" خندق ماريانا ، أعمق نقطة على وجه الأرض "

 في مارس 2011 ، ضرب زلزال سينداي 

محطة فوكوشيما للطاقة النووية في اليابان

وسبب كوارث كبير ، ولكن مش دي المشكلة 

والمشكلة الحقيقية إن اليابانيين ربطوا ده بحدث غريب جدًا  

لأن الزلزال ده حصل بعد وقت بسيط من ظهور أسماك المجداف على السطح 

واللي اليابانيين بيسموها أسماك القيامة 

وبيربطوا بين ظهورها على أعماق قليلة بالكوارث والزلازل 

وده بسبب أسطورة يابانية بتقول 

إن سمك المجداف رسول من القصر الإلهي البحري 

وإن بمجرد ظهوره على السطح أو في مياه ضحلة 

ده معناه إن فيه نشاط زلزالي أو بركاني كبير في المنطقة نفسها 

وده لأن سمك المجداف بيعيش على عمق 1000 متر 

طب وهو 1000 متر ده عمق يتخاف منه 

ويتخاف من ظهور كائنات بحرية بتعيش فيه ؟ 

إمال لو عرفت بقى إن فيه كائنات بتعيش على عمق 11 ألف كيلو متر

كائنات البشر ما يعرفوش عنهم حاجة 

ولا يعرفوا حاجة عن تكوينهم وصفاتهم 

مش كده وبس .. لا ده منهم كائنات البشر كانوا متأكدين 

من إنهم انقرضوا 100% 

ففي رحلة البشرية لإكتشاف الأرض كان من السهل 

تحديد أعلى قمة في العالم ، أعلى نقطة نعرفها 

واللي هي جبل إيفرست اللي إرتفاعه 8848 كم 

ولكن كان صعب جدًا إكتشاف أعمق نقطة في المحيط 

أعمق نقطة على وجه الأرض 

يعني في الوقت اللي قدر فيه آلاف يتسلقوا جبل إيفرست 

كان من المستحيل ولفترة طويلة حد يوصل لأعمق نقطة 

بل إنهم ما كانوش على علم بيها أصلاً 

إحنا هنا بنتكلم عن خندق ماريانا ، وده عبارة عن

منخفض أرضي في قاع المحيط على شكل حرف V

ومكانه تحديدًا في غرب المحيط الهادي 

بالقرب من جزر الماريانا ، واللي علشان تقدر تنزلها 

فمطلوب منك تنزل لعمق 11 ألف كم تحت البحر 

وعلشان تعرف الرقم ده قد إيه ضخم ومخيف 

فتخيل معايا إننا هناخد جبل إيفرست 

ونغرقه في المحيط بالكامل ، وبرضه هيفضل مسافة تتعدى ال2 كيلو فوق الجبل 

تحت سطح المياه 

لفترة طويلة زي ما قولنا كان من المستحيل الوصول للنقطة دي 

ولفترة أطول مكانش حد متوقع إن ممكن عمق المحيط يوصل للأرقام الضخمة دي 

لحد سنة 1872 لما إنطلقت السفينة الإنجليزية 

HMS challenger في رحلة استكشافية للمحيط 

رحلة إٍستمرت 4 سنين كاملين ، قطعت فيهم السفينة 

112 ألف كيلو متر ، وكانوا في رحلتهم 

كل ما يقطعوا مسافة 225 كيلو متر 

ينزلوا حبل ضخم متحدد عليه علامات لقياس العمق للمحيط

 

