالثاً بقى 

الشاب الجيمر ده حارم أمه من إحساس 

إنها تور وتدور له على عروسة ، 

هتروح تقول للناس ابني بيعمل ايه في حياته 

الأول على الطيارة ، ولا ابني منيم السيرفر

ومش بعيد لو تخطوا النقطة دي يكسفها قدام الناس 

يبقوا قاعدين يقروا الفاتحة في أمان الله 

تلاقيه ماسك موبايله يخطف جيم سريع كده 

رابعًا بقى بالنسبة للأب اللي كان بيعاقب إبنه على اللعب 

وإنه كده بيضيع مستقبله شكله إيه دلوقت ؟

فأبو الجيمر راجل عايش في صراع نفسي رهيب 

لأن العيل ده هدم كل اللي أبوه قالهوله بين يوم وليلة 

ومسح كلامه بأستيكة كلامه اللي من نوعية

 يا إبني العلام هو اللي هيخليلك قيمة بين الناس 

وهو الأب تلاقيه معاه شهادة جامعية وشغال موظف 

بقاله ٣٠ سنة ب ٣٠٠٠ جنيه في الشهر 

والواد ده بيدخل مرتب أبوه في لايف واحد

ده غير إن الراجل مش عارف يعاقبه على تضييع وقته في اللعب

ولا عارف يقوله حاجة ، لأن اللعب ده 

هو اللي عامل فلوس دلوقت .. هو اللي ركبهم عربية 

بعد ما كانت العيلة كلها بتركب مواصلات 

كمان الأب ده محروم من تأنيب إبنه وإنه يقوله

جملة زي ، علشان تبقى تسمع كلامي أو ما انا ياما قولتلك

لأنه لو كان سمع كلامه كان زمانه مندوب مبيعات 

بيقبض علشان يروح بمرتبه الشغل ويستلف من أبوه

من يوم ١٥ في الشهر ، ولولا فلوس اللعب 

كان زمانهم مهريين جمعيات علشان يجوزوا الشاب ده 

ومشاكل الجيمر غير كل الناس .. يعني هو أسوأ كوابيسه 

إن النت يقطع ، وأكتر حاجة بتعكر مزاجه 

إنه حد يكمبر ويبوظله جيم كويس .. أو البينج يكون عالي

والنوع ده من اليوتيوبرز لو فيه يوم اتجوز 

هيبقى كل شغله وعيشته في البيت 

ودي حاجة تزهق أي ست .. وطول الوقت 

هيخلي البيت مكهرب وفي حالة رعب 

يا إما بسبب الحرب اللي دايرة ومسمعة البيت كله 

ومحسساهم انهم على حدود روسيا واوكرانيا 

أو بسبب البهدلة اللي هيعملها في البيت لو خسر جايم  

النوع الثاني : الشيف 

والشغلانة دي يا جماعة اتهانت قوي من لما ظهر النت 

يعني كان زمان الشيف ده خريج سياحة وفنادق

وراجل متخصص كده ، دخل مطاعم كتير 

وأخد الطريق من أوله .. من تحت الصفر حرفيًا 

من أول غسيل الصحون وسنين لعند ما بقى يتقال عليه شيف

دلوقت بقى عدد مهول من اليوتيوبرز كل شغلانته 

في الحياة إنه يدخل يشوف أكلة ويقلدها في خمس ثواني

ويجيب مرتب شيف عمومي .. ومسمي نفسه الشيف 

من غير لا تدرج وظيفي ولا بهدلة وغسيل مواعين 

ده غير إنه لا حد داق وراه اللي عمله ده 

وعرف إن كان فعلاً كويس ولا مصيره الزبالة 

ولا حد قادر يعدل عليه .. وزمان كان الشيف 

يدخل المطبخ علشان يعمل أكل صعبة 

الاستاف العادي مش قادر يعملها لأنه معندوش الخبرة لده

النهارده اليوتيوبر من دول تلاقيه طول اليوم 

بيعمل في عجة وشكشوكة وسندوتشات جبنة بالطماطم 

وأي حاجة عليها دوريتوس مطحون وجبنة ويحطها في الزيت

وخلصنا على كده ، وعنده جمهور رهيب بيتابعه 

ده يا راجل فيه يوتيوبرز مسميين نفسهم شيفات 

وكل شغلانتهم في الحياة إنهم يعملوا اندومي

مرة العادية ومرة الكورية ، ومرة الصينية 

ومرة يعملوها زي ما هي ومرة يعملوها بماجي 

ومرة يعملوها ببيض ومرة يعملوها بتونة 

ومرة بورنيش الجزم .. أي حاجة تبقى جديدة وخلاص

هروها وهرونا معاهم وجابولنا حموضة وارتجاع مريء

بس اسمهم ع النت شيفات .. وليهم جمهور

وبيعملوا فلوس .. ربنا يباركلهم 

النوع الثالث : الروتين اليومي

واللي نعرفه عن كلمة الروتين إنه حاجة بتتكرر كل يوم 

وكل البشر في جميع أنحاء الكوكب بيكروه 

إلا النوع ده من الروتين اللي بيقدموه 

نوع من اليوتيورز عليهم اللعنة .. 

