بعد ضربات البحر الأحمر .. من هم الحوثيين الذين يدقون طبول الحرب العالمية الثالثة ؟! | the Houthis and World War III

 

بعد ضربات البحر الأحمر .. من هم الحوثيين الذين يدقون طبول الحرب العالمية الثالثة ؟! 

بقالهم فترة عاملين قلق ، ومحرجين على أي سفينة تعدي من البحرين الأحمر والعربي ، واللي بيلمحوه .. بيمرجحوه ، وخصوصًا يعني لو كان متجه للكيان اللي ما يتسماش .. مين هما الحوثيين ؟ وإزاي تطورورا لدرجة إنهم بيهددوا الإقتصاد الأمريكي نفسه ، وهيتسببوا في حرب عالمية ثالثة ؟! .. تابعونا 

من هم الحوثيون ؟!

الحوثيين أو حركة أنصار الله ، واللي كان إسمهم في الأول حركة الشباب المؤمن ، وهي حركة إسلامية شيعية زيدية مسلحة ، متحالفة مع إيران ضمن الصراع الإيراني السعودي .. والحوثيين ظهروا في محافظة (صعدة) شمال اليمن في التسعينات ، وأطلق عليها إسم الحوثيين نسبة إلى مؤسسها (بدر الدين الحوثي) ، الزعيم الديني للحركة . 

تأسست حركة الحوثيين سنة 1992 لما حسوا أتباعها في اليمن إن الحكومة اليمنية بتقوم بالتمييز ضد الهاشميين وبيتم تهميشهم ، وإستبعادهم من أي منصب كبير أو سيادي .. 

وأعضاء الحركة وقاداتها معروف عنهم انتمائهم للمذهب الزيدي ، والشيعة الزيدية بيعتقدوا إن الحاكم لازم يكون هاشمي من نسل آل البيت .. والقائد الحالي للحركة  الحوثية هو (عبد الملك الحوثي) ، ابن مؤسس الحركة بدر الدين الحوثي . 

أهداف الحوثيون : 

وزي كل جماعة بيكونلها أهداف واضحة ومُعلنة ، وأهداف تانية مخفية عن العامة ، وبالنسبة لأهداف الحوثيين الواضحة ، فممكن نفندها في الأسباب التالية : 

1- مكافحة التخلف الإقتصادي والتهميش السياسي للهاشميين في اليمن . 

2- السعي للحصول على حكم ذاتي للمناطق اللي فيها أغلبية حوثية .

3- محاربة الفساد المالي والسياسي . 

4- تمكين أحد القادة من نسل آل هاشم من مقاليد الحكم .

علاقة الحوثيون بالسنة : 

علاقة الحوثيين متوترة مع المسلمين السنيين في اليمن من بداية تأسيس الجماعة ، وزي ما كانوا بيعانوا من التمييز ضد آل هاشم ، هما كمان قاموا بالتمييز ضد السنة ، لحد ما قدروا يتحالفوا معاهم تحت قيادة (حسين بدر الدين الحوثي) .. وبعد التحالف ده ، قدروا يقفوا ضد الرئيس اليمني السابق (علي عبد الله صالح) ، واتهموه بالفساد المالي الهائل .. 

الصراعات الداخلية اليمنية والخارجية : 

سنة 2004 بيتم قتل (حسين بدر الدين الحوثي) ، صاحب التحالف مع السنة  ، في محافظة (صعدة) بيتقتل هو وعدد من حراسه من قِبل الجيش اليمني ، الموضوع ده بيولع الدنيا وبيخلي الحوثيين يعلنوا التمرد المسلح .. وبعد أربع سنين من تمردهم المسلح لمحاولة قلب الحكم لصالحهم والسيطرة على الدولة .. بتتدخل (المملكة العربية السعودية) سنة 2008 وتحديدًا في شهر نوفمبر ، لما قدر الحوثيين يسيطروا على بعض الأراضي على حدود المملكة العربية السعودية .. 

وبسبب الأزمات والصراعات اللي مالية اليمن والانقسام الداير بسبب الحوثيين والتدخل السعودي ، بتفقد اليمن 377 ألف شخص ، منهم عشرات الأطفال ، ده غير النازحين ، والمهاجرين ..

صنفت السعودية والإمارات وماليزيا الحوثيين كجماعة إرهابية .. 

بعد أحداث السابع من أكتوبر لسنة 2023 والمعروفة بعملية طوفان الأقصى ، بتتدخل اليمن وتعلن الحرب على الكيان ، ومن يعاونوه في المذبحة ، وبالتالي بتمنع الملاحة في البحرين العربي والأحمر لأي سفينة خارجة أو داخلة للكيان ، وده اللي بيخلي الولايات المتحدة الأمريكية ، وانجلترا وهولندا ، والبحرين يعلنوا الحرب على اليمن بسبب تضررهم الإقتصادي .. وده اللي ممكن يكون بداية لحرب عالمية ثالثة .. 

بعد ما قرأت عن الحوثيين ، تفتكر تصنيفها كجماعة إرهابية صحيح ؟ .. طب تفتكر تدخلهم في الصراع الفلسطي-ني ، اسراء-يلي صحيح ؟

ياريت تقولنا رأيك في الكومنتات ، وياريت تعمل متابعة للمدونة(Amir Documents)  ، علشان يوصلك كل جديد .