هل إختلافنا مهم لعيشنا سويًا على أرض واحدة ؟! - عريانين

هل إختلافنا مهم لعيشنا سويًا على أرض واحدة ؟! - عريانين

 إحنا بنتولد عريانين وبنموت عريانين 

ألمنا بنحسه لوحدنا .. وفرحنا بنحسه لوحدنا 

أيامنا الحلوة والوحشة بنمر بيها لوحدنا 

بنختار أسلوب حياة .. ونتيجته بنشيلها لوحدنا 

بنمرض ونموت ونتحاسب لوحدنا … 

ليه بنقيم بعض ؟!

ما أعتقدش حد هيتحاسب مكان حد 

ولا حد هيحس بوجع حد بالمعني الحرفي .. 

هو آه ممكن نحس ببعض ونتعاطف مع بعض 

لكن إستحالة يكون إحساس بالألم حرفي .. 

يعني أنا لو إيدي إتعورت .. إيدك إنت مش هتوجعك 

هو إنت ممكن تتعاطف معايا فقط 

ما أعتقدش كمان إن حد هيتدفن في حفرة حد 

كل واحد هياخد حفرته 

طب إزاي عايزين كل حد فينا يمشي اللي معاه في طريقه 

وإذا كنا إحنا ربنا خلق لكل واحد فينا رحلة مختلفة 

مسترسلاً

طب ما إنت هتقولي ببساطة .. 

وإنت إيه حشرك في موضوع زي ده ؟! 

مادام المفروض ما نتدخلش في حياة بعض ولا نقيم بعض 

ما انت بتقيم و بتّدخل في سلوكياتنا أهوه 

مش بتّدخل .. بس مادام فيه جهات بتقدر تغير سلوك الناس للأسوأ 

ممكن نحاول نغير ولو جزء بسيط للأحسن 

إنت بس بتقول كده علشان ما تعرفش خطورة ده إيه ؟! 

أنا أقولك خطورة ده إيه  

مسترسلاً 

خطورة ده .. إننا ممكن نتحكم في عقول و سلوكيات بعض

 بناءاً على أهوائنا الشخصية أو ضغوطاتنا 

خطورة إنك تتحكم في عقل وإختيارات الشخص اللي معاك 

سواء إبنك .. أو شريك حياتك .. أو صاحبك 

ده بيمحي شخصيته .. وبيحوله لحد بيحاول يبقى شبهك وبس 

مش شبه نفسه .. فيبقى مسخ 

طب ده بيحصل إزاي ؟! 

في حاجتين كلنا بنعملهم غصب عننا واحنا مش حاسين 

أولهم ، الضغط 

الضغط زي ما تربي إبنك اللي هو إنت أهلاوي يااض 

أيوه قول .. لا إضرب على صدرك كده ..

 فإنت هنا مسئول عن تعصبه طول حياته ونتيجة ده أياً كانت 

لو كنت سيبته يختار لوحده كان ممكن يبقى أهلاوي برضه

 بس مش هيوصل لدرجة التعصب

وممكن كان يطلع رسام ومعتزل الكورة .. مثلاً 

طيب هو الضغط بس اللي بيخلي شريك حياتك أو الشخص المسئول عنه يفقد شخصيته

لا فيه طريقة تانية سهل السيطرة بيها جداً 

بمحفزات المتعة عند أي إنسان 

فممكن إهمالك في نظامك الغذائي يورث إبنك جينياً وسلوكياً شكل جسم يضايقه طول حياته

صحياً وبسبب التنمر اللي مالي المجتمع 

أو مثلاً إنك تعوده على أسلوب حياة مليان بالرفاهية 

فبعدين هتكون مسئول عن مسئولياته هو شخصياً لأنه إعتمد عليك في كل حاجة 

بس برضه سامعك بتقولي يعني كل ده بيحصل بسبب إننا بنقيم بعض ؟!

أيوه .. لأنك لما تعيب في إختيارات اللي قدامك لمجرد إنها مش شبه إختياراتك 

فده هيفقده الثقة في نفسه و في إختياراته طول حياته 

وخصوصاً لو كنت موفرله بيئة مليانة بالضغط ومحفزات المتعة اللي إتكلمنا عنهم 

فتخليه عايش بطريقتك .. بيفكر بدماغك .. بيلبس زيك بيحب اللي إنت بتحبه 

وبيكره اللي بتكرهه .. وهو مش عارف ليه 

وبالشكل ده نكون كلنا نسخ من بعض 

وما أعتقدش إن ربنا خلقنا علشان نكون نسخ من بعض 

بالعكس ربنا خلقنا مختلفين علشان نكمل بعض 

ومصاييرنا مش واحدة .. يعني طبيعي تلاقيني بفكر بشكل مختلف عنك 

ليا صوت وليك صوت .. ليا مشية وليك مشية 

كل حاجة إكتسبناها جت بناءاً على ثقافات مختلفة ومعايش وظروف مختلفة 

مش مطلوب أكون شبهك .. مطلوب أعاملك فقط بإحترام .. و مطلوب تعاملني بالمثل 

ممكن تنصحني صحيح .. بس مش مطلوب تجبرني عليها 

مش مطلوب إني أعمل زيك بالظبط علشان أعجبك 

مش مطلوب إني أعجبك من أصله 

تخيل لو صحيت م النوم لقيت نفسك في وسط الشارع 

بس عريان .. عريان حرفياً زي ما إتولدت .. 

بس مش عريان بس م هدومك

عريان كمان من إسمك .. ألقابك .. درجاتك العلمية 

معلوماتك .. كفائتك .. مهاراتك .. أرصدتك البنكية عريان 

 الناس ساعتها هتعاملك على أساس واحد بس .. فطرتك السليمة 

إذن رأيي الشخصي إن اللي ليا عندك واللي ليك عندي 

هو الإحترام المتبادل .. وأهم حاجة فيه إننا نحترم قرارات بعض وإختيارات بعض 

وفكر بعض 

رأيي الشخصي إننا مختلفين علشان نكون واحد ونكمل بعض

ومش معنى إننا مختلفين نكون أعداء إحنا بس مش شبه بعض 

دي كل القصة .. 

أشوفكم على خير …