والنوع ده من اليوتيوبرز هو الأخطر بين كل الأنواع 

ودي واحدة ست ضروري ست طبعاً

تكون فوق ال ١٠٠ كيلو قايم وانت طالع 

كل اللي بتعمله في حياتها إنها بتعمل شغل البيت 

من طبيخ لتنضيف لغسيل مواعين لغسيل هدوم 

طب ما برافو عليها .. دي ست واخدة بالها من بيتها 

لا انت فاهم الموضوع غلط .. دي بتعمل شغل البيت 

بس مش بينها وبين نفسها ، دي بتعمل كل ده 

قدام الكاميرا بلبس البيت اللي له شروط معينة 

علشان نلاقي عندها المشاهدات الفلكية دي 

ما تفهمش الفكرة جات منين .. بس واضح 

إن فيه عيل إبن حرام .. قرر في يوم إنه 

يجند مجموعة من الستات وخلاهم يعملوا كده 

مقابل أجر وهو قاعد رافع قرونه بيلم الغلة 

ورا المشاهدات اللي بالملايين دي .. 

ولما تبص للنوع ده من الفيديوهات تستغرب قوي 

ده ڤيوهات فيديو واحد منهم فلوسها تجوز 

عشر شباب مش لاقيين ياكلوا يا عيني 

والأغرب هو إنه ليه حد ممكن يتابع حاجة زي دي 

يعني هي هتعمل ايه جديد غير الستات 

ايه المغري في إني أتفرج على واحدة 

بتغسل سجادة ولا بتغير أكياس المخدات مثلاً

ده الواحد مننا يوم التنضيف بيهج من البيت

ويبات بره لعند ما يخلصوا ، وبيكون أكتر يوم 

مليان خناقات في كل البيوت المصرية

مفيش شك إن اليوتيوبر اللي بتقدم المحتوى ده 

عليها حرمانية كبيرة هي وكل الفريق اللي وراها 

من ناس بتصور أو بتدير القنوات دي 

أو بتعمل مونتاچ أو حاجة تخصها وتخص محتواها 

وأي فلوس داخلة من المحتوى ده فهي حرام ١٠٠٪

النوع الرابع : المحلل الاستراتيجي

طول عمرنا نعرف إن المحلل ده شخص عنده خبرة في مجال محدد 

وله تخصص بيكون دارسه كويس قوي ومتفوق فيه 

وواخد شهادات فيه ده إن ما كانش محضر دكتوراه يعني

يعني تلاقي حد معاه أعلى الشهادات في الإقتصاد مثلاً

فبقى محلل إقتصادي .. تحصل مشكلة في الأسعار

ولا سعر الدولار يتغير ، يطلع يحللك ده حصل ليه 

وازاي ، والمفروض نتصرف إزاي مع ده 

ولا نعمل ايه في الأزمة دي .. أو مثلاً

محلل رياضي ، وده برضه المفروض

 يكون دارس لمدة مش صغيرة ومتابع طول حياته 

كورة كويس ولما تحصل أزمة بين ناديين 

أو حد اتنقل من نادي لنادي يقعد بقى يقولك 

ده حصل إزاي وليه .. وتلاقيه دارس القوانين كويس 

وفاهم اللوايح .. وده كسب ليه وده خسر ليه 

علشان كده اسمه خبير وكله بالأدلة والبراهين 

وفي نوع تالت من المحللين وهو المحلل الفني 

وده بيكون المفروض دارس نقد في معهد سينما 

ولا فنون مسرحية ومحضر دراسات في المجال ده 

ولما ينزل عمل جديد يثير لا مؤاخذة بلبلة 

يبدأ بقى يقول رأيه ويحلل بقى اللي حصل 

وايه هي الأسباب اللي خلت ده يحصل 

وأداء فلان كان كويس علشان كذا أو كان وحش

علشان ما عملش كذا .. إنما بقى من فترة ظهر 

نوع من اليوتيوبرز بتاع كله .. ودي حاجة ما شوفنهاش 

في أي حتة الصراحة ، وده واحد بيكون قاعد بيدور 

على التريند بيتركب منين علشان لا مؤاخذة يركبه 

تايه يا ولداه ، نزل إعلان كويس ولا وحش 

المهم الناس اتكلمت عنه وتريند يلا نحلله 

نزل فيلم ، مسلسل ، ماتش كورة ، أي حاجة 

الناس بتتكلم عن الموضوع ، يبقى نفتح فيديو 

ونقول كلمتين .. صح ، غلط .. مش هتفرق 

المهم نبقى راكبين التريند ، كده بدون معايير ولا دراسة 

انت دارس الكلام ده يا إبني ؟ إنت عارف إنت بتقول ايه يا حبيبي ؟

والنوع ده لما تبقى الدنيا هادية. ومفيش حاجة 

ع التريند ، تلاقيه ماشي يحلل أي حاجة 

ماسورة مياه اتكسرت في شارعهم 

خناقة بين الجزار اللي تحت البيت 

وصاحب عربية الفول اللي بيقف قدامه 

أي حاجة تنفع تتحلل وما تنفعش تتحلل هو يحللها 

المهم الفيوهات واللايكات والفلوس .. 

وللأسف النوع ده خطير لأنه بناءاً على جهله 

بيخلق جمهور جاهل أكتر منه مقتنعين بيه 

مع إن اللي بيقوله بلح 

واليوتيوبرز أنواع كتير فيه منهم اللي بيبسطلك علم 

ومنهم اللي بيعلمك لغة جديدة 

أو مهارة جديدة تاكل منها عيش 

ومنهم ناس كتير قوي مفيدين وممكن يكونوا سبب 

في تغيير حياتك للأفضل 

ياريت لو تعرف حد فيه صفة من الصفات

اللي اتكلمنا عليها في مقالنا النهارده

تقولنا في الكومنتات

وما تنساش تشترك في المدونة

علشان يوصلك كل جديد

وبكده تكون انتهت مقالنا النهارده عن أنواع اليوتيوبرز

واستنونا في مقال جديد