أنواع اليوتيوبرز (الجزء الأول)

 

أنواع اليوتيوبرز (الجزء الأول)

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

على التريند حتى لو كلف كتير فله ناسه .. 

الناس اللي ما يعرفوش يعيشوا من غير كاميرات ولا تصوير 

الناس اللي دايمًا ستاند باي ، اللي بيلفوا ويجربوا 

واللي فاضحين نفسهم بنفسهم 

الناس اللي ما بيتبلش في بوقهم فولة .. 

اللي عايشين على الڤيوهات واللايكات 

وأكبر أمنية في حياتهم تزيد في قنواتهم الإشتراكات 

الناس اللي كل حياتهم تحديات وحركات .. موضوع مقالنا النهارده عن

أنواع اليوتيوبرز ، واليوتيوبرز أنواع كتير

 صحيح فيه منهم المفيد واللي بيقدملنا معلومة حقيقية 

ومنهم اللي بيسهل علينا أمور كتير في حياتنا 

لكن إحنا موضوعنا النهارده على النوع الغالب منهم 

اللي يبيع نفسه علشان التريند ، ودول هنقسمهم لكذا نوع

النوع الأول : الريڤيور 

والنوع ده من اليوتيوبرز اتعود من صغره يجرب كل حاجة 

وأي حاجة وعنده كمية فضول رهيبة 

فضلت تكبر معاه وتطور الموضوع لدرجة

 إنه اتعود يجرب كل حاجة قدام الناس ، قدام الكاميرا 

ووظيفة الريفيور في الأول كانت مهمة جدًا

وبتنحصر في إن ده واحد بيدخل مطعم أو فندق مثلاً

أو بيجرب منتج معين وبينقل تجربته دي للناس 

يعني يقولك الخدمة حلوة ولا وحشة ، المنتج تمنه فيه ولا لأ 

غالي ولا رخيص .. يستاهل الكلام اللي بيتقال عليه ولا لأ  .. 

