أشكال وأنواع التعارف في الشارع المصري

 أشكال وأنواع التعارف في الشارع المصري

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

استعدوا لجرعة مكثفة من الضحك 

من أعماق أعماق السوشيال ميديا 

أهلاً بيكوا مرة تانية في مدونتكم ومن غير سلام 

لأن زي ما انتوا عارفين كتر السلام بيقل المعرفة 

وموضوع مقالنا النهارده عن التعارف.. 

التعارف موضوع بيشغل ناس كتير جدًا.. 

بيختلف غرضه من واحد للتاني.. 

فيه ناس غرضهم من التعارف مجرد المصلحة 

وناس غرضهم من التعارف إنهم يلاقولك مدخل علشان يقدروا يبتزوك

وناس تانيين.. فاضيين كل غرضهم من التعارف هو حرق الوقت 

التعارف ملوش أرض ثابتة وبيحصل في أي مكان 

ياما اتعرفنا على ناس اول مرة نشوفهم وعارفين 

اننا مش هنشوفهم تاني أبدًا.. في المواصلات مثلًا 

بتلاقي نفسك بكل أريحية بتحكي للي جمبك في المواصلات

أدق أدق تفاصيل حياتك وأسرارك 

يمكن علشان عارف انك مش هتشوفه تاني 

وارد.. بس أغلب تعارفنا في المواصلات بيكون لحرق الوقت 

(تعارف الفراغ والزحمة) 

وفيه ناس بتُجبر على التعارف.. زي تعارف سواق التاكسي

اللي في الغالب بيتعرف عليك في محاولة بائسة يائسة منه 

لفتح أي كلام يوصله لخيط يحكي منه ظروفه ومشاكله 

وكم الديون اللي عليه في محاولة منه انه ياخد منك 

أكبر أجرة ممكنة.. وعلى الاغلب بيكون كل الكلام ده 

ما حصلش. مجرد سيناريو عمل عليه بروفة مرة واتنين 

مع زبون واتنين وبقى عارف أنهي حتة بتجيب سوكسيه 

وبتكسب تعاطف الناس.. وده التعارف لكسب التعاطف 

كام مرة كنت واقف في حالك او قاعد في مكان 

ويجي حد يطلب منك ولاعة.. وفي ثواني بتلاقيكوا اتعرفتوا

وأحياناً اكتر من كده… فيه ناس تديهم صباعك ياكلوا دراعك

وده اللي ممكن يحصل مع الشخص اللي بيطلب منك ولاعة 

يعني بمجرد ما تديله الولاعة يبدأ يقيمك 

من شكل لبسك وولاعتك وطريقتك 

وتلاقيه فجأة بيقولك انا مش شحات يا باشا والله 

انا من الكونغو الديمقراطية والفلوس وقعت مني 

وحنيني للوطن خدني وعايز اروح بلدي 

من اكتر حالات التعارف المتعارف عليها في مصر 

التعارف للشقط.. وده ملوش حدود وكل ما تتهرش طريقة 

المبدعين من الحكاكين يبتكروا طرق جديدة تاكل مع البنات 

يعني الغرض موجود من قديم الأزل بس الطريقة 

هي الطريقة هي اللي بتتغير مع الوقت 

في الاربعينات مثلا كان التعارف للشقط عبارة عن جمل ثابتة 

زي مسائك سعيد يا مادموزيل.. الجو منعش النهارده

ولو حصل نصيب يعزمها على كونياك مشروب الفتاة المهذبة 

لعند ما وصل التعارف لطريق مغيم مليان شبورة 

واتغيرت كل المعايير مع تغير الزمن والاذواق 

لعند ما وصل للحالة دي.. 

سبحان الله فعلًا .. شبه البني آدمين بالظبط 

ما هي أتوبيس نقل عام فعلاً

يشير بيده 

رمسيس .. رمسيس .. رمسيس 

لا بالرقم القومي .. 

لا يا كابتن كله إلا الإهانة .. 

لا قصدي يعني عرفت نقطة ضعفي .. الإهانة 

هو اللي كسب ..  

ياااه .. بداية علاقة جميلة .. لا تقولي بقى رومانسية 

ولا مش عارف إيه .. هي الإهانة يا جماعة 

الإهانة الباب والمفتاح للعلاقات في مملكة الحيوان .. سبحان الله 

في الوقت الحالي كل المعايير اتغيرت واتطورت 

مع انتشار السوشيال ميديا.. جرب تفتح مرة رسائل ال others 

عندي أي بنت وهتشوف العجب.. 

من ضمن أغراض التعارف المختلفة 

التعارف بغرض تطوير البيزنس 

زي لما تكون في شغل جديد ويكون غرضك تتعرف على اهم اتنين

طبعًا هتقولي المدير.. او ال hr.. للأسف لأ 

أهم اتنين في شركتك الجديدة دايمًا أولهم الاوفيس بوي 

لانه اكتر حد يقدر يديك تقييم واضح عن كل العاملين في الشركة

قاعد في مكانه لا شاغله تارجت ولا ضغط شغل

وبيراقب بقى من بعيد.. فتلاقيه عارف 

الخبيث من الطيب.. الشاطر من اللي عامل شاطر 

عارف القرد مخبي ابنه فين 

وتاني حد بعد الاوفيس بوي.. سكرتيرة المدير 

هي اللي عارفة امتى تدخل تطلب اجازة وامتى تدخل تطلب زيادة

وامتى ما تهوبش ناحية المكتب خالص

التعارف أشكال وأنواع ومراحل زي ما له بداية 

له نهاية واحياناً ممكن تكون مؤسفة 

أخيرًا.. كل اللي بيبان من التعارف انه بس كلمتين

لكن الحقيقة.. ان النفوس بتتلاقى لغرض 

فاللي هيتعرف عليك ويقبلك وتقبله في علاقاتك

يا اما شبهك.. يا اما درس من دروس الحياة

يا هيعلمك.. يا هيعلم عليك