ومربوط في أحد أطرافه قطعة حديدية ضخمة 

علشان مجرد ما القطعة الحديدية دي تستقر في القاع 

يقدروا يقيسوا المسافة اللي قطعها الحبل لحد ما استقر في قاع المحيط 

ومع وصول سفينة (تشالنجر) لمنطقة جزر الماريانا 

كانت مستنياهم ومستنية العالم كله مفاجأة كبيرة من نوع خاص 

لأنهم بمجرد ما وصلوا المنطقة دي 

نزلوا حبل قياس العمق في المحيط 

ولكن لقوا إن الحبل بينزل لأعماق ضخمة جدًا 

وده على عكس كل المناطق اللي مروا بيها خلال رحلتهم 

وبمجرد ما نزل الحبل لعمق 8000 كيلو متر 

ضرب المعدن اللي في الحبل في قاع المحيط 

ومكانش حد يتخيل أبدًا إن المحيط ضخم وعميق بالشكل ده 

قبل التجربة دي اللي حصلت بالصدفة البحتة 

وبعدها مباشرةً بدأت تظهر أسئلة كتير جدًا 

عن طبيعة المكان تحت في العمق ده 

وهل فيه هناك مخلوقات وحياة بحرية في البيئة دي ولا لأ 

ويا ترى لو فيه مخلوقات عايشة على العمق ده 

ممكن تكون مواصفاتها إيه ؟ 

لأن عمق زي ده معناه إن الضغط فيه بيصل لـ 703 كيلو جرام للمتر المربع الواحد 

يعني ما يعادل وزن 50 طيارة جامبو فوق الشخص 

اللي موجود تحت كمية المياه دي 

طب إيه بقى مخلوق بحري اللي يقدر يعيش تحت الضغط ده كله 

وإزاي عايش من غير أي نقطة ضوء تماماً 

ومن هنا ، من خلال الأسئلة دي 

كانت رحلة السفينة (تشالنجر) هي السبب ورا ظهور 

ما يسمى بعلم المحيطات الحديث ، واللي كانوا لحد وقتها 

متخيلين إن أعمق نقطة في خندق ماريانا 8000 كيلو متر 

في المكان اللي رسي فيه حبل قياس العمق 

لكن اللي إكتشفوه بعد 75 سنة إن المسافة دي 

مش أعمق نقطة في خندق ماريانا 

لما خرجت سفينة بحوث إنجليزية تانية في سنة 1951 

لاستكشاف نفس النقطة ، ولكن المرة دي كانت السفينة مجهزة 

بمعدات وألات حديثة ، وبدل حبل قياس العمق 

إعتمدوا على جهاز السونار ، واللي كشفلهم 

إن الحفرة اللي خبط فيها حبل سفينة تشالنجر 

مش مجرد حفرة ، لا دي جزء من خندق ضخم 

بيوصل طوله لـ 2550 كيلو متر 

وعرضه بيصل لـ 69 كيلو متر ، وعمقه 11 ألف كيلومتر 

ودي بقت أعمق نقطة مكتشفة على وجه الأرض 

واللي سموها بإسم (challenger deep)

تكريمًا لسفينة تشالنجر صاحبة أول إكتشاف 

إلا إن برضه ما قدرتش السفينة الإنجليزية 

تجاوب على أهم سؤال دار في دماغ كل العالم 

هل فيه حياة بحرية في العمق الضخم ده ولا لأ ؟ 

وأول إجابة عن السؤال ده كانت بعدها بـ 7 سنين 

تحديدًا في شهر مايو 1958 على يد سفينة سوفيتية 

إسمها (فيتياس) واللي جُهزت بالكامل للنزول لخندق ماريانا 

واللي برحلتها كشفت ووثقت وجود حياة بحرية بأشكال ضخمة 

على عمق 7000 كيلو متر تحت المياه 

وتم الكشف عن عدد كبير من الأسماك والكائنات البحرية الغير معروفة للبشرية 

واللي إتسمت في الوقت ده بالوحوش البحرية

ولكن برضه دي ما كانتش إجابة كافية بالنسبة للعلماء 

وبدأوا يجهزوا مركبة تقدر تنزل على العمق ده 

وترصد كل مظاهر الحياة على البيئة دي 

لحد ما نجح أول إنسان في الوصول لعمق خندق ماريانا 

سنة 1960 عن طريق غواصة أعماق إسمها (تريستي)

ودي غواصة سويسرية إتصممت علشان تقدر تستحمل الضغط العالي 

وتصل لأعماق كبيرة ومن تصميم العالم السويسري (جايكس بيكارد) 