كده يعني ، وينصح متابعينه بيه أو ينصحهم ما يجربوهوش 

وظيفة أنا بعتبرها مهمة وليها قيمة ، يعني بدل ما تلبس منتج 

ولا تدخل مطعم تتدبس في رقم كبير وخدمة أي كلام 

انت بتدخل على اليوتيوب وتتفرج على واحد صاحب تجربة 

للمنتج نفسه وتشوف إن كان ده مناسب ليك أو لأ 

هو الراجل بيجرب قبلك ويرسيك على اللي فيها

فجأة الموضوع اتغير تمامًا وزاد عن حده 

وبقت الناس اللي بتجرب أكتر من الحاجات اللي ينفع تتجرب 

وده حصل بسبب حاجتين ، أولهم 

لما بقى الريڤيو بفلوس ، وفلوس كتير كمان 

فأنا كصاحب مطعم لما أجيبك تعمل ريڤيو لمطعمي 

وأدفعلك ٢٠ ولا ٣٠ ألف وأحياناً أكتر

ده غير إني هنزلك المنيو كله علشان تجرب براحتك 

ده معناه اني جايبك تنصح الناس يجوا المطعم 

وتقول على الوحش إنه حلو قبل ما تقول 

حاجة على الحلو نفسه .. جايبك تعمل دعاية 

صحيح فيه ناس منهم عندهم ضمير 

ولما بيجربوا حاجة وما بتعجبهمش بيقولوا 

ولكن بقى الغالب إنه إنت جاي تعمل ريڤيو 

يبقى لازم تقول لجمهورك إن ده أحسن مكان في الدنيا 

والحاجة التانية اللي غيرت شكل الريڤيو 

لما بقى العدد اللي بيعمل ريڤيو كبير جدًا 

وبقوا يجربوا كل حاجة تقريبًا .. يعني تلاقيه

جايب كيس شيبسي ب ٣ جنيه كل الدنيا

كلته وجربته وعارفة طعمه وبيعمله ريڤيو 

يا حبيبي ما أنا عارفه وعارف طعمه ايه كويس 

تلاقيه جايب أي حاجة ، زي النهارده يا جماعة 

هقيملكوا الماية الساقعة .. كانت خطيرة 

بديها رييت ١٠ من ١٠ .. يا إبني إنت نازل الأرض جديد

وموضوع الريڤيو محكوم بالضمير وقلة الضمير

وللأسف بقى مليان مجاملات .. وانتشار فيديوهات الريڤيو

كانت سبب إن الناس ماشية تقيم في كل حاجة 

يعني من كام سنة لما واحد صاحبك يعزمك 

عنده على الغدا ، وما علينا هتطلعوا الرمل الدور الكام 

ولا لما الحاجة تعملك طبق بطاطس في البيت 

كان بيبقى ردك الطبيعي إنه تسلم ايدك

وكتر خيرك وخلصنا ، دلوقت بقى 

تاكل أول حباية وتبدأ تدي التقييم بتاعك 

البطاطس من بره كرانشي ، لكن من جوه چوسي 

ولكن لونها مس دهبي وفقدت رونقها في القلية 

اديها ٧ من ١٠ .. يا عم كل واسكت 

ولا كل واشكر الست اللي تعبت في الأكل ده 

بدل ما أمك تلبسك الطبق في دماغك

والحل مع الريفيور إنك يا إما تتابع ناس معينة 

ما بيجاملوش لأن قنواتهم كبيرة ومش محتاجين

يا إما تنزل تجرب بنفسك وتلبس أو لأ دي بتاعتك انت بقى 

النوع الثاني : البيوت فضايح

كنا طول عمرنا بنسمع جملة هي كانت

 سبب استمرار ٩٠٪ من جوازات مصر وهي جملة البيوت أسرار

دلوقت اليوتيوب عكس الموضوع ده تمامًا 

وبقت البيوت فضايح .. والناس اللي بتعمل النوع ده 

من الفيديوهات محتواهم قائم على المشاكل الأسرية 

يعني لو عايشة مبسوطة وسعيدة تضايق 

وطبعاً هتلاقي إن أغلب أصحاب المحتوى ده ستات 

ده إن ما كانش كلهم ، ودي واحدة اتجوزت في بيت عيلة

مش تشوف بقى هتعيش إزاي وتكمل حياتها وسطهم ازاي ؟

لأ ..دي ما صدقت إنها عايشة وسط مشاكل

وتقولك يا أهلاً بالتريند .. والنوع ده من اليوتيوبرز

بتلاقي كل عنواين فيديوهاتهم بتبدأ ب تعالوا شوفوا 

اللي هو لم علينا عبيدك يارب .. والدعوة عامة 

تموت في الفضايح ، وبتنتهي بسؤال استفهامي تشويقي

يخليك عايز تكمل الفيديو ، تفتكروا حصل إيه ؟ 

والمواضيع بتاعت الناس دي محصورة في نطاق العيلة 

والجيران أحيانًا ، وبيحظى بالحجم الأكبر من الفيديوهات

الحموات طبعًا .. تعالوا شوفوا حماتي عملت معايا إيه 

لما عرفت إني جايبة أكل من بره وما طبختش 

مش هتصدقوا عملت ايه في الدليڤري 

طب والدليڤري ذنبه إيه يا حاجة بس ؟ 

وبعد الحموات يجي في الترتيب .. السلايف 

تعالوا شوفوا سلفتي عملت إيه لما عرفت 

إني حامل في توأم .. مش هتصدقوا اقنعت جوزها 

تحمل تاني إزاي ؟ .. وانتي تقوليلها ليه ؟

انتي لازم تعرفيها انك حامل في توأم ، ما انتي اللي كيادة 

وبعدين اقنعت جوزها تحمل تاني ليه ؟

هتجرب يمكن تحمل في توأم هي كمان 

جايز عليه سحب اليومين دول .. ولا ده موسمه 

وبعد السلايف تيجي على طول العمات .. 

وأحيانًا مرات الخال .. تعالوا شوفوا عمتي 

ومش بس كده .. لأ دي عمتي الحرباية 

تعالوا شوفوا عمتي الحرباية عملت إيه لما عرفت 

إني باخد مصروف من حمايا .. مش هتصدقوا 

دفعت كام للمحامي اللي حجر عليه .. 

وانتي برضه غلطانة .. انتي تاخدي مصروف من حماكي ليه ؟

ولا هي فراغة عين .. وهكذا من مواضيع 

بقى هي دي صلة الرحم ؟ .. منكوا لله 

والنوع ده من اليوتيوبرز تحصل عندها مصيبة 

لو اتجوزت في بيت هادي .. ودي من شروطها

الأساسية في اي جوازة .. إن جوزها ما يكونش وحيد 

لأ يكون عايش مع أهله كلهم في أوضة وصالة علشان الصاصبينس

أو مثلاً لو حماتها توفت .. تحصل كارثة 

تزعل قوي وتقطع الأكل فيها أسبوعين 

مش علشان الست اللي ماتت .. لأ طبعاً

علشان الريتش اللي هيقع ومش هتلاقي محتوى تنزله يا عيني 

والنوع ده من اليوتيوبرز لو حصل واضطرت 

انها تتجوز شاب وحيد لا أب ولا أم ولا أخوات 

بتحول كل مجهودها على الجيران .. تعالوا شوفوا 

جارتي رشتلي سحر على الباب إزاي .. 

