حسابك البنكي في خطر ، إجراءات يجب إتخاذها للحفاظ على أمان حسابك البنكي 

 عزيزي العميل ، تم إيقاف حسابك البنكي مؤقتًا

نرجو الاتصال بنا لتحديث بياناتك 

الرسالة دي جت لمصر كلها تقريبًا 

واللي مش محتاجة أدلة كتير توضح انها نصباية 

ولو اتصلت باللي باعتهالك واديته بياناتك 

على أساس إنك يعني كده .. بتحدثها

فأحب أقولك .. مع السلامة يا فلوس 

وحسابك البنكي هيتصفر وتبقى ع الحديدة 

علشان كده حبينا نقولك على شوية نصايح 

لو جاتلك رسالة من النوع ده أو مكالمة 

تتبعهم علشان تحافظ على سرية بيانات حسابك البنكي 

أولهم كده ومن الآخر ، إن البنك 

عمره ما هيتصل بيك أو يبعتلك رسالة لتحديث البيانات 

ولو فيه رسالة زي دي حقيقية ، هتكون اخر جملة فيها 

يرجى زيارة أقرب فرع للبنك 

يعني عمره ما هيحدث بياناتك أو يعدلها 

من خلال مكالمة أو رسالة .. لازم تروح الفرع 

تاني نصيحة بقى ، لو بالفعل اتصلت على الرقم

اللي باعتلك رسالة أو رديت على مكالمته 

فإياك تديله أي بيان من بيانات بطاقة الفيزا 

سواء الرقم المسلسل للفيزا اللي موجود قدام 

أو حتى رمز التحقق cvv2 ، اللي بيحتوي على ٣ أرقام في ضهر الفيزا 

أو حتى تاريخ انتهائها .. لأن النصاب ممكن من خلال الأرقام دي 

يعمل شوبينج من أي موقع على الانترنت 

وتلاقي مرتب الشهر طار في بلاي ستيشن 

ولا ترابيزة تنس طاولة .. 

تالت نصيحة .. ما تبقاش اجتماعي زيادة عن اللازم 

وتقول للي بيتصل بيك عن اسمك السداسي 

واسم والدتك وتاريخ ميلادك وبياناتك 

اللي المفروض يعني محدش يعرفها غيرك ..

 يعني شوية حرص بجنيه هيخلوك ما تفلسش 

النصيحة الرابعة بقى ، لو ناوي تشتري حاجة أونلاين 

عن طريق كارت الفيزا .. فحاول تستخدم في عملية الشرا

تطبيق البنك الخاص بيك .. وما تلجأش لتطبيقات وهمية 

ممكن تكون مصيدة ومن خلالها تتسرق بيانات حسابك 

خامس نصيحة ، لو انت وسط عملية شرا لمنتج 

من خلال الفيزا او عملية تحويل فلوس .. حاول بقدر الإمكان

تسخدم شبكة واي فاي آمنة .. وبلاش شغل السنكحة ده 

وتقعد تدور على شبكة مفتوحة في الشارع علشان تفتح منها نت 

ما هو اللي سايبها مفتوحة كده .. مش سايبها لله يعني 

ركز يا عم الحاج .. 

النصيحة السادسة بقى .. مش معنى انك نساي 

وبتكتب كل باسورداتك في ورقة وسايبها في المحفظة 

انك تكتب معاهم بيانات الفيزا أو الحساب أو الرقم السري 

لأنك لو اتنشلت الحرامي هينفضك 

مش هيخلي معاك الهوا نفسه .. محفظتك والكاش اللي فيها 

والفيزا برقمها السري والرصيد اللي فيها 

وايميلاتك بباسورداتك .. ولو اتعرضت لحالة سرقة 

فمن الضروري أول حاجة تعملها انك تتصل بالبنك توقف الفيزا 

النصيحة السابعة والأخيرة بقى علشان نكون عملنا اللي علينا 

لو البنك بتاعك عنده خدمة للرسايل بتبلغ العملا 

بأي نشاط بيتم على الحساب اشترك فيها 

هتلاقي تكلفتها كام قرش ولا كلام فاضي 

أهوه أحسن ما يطيروا القرشين اللي انت تعبان فيهم 

وبالنسبة لنا احنا كفيديولوجي بنقولك 

ما تتصلش بحد واللي عايزك يتصل بيك 

ولو اتصل بيك ما ترغيش معاه في حكايات 

الا لما ترجع لخدمة عملا البنك نفسها واللي هتأكدلك نفس الكلام اللي قولناه 

وربنا يسترها عليك وعلينا