طريق الحرير .. عبودية السوشيال ميديا وعبيد التريند إحنا بنعيش أكثر فترة رواجاً للنخاسة  وتجارة العبيد مرت على التاريخ  واللي بقت أسواقها مفتوحة 24 ساعة على الإنترنت سوق كله بيعرض فيه بضاعته ومستني مقابل إنه يكون تريند مش هيفرق بقى بضاعته دي كرامته ولا شرفه  ولا حتة من جسمها .. المهم التريند .. عدد المشاهدات  عدد اللايكات .. ثم بالتبعية عدد الدولارات  وكل حاجة على الإنترنت وانت قاعد مكانك  مش محتاج دلوقت تسافر وتركب جمال علشان سوق الحرير  ولا تحشد رجالة وسلاح علشان تحتل أرض وتستعبدهم  إحنا ببساطة شوفنا القفص بيلمع فجرينا وقعدنا فيه الغريبة إن الموضوع ناجح بشكل ما ..  الناس دي فعلاً قدرت تحقق هدفها .. قصدي يعني الدولارات  بس نسيوا إنهم بالشكل ده حطوا نفسهم في سجن كبير جداً  لازم يفضلوا راضخين له طول الوقت    ولو إنت وظيفتك في الحياة إن محتواك يكون مجرد  حاجة بين التريقة والوعظ للي قلعت هناك دي  فأحب أقولك ..حضرتك زيها .. يمكن أسوأ  ع الأقل هي بتعتمد على نفسها .. لو قلعت هتعمل فلوس  بطلت تقلع الناس هتنساها .. إنت إيه هيجرالك لو بطلت تقلع ؟! آه هتدور على واحدة تانية تقلع ؟! .. منطقى برضه  وبرضه إنت هتعيش تحت القيد ده طول عمرك  قد إيه إحنا مخادعين .. كل اللي بيظهر قدامك على السوشيال ميديا  هو كذبة كبيرة و وهم كبير  مشاعرالحب .. الكره .. الحزن .. الفرح .. الدهشة .. الفخر .. كله كذب ناس بتتصور صورة أو فيديو وهما في قمة الحب والسعادة  لكن الحقيقة بينهم خلافات الدنيا ..  بس الصورة دي هتعلي الريتش وده هيعمل فلوس ..  صدقني لو حد منهم عارف انه مش هيستفيد من الصورة دي مش هيتصور  دي عملية تبادل بسيطة .. نحط فولورز فلان على فولورز علان  فنضرب الريتش في الضعف  للأسف دي الحقيقة  وده اللي ممكن ما تعرفوش عن علاقات كتير  بين كابلز هيبانولك إنهم في غاية السعادة بس لسبب مختلف  هو سبب قوي برضه .. أرصدتهم البنكية  لكن سعدا بجد .. ما افتكرش .. فما تصدقش  طب ولو صدقت يعني ده خطورته إيه ؟ ببساطة كده ده بيعلي التوقعات عند ناس كتير  فتلاقي ست البيت ناقمة على حياتها  بسبب إنها ما صيفتش في الساحل زي فلان وفلانة  واللي صورهم مغرقة السوشيال ميديا  مش متخيلة ان قعدتها مع جوزها في البلكونة بكوبايتين الشاي  أحسن واكثر حقيقية من كل الصور دي  خطورة إنك ترفع التوقعات عندك بالشكل ده  بيخليك طول الوقت عايش في مقارنة  بين مظهرك ومظهر فلان .. عربيتك وعربية علان  صلعة جوزك و كرشه وسكس باكس فلان  واللي أغلب ده مش حقيقي  متبروز علشان تشوفه كده ..لكن هو مش كده .. فاهم حاجة ؟   من النقاط المهمة واللي ما ينفعش تصدقها إن اللي بيقدملك محتوى عن شئ ما لازم يكون عارف بيه  ومدركه كامل الإدراك ..بالعكس  عايزك تكون متأكد إننا بنحضر للخمس دقايق اللي حضرتك بتشوفهم  لساعات .. بنقول الحلو ونسيب الوحش ..  بناخد الزاوية النضيفة اللي عايزينك تشوفها وبنخبي الباقي  مش مثاليين ولا مدعي المثالية .. ممكن أكون بقدملك محتوى  أعرف عنه أقل القليل  بنصحك بحاجة وانا نفسي ما بعملهاش فيه أسماء علماء ودكاترة بنعيدها مرات علشان نقولها صح  لازم تدرك إن ضحكة إبنك العفوية الغير مقصودة  أحسن بمية مرة من ضحكة طفل فضلوا يلبسوه ساعة  ويحفظوه اللي هيقوله قدام الكاميرا  لازم تدركي إن كرش جوزك بسبب عدم قدرته  المادية والنفسية على تخصيص جزء من يومه لجيم غالي  أحسن بكتير من ساكس باكس الأستاذ اللي تعب في الفورمة علشان العدسة  مش اكتر .. لازم تدرك إن كلمة تعدمني يا أخويا  أصدق وأحن بكتير من كلمة بايبي اللي ممكن تكون اللي قالتها  ما تعرفش من اللغة دي غيرها  في النهاية رأيي الشخصي .. هو إن السوشيال ميديا كدابة  حاول ما تتضللش  رأيي الشخصي إن المشاعر والسعادة الحقيقيين  غاية ما نعرفش نرتبلها .. تعتمد على العفوية بشكل كامل  مش صورة أو فلوج على الإنترنت .. أشوفكم على خير