مش هتصدقوا عملتلها عمل كلفني كام .. 

مش عايزين نعرف كلفك كام يا ستي .. 

وبعدين هي رشتلك سحر وانتي عملتيلها عمل 

الشياطين فاضيالكوا بقى.. ده ولا المداح 

ده النبي وصى على سابع جار يا مفترية يا اللي ما تعرفيش ربنا 

ولو انت جديد على النوع ده من الفيديوهات

هتستغرب .. هل فيه واحدة في حياتها كل المشاكل دي ؟

أحب اقولك لأ .. وإن الناس دول بعد ما فيديوهاتهم 

بقت تجيب ملايين المشاهدات والقرش لعب 

بقى عندهم كتاب بيكتبوا المحتوى ده وفريق عمل كامل 

متخصص إنه يحبك حبكة زي دي ولا محمد سامي 

في حعفر العمدة .. هتسألني سؤال إنه الست دي أهلها 

وحماتها وعماتها وجيرانها سايبينها كده ازاي ؟ 

أنا هقولك الست دي بتحسبها ازاي ؟ 

أنها تعمل محتوى لمدة خمس سنين .. تعمل كام مليون 

تقطع علاقتها بكل اللي يعرفوها .. سهلة وبسيطة 

مش مهم الأهل .. المهم الفلوس والفيوز 

النوع الثالث : ملوك التحديات 

والنوع ده من المحتويات لازم يكون قائم

على إن فيه فردين أو أكتر .. عيلتين أو أكتر 

يعني ما ينفعش حد يطلع كده بطوله ويعمل ده 

لازم منافسة علشان الناس تتفرج .. وكل ما المنافسة

كانت غير شريفة الفيوهات كانت أعلى .. 

والناس دي دايمًا بيبدأوا حلقاتهم بصوت عالي 

في محاولة لخطفك ، وإنه يقول العنوان كله في نفس واحد

حتى لو هياكل الكلام بالشكل ده .. 

مراتي النهارده اتحدتني مين فينا يخلص كيلو شطة

قبل التاني وأن قبلت التحدي 

يا ترى هنعمل غسيل معدة في أنهي مستشفى 

فزي ما النوع اللي قبله كان بيبدأ بتعالوا شوفوا

وينتهي بسؤال مش هتصدقوا عملت ايه 

النوع ده برضه من المحتويات له شكل معين 

فتلاقيه بيبدأ دايمًا بإن فلان اتحداه .. مراته اتحدته 

البواب اتحداه .. جون سينا اتحداه .. 

ما تفهمش هو فيه انسان عادي كده ينزل على الصبح 

يمشي في الشارع يلاقي كل من هب ودب بيتحداه 

وبينتهي بسؤال برضه ولكن فيه النتيجة 

زي ما هو موضح بالمثال السابق ذكره ،

 قالك هنعمل غسيل معدة في أنهي مستشفى  

ده معناه ان فيه أكشن وصاصبنس ، وده معناه انه فيه ڤيوز 

وڤيوز يعني فلوس ، تكفي غسيل المعدة وتزيد 

وأغلب الفيديوهات اللي من النوع ده .. بتكون عن الأكل 

يعني اللي بيعمل الموضوع ده بيحسبها حسبة بسيطة 

احنا بدل ما نطبخ في البيت ونشتغل نفسنا 

احنا كل يوم نطلب أكل من بره ، ونتحدى بعض 

قدام الكاميرا مين فينا هيخلصه الأول .. 

منها أكلنا أكلة كويسة ، ومنها دخلنا فلوس 

لا وممكن مع الوقت المطاعم هي اللي تبعتلنا نعمل التحديات بأكلها 

وطبعاً أول حد داس لايك على القصة دي 

وقالك بس هو ده المجال اللي لازم نشتغل فيه 

كانت المدام ، طبعاً لا هتطبخ ولا هتغسل مواعين 

وهتعيش برنسيسة .. آكلة شاربة ، محلية 

مزاجها عنب .. دي جوازة العمر .. 

وطبعاً زي ما قولنا كل ما كانت التحديات دي 

مؤلمة أو فيها أكشن زادت المشاهدات 

فتلاقيهم بيتحدوا بعض في أكل حاجات زي الشطة 

بيتحدوا بعض في أكل كميات تكفي شهور

يتحدوا بعض إنهم ياكلوا صنفين على بعض 

العلم والايمان حرم تواجدهم مع  بعض .. 

