فيلم Dawn of the planet of the apes وعلاقته بالشبشب المقلوب  في فيلم Dawn of the planet of the apes  ، واللي صدر  سنة 2014 … من إخراج مات ريفز ، واللي بيحكي عن  مجموعة من القرود تطوروا بشكل ما .. لعند ما قدروا يعملوا تمرد و ثورة و شغب منظمين ضد البشر  الغريب في الأمر إننا كمشاهدين تعاطفنا مع بعضهم  و انبهرنا بإمكانيات بعضهم  لكونهم بس شبه البشر في التعامل مع الأزمات  والمشاعر زي الغضب ، والكره والحب  أنا كمان انبهرت بيهم .. بس ما قدرتش أحطهم في مقارنة بالبشر و إنبهاري ده ما خلانيش أشوفهم في مرتبة البشر خالص  زي ناس كتير حوالينا  ناس كتير فاكرة إنه مادام إتنططوا على شجرتين  وأخدوا اجر على تنطيطهم ده .. يفوق أجور دكاترة ومهندسين و معلمين  وناس مفيدة للبشرية  فاكرين إن مادام أجرهم أكبر  يبقوا اهم من الناس  لدرجة إنهم بقوا بيعايروا بعض بالتنطيط ده  ويعلوا على بعض .. مش واخدين بالهم إنه في الآخر إسمه  تنطيط  و لو الناس إنشغلت بيه شوية وإنبهرت بيه  مسيرهم ينسوه  الناس دي ببساطة فاكرين إنهم مهمين للغاية  مادام حد قدر تنطيطنا و شوية الدوشة بالفلوس دي كلها  يبقى إحنا جامدين جداً .. مش واخدين بالهم  إنهم مجرد دمى للتسلية .. قطع ديكور  لو شيلناها من المشهد الحياة هتكمل وتمشي عادي  شوية دوشة سهل نعملها ميوت  و تنطيط ع الشجر إحنا في غنى عنه  بس للأسف ده محصلش .. لأنه مع التطور الجيني اللي حصل عند القرود دول  بدأ يتطور عندهم إحساس بالغرور وجنون العظمة  وخلاهم يتنططوا على بعض .. ولا تعرف تعمل الشقلباظ ده  ده بتاريخك كله .. ويتخانقوا ويتصالحوا  و أهي كلها سيطرة على التريند فارغة  فيه هنا سؤال مهم ..  إيه علاقة عنوان الحلقة (الشبشب المقلوب) بالقرود دول وتنطيطها أنا هقولك … فيه نظرية عند غالبية المصريين بتقول  إنك لو شفت شبشب مقلوب وما عدلتوش  ممكن ده يكون نذير شوؤم ، وممكن يوصل  إن صاحب الشبشب ده يموت  لعنة  تخيل كم الكفر اللي يخليك فاكر  إن حاجة زي دي ممكن تحدد مصيرك  وتعملها أهمية وتديها قدر من اهتمامك وتفكيرك  دي نفس الفكرة بالظبط في موضوع القرود  الإنبهار اللي بيصحب حالة تنطيط القرود دي ..  لا يعني بالمرة إنهم مهمين  وتقديرنا ليهم بناءاً على المعيار الخاطئ ده  بيعملوا فلوس  ومبرر واهي  تعبوا في حياتهم  ده خطر جداً .. و المفروض إنهم مجرد حاجة كده  بتعدي علينا في حياتنا وإحنا مكملين عادي  وبناءاً على تقديرنا الخاطئ ده أطفالنا وكل حد بياخدنا قدوة  هيقدرهم بنفس الطريقة بناءاً على فلوسهم  طب وإيه المشكلة في كده  ؟!  أنا هقولك .. المشكلة يا صديقي إنه هيحترم المعيار نفسه  الفلوس  هيقدسها وهيعمل أي حاجة علشان يوصل لهنا  وهينكر أهمية أي علم .. ودين .. وثقافة .. وقيم .. وأخلاق  هينكرهم لأنهم مش هيوصلوا لنفس المعيار .. مش هيوصلوه للفلوس دي  فتلاقي عيل 12 سنة ساب مدرسته و رمى كراسته  وراح سجل مهرجان علشان يركب عربية  طيب … من غير ما يتعلم  من غير ما يفهم صح وغلط ..  في النهاية حابب أوجه كلامي لكل عامل نظافة  لكل بائع متجول .. لكل نجار .. لكل حداد .. عامل بناء  لكل سائق .. طبيب مدرس أو مهندس  ولأي حد أياً كان بيعمل إيه في حياته مهم  لازم تكون متأكد إنك مهم لكل شخص على كوكب الأرض  وبدونك الحياة هتقف  عايزك تكون متأكد إنك بطل  طول ما انت بتنزل شغلك المهم جداً وتكفي بيتك  من غير ما تعمل حاجة غلط  انت بطل  عايزك تعرف لما يعدي عليك حد من القرود دول بعربيته  تأكد إن سلطتك أعلى من سلطته  صوتك أعلى من صوته .. و ممكن يكون أحلى من صوته برضه مش عارفين  بس هو أعلى من صوته  وقتك أهم من وقته .. لازم تتأكد من ده حتى لو فيه ناس فهموك العكس  لازم تعرف إن كل مسكة مقشة .. أو مشرط ولا دركسيون  أهم بكتير من ماسكة مايك اللي ماسكه مش عارف يغني بيه الا باوتو تيون  رأيي الشخصي إن الناس دي غير مهمين وما ينفعوش قدوة لحد مجرد شوية دوشة .. تنطيط .. فاصل بيمر في حياتنا وبيختفي  رأيي الشخصي لازم نلحق نعدل مفاهيمنا ونعرف إن النجاح بشكله الحقيقي  ملوش أدنى علاقة باللي هما فيه ده  وإن الأرقام مش كافية علشان نحكم على حد سواء ناجح أو لأ  رأيي الشخصي إنه النجاح هو آثارنا الباقية في نفوس بعض  أشوفكم على خير ...