وإبنه العالم (أوجست بيكارد) ، واللي بعد رحلة إستمرت لخمس ساعات 

قدروا يوصلوا لعمق خندق ماريانا 

واستقروا لمدة 20 دقيقة في العمق ده 

وبرغم قصر المدة دي ، إلا إنها كانت كافية 

للتأكيد إن فيه كائنات بحرية وأسماك غريبة عايشة على العمق ده 

ولكن تم التكتم على الموضوع لحد ما توفى جايكس بيكارد 

وتم الكشف عن سجلاته واللي كانت مرصود بيها

ظهور مخلوق بحري غريب ، وغير معروف 

على شكل إسطوانة دائرية ، كان بيلف حوالين الغواصة 

وبعدها اختفى بشكل غريب .. وفضل موضوع خندق ماريانا مقفول 

لحد سنة 85 ، لما حصلت حادثة لسفينة أمريكية 

إسمها جلو ماتش تشالنجر ، واللي خلال عمليتها الاستكشافية 

استخدم الباحثين عليها مسبار داخل المحيط 

واللي لقط أًصوات غريبة من قاع المحيط 

تزامنت الأصوات دي مع قوة غامضة 

بتسحب الأسلاك الفولاذية اللي شايلة المسبار 

لدرجة إنها قربت تنقطع ، وفضل طاقم السفينة

يحاول سحب المسبار لمدة 3 ساعات كاملين 

علشان يكتشفوا علامات عض على الجهاز 

وأكنه كان جوه فك وحش بحري 

وفسر علماء الأحياء الحادث ده ، إن المخلوق الوحيد 

اللي يقدر يتسبب في الضرر ده لجهاز بالضخامة دي 

واللي علامات فكه متطابقة تمامًا مع كائن واحد بس 

هو قرش الميجالدون ، وهو نوع من القروش 

من المفترض إننا كبشر نعرف إنه إنقرض من آلاف السنين 

واللي بيصل طوله لـ 22 متر ، يعني تقريبًا 

طوله يعادل إرتفاع عمارة من 7 طوابق 

ووزنه تقريبًا 45 طن ، واللي أكد إكتشاف العلماء ده 

لما إكتشفوا سن عملاق لنفس القرش ، وكان مطابق تمامًا لأثر العضة اللي على المسبار 

وحوادث خندق ماريانا ما وقفتش لحد كده 

فبعدها بكام سنة حصلت حادثة تانية 

لسفينة بضايع يابانية في نفس المنطقة

واللي خلال رحلتها العادية جدًا ، إتعرضت لخبطة 

وقعتها في نص المحيط ، وساعتها السلطات فسرت الحادث ده 

بأنها تعرضت لعوائق صخرية ، ولكن كل فرد في طاقم السفينة

بيأكدوا إن الأحوال الجوية كانت مستقرة تمامًا ، 

وإن المكان كان خالي تمامًا من أي عوائق 

وفضل البحث دايم عن منطقة خندق ماريانا 

طول الوقت ، ومن سنة 95 أطلق اليابانيين 

غواصة مجهزة تانية لدراسة منطقة خندق ماريانا 

واستمرت اكتشافاتها لحد سنة 2003 

وخلال رحلتهم دي ، قدروا يكتشفوا أكتر من 350 نوع 

من المخلوقات البحرية اللي موجودة على العمق ده 

وكانت آخر تجربة للنزول لعمق ماريانا 

كانت من خلال المخرج الكندي (جايمس كاميرون) 

اللي نزل لخندق ماريانا في غواصة شارك في تصميمها 

وعرض رحلته بالكامل في فيلم وثائقي إسمه 

Deepsea challenge 

علشان نكتشف وجود حياة بحرية غريبة جدًا على العمق ده 

بعد ما عرفت عن أعمق نقطة على وجه الأرض 

تفتكر فيه أماكن تانية بعمق أكبر من كده لم تُكتشف بعد ؟ 

طب تفتكر هل الكائنات البحرية اللي موجودة في العمق ده 

هي مجرد كائنات تم الإعلان عن إنقراضها 

ولكنها إختفت بعيد عن عيون البشر في أعماق المحيط ؟ 

وهل ظهور بعض الكائنات من أعماق أعلى لأعماق أقل 

(لمياه ضحلة) ممكن يكون مرتبط بالكوارث 

زي ما اليابانيين قالوا ده عن سمكة يوم القيامة ؟!