يعني تلاقي فيديوهات بالشكل ده .. 

مراتي اتحدتني النهارده إني آكل رز بلبن بالسمك البوري 

الله يقرفك .. ويعملها عادي ويرجع طول الليل 

مفيش مشاكل المهم الفيوز … وداعًا لآلام المعدة 

وكل ما يكون التحدي أغرب وأغرب يبقى مصلحة 

مراتي اتحدتني النهارده تاكل أم علي وصوابع زينب 

ايه ده ؟ طب ما ده عادي يعني .. لأ إنت فاهم غلط 

دول مش حلويات .. دول بشر حقيقيين

أم علي جارتهم ، وصوابع زينب صاحبة السنترال اللي تحت البيت 

والناس دي بتبطل المحتوى ده في حالتين اتنين بس

يا إما يتطلقوا وما يلقوش حد يتحدوه .. 

أو يجيلهم قرحة في المعدة أو إرتجاع المريء 

النوع الرابع : النحيت 

 وده واحد فاضي وما عندوش حاجة يقدمها للناس 

ولا موهبة ولا علم ولا مهارة معينة ممكن يبهر الناس بيها 

وكل اللي يمتلكه من الحياة موبايل ونت .. يقعد بقى ساكت ؟

ولا يتعلم مهارة جديدة يمكن يبقى مفيد .. ؟ 

لأ طبعاً .. هو عايز يتقال عليه صانع محتوى

عايز يبقى يوتيوبر .. يطبق باليومين على التيك توك 

يدور على أغرب واقذر الفيديوهات وأكثرها عري 

ويلبس هيد فون موصلها بالخلاط .. أكيد مش شغالة ولا ليها لازمة

ويطلع على الناس بقى .. يوريهم الفيديوهات اللي جمعها

ويعلق عليها بطريقته .. شوفوا دي بتعمل إيه

شوفوا دي لابسة إيه .. شوفوا دي بترقص إزاي 

وعلى اساس إن هدفه من كده هو إنه يحذر الناس

ما يتابعوش النوعية دي من الفيديوهات علشان ما ينجحوش

ويحسوا انهم بيعملوا حاجة ، أو يزايد على نفسه أكتر

ويقولك هدفي من الفيديوهات دي إني أفضح البنات دول 

وأخليهم يبطلوا يعملوا اللي بيعملوه ده .. 

والله يا صاحبي ما حد بيتابع الفيديوهات دي قدك 

وانت اللي بتشهرهم وبتجيبلهم جمهور على جمهورهم

ولو البنات دي بطلت تعمل فيديوهات بالشكل ده 

هيتقطع عيشك ومش هتلاقي حاجة تتكلم عليها 

ده انت يا راجل يا محترم بتاخد أوحش فيديو فيهم 

وتحط صورة منه على الفيديو من بره 

علشان تخلي الناس تدخل تتفرج ، علشان المشاهدات تعلى 

ده رقم واحد .. رقم اتنين بقى ، إنت تقدر تقولي 

هو انت بتعمل ايه في حياتك ؟ يعني دول ناس 

عملوا محتوى هنفترض إنه قذر وشمال وكل الكلام ده 

إنت كل اللي عملته إن إنت جبته وعلقت عليه 

يا إبني هو ماتش كورة ؟ وفيه نوع تاني بيعمل نفس الحاجة 

بس مش بالظبط .. هو قالك ايه اللي يدخلني الحارة السد دي 

وأشيل نفسي ذنوب مش بتاعتي .. وده كل اللي بيعمله 

إنه بيختار شوية مواقف وفيديوهات مضحكة 

ويعلق عليها بطريقته برضه .. بس بشوية أفورة 

وده إلى حد ما مقبول .. لكن في الآخر لا هو قدم 

ولا هو أخر .. ولا وصلت لجمهورك حاجة 

انت مجرد نحيت ومتنمر .. مش أكتر 

واليوتيوبرز أنواع كتير مختلفة .. منهم اللي بيقدملك معلومة 

تفيدك وتخلي يومك يكون أحسن .. 

ومنهم اللي بيقرالك كتاب بصوت جميل .. 

ومنهم اللي مجرد بيرفه عنك .. مش كلهم زي الأنواع 

اللي اتكلمنا عليهم في مقالنا .. 

ياريت لو بتابع حد من نوعية اليوتيوبرز دول

تقولنا في الكومنتات.. وما تنساش تشاركنا رأيك 

وتشترك في المدونة علشان يوصلك كل جديد

وبكده تكون انتهت مقالتنا النهارده .. 

أشوفكم على خير .. في مقال جديد