بعد طلاق أحمد العوضي وياسمين عبد العزيز .. تعرف على تفاصيل عيد الميلاد اللي انتهى بالطلاق .. والعديد من المحطات في حياتيهما

Amir Documents .. مدونة تهتم بالمواضيع التاريخية النادرة ونقد العادات العربية بشكل ساخر .. تابعنا 

بعد طلاق أحمد العوضي وياسمين عبد العزيز .. تعرف على تفاصيل عيد الميلاد اللي انتهى بالطلاق .. والعديد من المحطات في حياتيهما 

في آخر كام سنة كان مسيطر على الوسط الفني ، وخصوصًا ساحة الشائعات ، اتنين كابلز مفيش غيرهم .. كانوا حاجزين التريند لسنين 

شيرين وحسام حبيب ، اللي اتطلقوا واتجوزوا واتطلقوا واتجوزوا واتطلقوا يجي 16 مرة ، ولحد دلوقت ما نعرفش مصيرهم إيه .. 

والكابل التاني بقى اللي عاش لسنين ملهلب فخاد المصريين ، وعامل حرقان وحموضة للبشر لمواسم رمضانية متتالية .. وحش الكون ، وعلى الله حكايته .. (ياسمين عبد العزيز ، وأحمد العوضي) .. ودي علاقة بدأت على عربية كبدة جملي في كرداسة في مارس 2020 .. ياااه ذكريات .. فكرتني بالذي مضى .. وبعد ما ضربوا حتتين الكبدة النية بشهرين اتنين ، وفي شهر مايو تحديدًا أعلنوا عن جوازهم .

وهما اتجوزوا من هنا وهوب خد في وشك يا معلم من هنا ، كمية مسلسلات مليانة بالأحاسيس الجياشة والكبدة والكلام المعسوج مع بعض .. 

أعمال جمعت أحمد العوضي وياسمين عبد العزيز : 

بداية من مسلسل اللي ملوش كبير ، موسم رمضان 2021 ، واللي ماكانش أول مسلسل يجمعهم ، ولكن قبل جوازهم جمع بينهم مسلسل آخر نفس سنة 2019 .. 

وبعد مسلسل اللي ملوش كبير يشتريله كبير معروفة ، أو يطلبه أونلاين .. عملوا مع بعض مسلسل ضرب نار موسم رمضان 2023 .. ده غير بقى كم مهول من الأخبار ، ومنى الشاذلي ، واللقاءات التلفزيونية ، ومنى الشاذلي ، والإشاعات ، ومنى الشاذلي ، ومواقف الرجولة .. وطبعًا منى الشاذلي .. وتويتات وبوستات فيس بوك ، وليلة كبيرة قوي سعادتك .. 

ومن خلال 3 أعمال درامية جمعت بينهم (آخر نفس ، اللي ملوش كبير ، ضرب نار) جمعتهم قدمولنا وجبة كاملة من الترفيه .. بطلين من الخيال بيتقابلوا في الحقيقة وفي الدراما وبيحبوا بعض ويكسروا الدنيا علشان بعض ، وفي الآخر ينتصر الحب اللي بينهم ، وعايشين معاهم السيناريو لحظة بلحظة ، وأكن أستاذة منى الشاذلي مجرد فاصل في حياتهم .. محطة بيعدوا عليها .. 

ما تفهمش بقى كل ده كان مترتبله علشان التريند ، ولا فيه عمل جديد ، ولا إيه ؟ الله أعلم .. ملناش دعوة .. المهم إنهم من خلال 3 أعمال درامية ومن خلال دخولنا في حياتهم الشخصية قدمولنا جرعة دراما كاملة وصال ودلال ورضا وخصام .. ومنى الشاذلي ..

عيد ميلاد يتحول لطلاق أحمد العوضي وياسمين عبد العزيز :  

لحد كده وكله كان ماشي تمام التمام .. لحد ما حصل اللي حصل وقررت ياسمين هي وجوزها أحمد العوضي يحتفلوا بعيد ميلادها الأربعة وأربعين ، أيوه ياسمين عبد العزيز عندها 44 سنة وعمرها الفني أضعاف عمر أحمد العوضي .. ولكن نرجع لمرجوعنا قرروا يحتفلوا بالعيد ميلاد ، والاتنين كتبوا منشورات على الفيس بوك بيهنوا بعض وبيتمنوا لبعض سنة سعيدة ، وهوب سيل لا نهائي من التعليقات والدعوات والتبريكات والحوارات ، ولكن أكيد كان فيه من ورا الشاشات عين صفرا جابتهم الأرض .. ولحد الساعة 12 بليل كانت الدنيا فل وكله تمام التمام ، ويدوب هيقطعوا التورتة بعد ما ياسمين قالت هوف وطفت الشمع ، وهوب تحول عيد الميلاد لواقعة طلاق .. ويا عالم حصل .. تخيل نفسك مكان دليفري إيتوال ساعتها .. موقفك إيه ؟! .. واقف مستني حساب التورتة وهي بتتطاير قدامك .. وده أحمد العوضي ممكن يسفلتك .. يلا ربنا يعوضي عليك .. 

المهم ما طولش عليك قول طول .. إننا صحينا الصبح على بوستات من الطرفين أحمد العوضي وياسمين عبد العزيز ، بيعلنوا فيها طلاقهم رسميًا .. جرى إيه يا ولاد ؟ .. حصل إيه يا ولاد ؟! محدش عارف .. طب إلحقينا يا أستاذة منى .. أستاذة منى سمعت الخبر انهارت .. 

المهم إنها كثرت الأقاويل في الحتة داهية .. وناس قالوا خانها ومسكت ماسدج ولا حاجة .. وناس قالوا استرخصت التورتة .. محدش فاهم .. الله أعلى وأعلم .. 

هنقول إيه .. دعوا الخلق للخالق .. ملناش دعوة .. وعلشان مجايب سيرة الناس حرام .. قررنا نسكت ونتفرج من بعيد ، تعالوا تابعونا واتفرجوا زينا .. 

ونشوفكم في مقال جديد .. ووثيقة جديدة من Amir Documents